SERVIZOS

O Concello de Cedeira acaba de resolver a licitación do proxecto de mellora dos camiños de Fernando Lago, Cordobelas e Bouza, que se vai acometer con cargo aos fondos obtidos do programa da Axencia Galega de Desenvolvemento Rural (Agader). Así, a oferta de José Manuel Piñeiro López é a adxudicataria ao ser valorada como a máis ventaxosa entre as cinco presentadas ao concurso. O prezo de adxudicación é de 40.704,40€ (IVE incluído).

O camiño Fernando Lago é o máis longo dos tres viais de titularidade municipal que abrangue o proxecto. Está situado na parroquia de Cedeira e ten algo máis dun quilómetro de percorrido, cun ancho medio de tres metros. O firme é de macádam, con algún rego asfáltico, e actualmente atópase bastante deteriorado e con fochancas. As obras van consistir na limpeza das gabias, a adecuación da superficie e a aplicación dunha nova capa asfáltica.

As obras serán similares no camiño de Cordobelas, na parroquia de Esteiro, e no de Bouza, na de Régoa. O primeiro destes viais ten 410 metros de longo e 3 de ancho, e o segundo percorre 760 metros, co mesmo ancho medio. O prazo de execución é de dous meses.

O Concello de Cedeira acaba de publicar na Plataforma de Contratación do Sector Público a licitación da obra de “Rehabilitación estrutural e do pavimento do anel vermello da Praza Roxa”, cun presuposto de 112.249,99€ (IVE incluído). Segundo informou o alcalde, Pablo Diego Moreda Gil, as empresas teñen de prazo ata o día 30 de marzo para presentar as súas ofertas a este concurso, incluído no capítulo de investimentos -dotado con máis de 1,1 millón de euros- dos orzamentos municipais de 2021 que o pleno municipal aprobou a finais de febreiro.

A obra que se vai realizar “vai dirixida a mellorar as condicións dun espazo central de convivencia para a cidadanía cedeiresa”, recordou o alcalde. A intervención consistirá en levantar o pavimento actual, que presenta numerosas fendas e está desgastado e deformado en moitos puntos pola acción das raíces das árbores, e habilitar outro máis resistente e coa adherencia necesaria para o intenso uso que ten esta zona.

Así, segundo consta no prego técnico do proxecto, os traballos incluirán, tras o levantamento do pavimento actual, a poda das raíces e a colocación dunha malla que evite no futuro que estas levanten e deformen a superficie. Enriba desta malla irá unha capa de zahorra e sobre ela un aglomerado asfáltico. A superficie da praza, de 1.500 metros cadrados, levará un acabado de resina epoxy, usado frecuentemente para polideportivos ao aire libre pola súa adherencia e resistencia. No proxecto contémplase tamén a pintura de frases, símbolos ou poemas sobre a superficie para darlle unha estética máis atractiva ao conxunto.

O proxecto está incluído no programa de actuacións financiadas co apoio do POS+2021 da Deputación da Coruña. O prazo de execución é de dous meses.

O Concello de Cedeira adxudicou á empresa Instalaciones Especiales Malagueñas o contrato de “Suministro de lámpadas led nos lugares de Fragoso, Veciñeira, San Miguel e outros” por un presuposto de 39.796,63€ (IVE incluído). Segundo recordou o alcalde, Pablo Diego Moreda Gil, a licitación quedara deserta no pasado outubro, pero o goberno local volveuna a publicar e presentáronse desta volta seis ofertas. “Seguimos adiante co plan para renovar a rede pública de iluminación, co obxectivo de facela máis eficiente e menos contaminante, e este é un contrato importante nese camiño”, subliñou o alcalde.

O contrato supón o suministro de 921 lámpadas de tecnoloxía led que sustituirán ás actuais, de vapor de sodio, en diferentes puntos da zona rural de Cedeira. O investimento realízase con cargo ao programa POS+2020 da Deputación da Coruña e a empresa adxuditaria unicamente ten que suministrar os equipos, que logo serán instalados por persoal municipal. O contrato supón unha importante baixa con respecto ao prezo de saída, que era de 65.872,78€.

As novas lámpadas led repartiranse polas parroquias de San Román (117 unidades), Esteiro (230), Piñeiro (140), Régoa (129), Cervo (151), Cedeira (66) e Montoxo de San Xiao (88). A incorporación desta tecnoloxía permite empregar moita menos potencia para obter a mesma intensidade de luz, de maneira que o Concello garante unha iluminación acaída, con lámpadas que non teñen mercurio, menos contaminantes e moito máis baratas, porque se reduce a factura do consumo e tamén a do seu mantemento.