SERVIZOS

O CONCELLO SUMA MÁIS DE 530.000€ A INVESTIMENTOS DESTE ANO PROCEDENTES DE REMANENTES DE 2020

O pleno da corporación cedeiresa aprobou na súa reunión ordinaria deste mes, cos votos a favor do grupo de goberno e a abstención do resto, a proposta da Alcaldía para incorporar remanentes do ano 2020 ao orzamento de 2021 a través dunha modificación de crédito. A operación permite sumar 531.646,04€ ao capítulo de investimentos do actual exercicio e habilitar partidas para acometer 21 actuacións. Tal como explicou o alcalde, Pablo Diego Moreda Gil, “as contas do Concello están saneadas, e isto permítenos afrontar máis proxectos, tanto reparacións e obras que son urxentes, como comprar equipamentos que mellorarán os servizos municipais en diferentes eidos”.

Entre as 21 actuacións que vai acometer o Concello de Cedeira con cargo a estes remanentes de tesourería procedentes das contas do ano anterior está a adquisición dun tractor con brazo desbrozador por valor de 100.000€, que se vai incorporar ao equipamento municipal e que facilitará a realización de tarefas de limpeza nas zonas rurais do municipio. No capítulo de maquinaria incluiuse tamén a compra dunha deshumectadora (32.382,17€).

Poderá tamén acometer o goberno municipal varios investimentos para a mellora da Escola Infantil da Galiña Azul de Cedeira. Así, está previsto pintar a fachada, reparar a súa cuberta e cambiar as ventás (cun gasto total de 61.858,4€). No capítulo de instalacións deportivas, hai diversas partidas que suman un total de 156.924€ e que servirán para realizar melloras na pista deportiva da Carballa, crear unha instalación de vía ferrata para a práctica da escalada, realizar varias intervencións nas pistas de pádel e facer reparacións no polideportivo municipal.

Os fondos financiarán tamén novo mobiliario urbano e marquesinas (partida de 23.435,70€), melloras en beirarrúas e pistas (15.000€), unha obra de pavimentación e nova rede de pluviais paseo arriba da Ponte (26.347,75€), a segunda fase do saneamento da rúa Amor Hermoso (34.471,47€) e dúas obras de arranxo en camiños veciñais, concretamente na pista Ponte de Reboredo (10.769€) e na dos Sedeás (14.435,60€).

A estas actuacións súmanse unha partida para unha expropiación na rúa Cerdido (30.121,28€) e outra para a adquisición de camas xeriátricas (10.000€).

Tras a aprobación da modificación de créditos por parte do pleno, a resolución ten que ser publicada no Boletín Oficial da Provincia e ser sometida ao período de exposición pública, para a posterior aprobación definitiva.

O CONCELLO RENOVA A PINTURA DA BALAUSTRADA E DAS MARCAS VIAIS ENTRE A PONTE VELLA E A NOVA

O Concello de Cedeira contratou recentemente uns traballos de mantemento da pintura da balaustrada do paseo marítimo, entre a Ponte Vella e a Nova, así como das marcas viais de toda esa zona -prazas de estacionamento para persoas con mobilidade reducida, limitacións de velocidade, pasos de peóns, etc-. A empresa Galaica Viaria vai executar estes traballos por un presuposto de 14.399€ (IVE incluído).

Trátase dunha actuación importante para a seguridade vial, xa que corrixe o deterioro da sinalización horizontal, e coa que tamén se vai repintar de branco a balaustrada que percorre todo este tramo da desembocadura do río Condomiñas, un dos lugares con máis encanto da vila cedeiresa que así se pon ao día cara á tempada de verán.

Biblioteca

Por outra banda, o goberno local aprobou un gasto de 4.918,65€ (IVE incluído) para a adquisición de catro librerías para a Biblioteca Municipal López Cortón. O equipamento é preciso para substituír as anteriores, que están deterioradas, e vén completar un proceso de renovación do mobiliario máis antigo do inmoble que comezou a finais do pasado ano, cando o Concello investiu uns 8.000 euros para cambiar as mesas e as cadeiras da sala vella, así como o chan, que estaba afectado pola couza.

As novas librerías teñen estrutura de madeira de castiñeiro e andeis en rechapado hidrófugo de castiñeiro e van destinadas tanto á pranta baixa como ao primeiro e segundo piso da biblioteca.

IDENTIFICACIÓN DE ZONAS CON BAIXA COBERTURA DE REDES DIXITAIS NO MUNICIPIO DE CEDEIRA

O Concello de Cedeira informa de que o Goberno central está a realizar unha consulta pública para identificar as denominadas “zonas brancas” na cobertura de internet, aquelas que teñen unha velocidade inferior a 30 Mbps, sen plans para a súa dotación nos próximos tres anos. A administración local está a colaborar neste proceso de análise de necesidades, que forma parte do Plan para a Conectividade e as Infraestruturas Dixitais.

Así, existe xa un mapa no que están identificadas esas zonas brancas de Cedeira, que achegamos -están pintadas de cor verde-. Porén os veciños e veciñas que estimen que o lugar no que residen debería incluírse tamén poden comunicalo ao Concello coa finalidade de comprobar a calidade da cobertura e introducilo na relación. A consulta está aberta ata o 29 de maio.

O Plan para a Conectividade e as Infraestruturas Dixitais ten como finalidade mellorar a calidade da conexión, para o que se van empregar os fondos Next Generation, para que toda a poboación teña acceso a redes NGA (acceso de nova xeración), é dicir, ás de tipo 5G.

O alcalde, Pablo Diego Moreda Gil, subliñou a importancia da conectividade para municipios como Cedeira, no que ter unha boa conexión de internet pode atraer nova poboación e mellorar a calidade de vida e de traballo da actual. “O teletraballo e tamén outros servizos que agora son capitais, como o acceso á atención sanitaria en liña, terán un impulso determinante a través dos fondos europeos para a recuperación”, comentou.

DESCARGAR MAPA NASEGUINTE LIGAZÓN:

DESCARGA PDF MAPA