SERVIZOS

O CONCELLO SACA A LICITACIÓN A MELLORA DE CATRO CAMIÑOS MUNICIPAIS CUN INVESTIMENTO DE 89.544€

O Concello de Cedeira acaba de sacar a licitación o proxecto “Conservación dos camiños O Beco, A Painceira, Santallamar e outros”, cun orzamento de 89.534,65€ (IVE incluído). O alcalde, Pablo Diego Moreda Gil, explicou que a intervención servirá para estender a rede de recollida de augas pluviais e mellorar o firme, e por tanto a seguridade vial, de catro viais en diferentes puntos do municipio. “Manter e mellorar a rede viaria de titularidade municipal é sempre unha prioridade para o goberno municipal, tamén nun ano atípico como este, no que imos realizar máis investimentos para seguir avanzando neste eido”, comentou.

O proxecto contempla a mellora de catro camiños que suman 1,25 quilómetros. O Beco é o primeiro deles e vai desde a AC-566 á altura da estación de servizo ata o lugar de O Coto. Neste percorrido, de 400 metros de longo e de catro metros de ancho, vaise executar a rede de pluviais ao longo da gabia, sobre a que tamén se creará unha senda peonil. No vial estenderase unha nova capa de asfalto.

O segundo camiño no que se vai actuar é no da Painceira, que comunica este lugar con San Andrés de Teixido. O vial ten 400 metros de longo e 3,50 de ancho, e a actuación vai consistir na limpeza das gavias e a instalación da rede de recollida de pluviais, así como na actualización da capa de rodadura.

Os camiños de Santallamar, que percorre 350 metros desde o Paseo Real da Magdalena ata a estrada AC-566, e o do Cancelo, que parte da carretera da Corredoira e conecta cunhas casas a 100 metros, serán tamén obxecto de mellora. Nestes casos limparanse as gabias en ambas marxes e estenderase unha nova capa de asfalto.

A licitación segue o procedemento aberto simplificado e as empresas poden presentar as súas ofertas ata o 27 de outubro.

O CONCELLO CONTRATA 22 NOVOS FAROIS LED PARA A ZONA DO PASEO ARRIBA DA PONTE E A RÚA PONTHUS

O goberno local de Cedeira adxudicou á empresa Diexfe a suministración de 22 novos farois e as súas correspondentes bombillas de tecnoloxía LED, que sustituirán ás actuais lámpadas de vapor de sodio. O alcalde, Pablo Diego Moreda Gil, explicou que o investimento se realiza con cargo ao Fondo de Compensación Ambiental 2020, ao que o Concello xa acudiu en exercicios anteriores para emprender o camiño da eficiencia no sistema de alumamento público da vila.

A oferta adxudicataria ascende a 9.103,95€ (+IVE) e o importe inclúe o suministro dos 22 novos farois que persoal municipal se encargará de colocar no Paseo Arriba da Ponte (6 deles), a rúa C. Phontus (11) e a rúa Ezequiel López (2), así como na Rúa Ortigueira (as 3 restantes), na outra beira do Condomiñas.

A introdución da tecnoloxía LED no alumamento público ten grandes vantaxes tanto no coidado do medio ambiente como no eido económico. As novas lámpadas precisan menos da metade da potencia eléctrica para dar a mesma luz que as de vapor de sodio, de maneira que co seu uso baixan as emisións á atmósfera de dióxido de carbono e tamén o custo para as arcas municipais. Son tamén, de por si, menos contaminantes que as tradicionais porque non teñen mercurio. E ofrecen moita maior durabilidade e rendemento, polo que o Concello tamén aforra no mantemento. A todo isto súmase que as bombillas LED permiten axustar mellor a cantidade de luz necesaria, algo que evita unha innecesaria contaminación lumínica.

No presente ano, o Concello de Cedeira está a darlle un importante impulso á renovación da rede de alumamento público na zona rural da vila, con tres procesos de licitación pendentes de resolver que se traducirán na renovación de máis de 2.000 puntos de luz. Trátase dos proxectos de subministración de lámpadas LED no Lugar de Fragoso, Veciñeira, San Miguel e outros, que contempla a substitución de 1.452 farois; o das rúas Nosa Señora do Mar e outras, que prevé o cambio de 91 farois; e o dos Lugares de Bouza, Purrei, Ardeón e outros, coa colocación doutras 517 lámpadas. En total, estas actuacións suman un investimento de máis de 124.000 euros. Cómpre sinalar que este mesmo ano o Concello tamén contratou, por preto de 40.000 euros, a instalación de 97 puntos de luz de tipo LED na Avenida de Castelao, na zona urbana, ás que se sumarán agora estas novas 22 no Paseo Arriba da Ponte e rúa Ponthus.

O alcalde recordou a firme aposta do goberno local pola loita contra o cambio climático, tanto a través deste tipo de actuacións que melloran a eficiencia enerxética das instalacións municipais, como a través da participación do Concello de Cedeira, desde xaneiro de este ano, no “Pacto das alcaldías para o Clima e a Enerxía”.

O peche da Escola Infantil de Cedeira transformouse nunha paisaxe mariña da man de Adrián Taracido

O Concello de Cedeira acaba de ampliar de seis a sete os murais cos que o goberno municipal quere converter a vila nun museo ao aire libre. Así, aos xa executados no auditorio, biblioteca municipal, ponte novo, estación de bombeo e colexio Nicolás del Río súmanse agora o que xa está a adornar os muros exteriores da escola infantil A Galiña Azul, concretamente os que dan á rúa Ortigueira.

Adrián Taracido Fernández é o autor desta nova obra na que están debuxados un faro, unha balea, marraxos, garzas e un cormorán, entre outros animais, sobre un fondo cheo de ondas. A pintura, do mesmo autor dos murais da estación de bombeo e do peche do colexio local, ocupa o muro ao longo duns 90 metros.

O importe desta nova intervención ascendeu a 2.117,50 euros (IVE incluído).

Fronte a fealdade urbanística, o goberno municipal de Cedeira está a apostar por “facer dos espazos públicos museos de balde sen paredes nin teiros”. O executivo local reitera que “pretendemos que o pobo sexa un escaparate do “street art” e convertilo nun recurso turístico atractivo que permita coñecer a vila desde un novo punto de vista, como un lugar máis amable para o ollo da persoa que observa e ve arte onde antes había fealdade, fomentando un espazo de relación social moito máis habitable”.

O goberno xa baralla novas intervencións de arte urbano como a que prevé levar a cabo este mesmo anos nas pistas de pádel, tal e como confirmou o rexedor municipal, Pablo Diego Moreda Gil. Neste sentido, o rexedor adiantou que se tratará dun traballo colectivo, que correrá a cargo do alumnado do IES Punta Candieira e para o que o Concello porá desde o material ata o asesoramento artístico.