SERVIZOS

REMATADAS AS OBRAS DE MELLORA DO TRAZADO DA AC-566 DESDE VALDOVIÑO ATA A RAMALLEIRA

O alcalde de Cedeira, Pablo Diego Moreda Gil, acudiu este mércores a visitar as obras de mellora do trazado na estrada autonómica AC-566 xunto coa conselleira de Infraestruturas Ethel Vázquez, a delegada territorial da Xunta, Martina Aneiros, e o alcalde de Valdoviño, Alberto González. A adminstración autonómica investiu 4,7 millóns de euros na actuación, que abrangueu sete quilómetros de estrada, desde a saída de Valdoviño ata A Ramalleira, e que permite reducir nun 30% o tempo do percorrido por dito tramo e incrementar sensiblemente a seguridade vial.

Moreda Gil amosouse satisfeito pola realización destas obras, que foron longamente demandadas pola cidadanía de Cedeira. Lembrou as xestións realizadas desde o ano 2015, no anterior mandato, e que xa a finais de 2016 a Xunta se comprometera a a realizar as obras que agora por fin están rematadas.

O alcalde sinalou tamén que o Concello de Cedeira ten solicitado á Xunta que esta intervención teña continuidade con outras dúas na mesma estrada. Concretamente, o alcalde reclama que a Consellería arranxe a AC-566 no seu último tramo, na entrada á propia vila de Cedeira, no que o firme está moi deteriorado e precisa dunha renovación da capa de aglomerado, e tamén que inicie canto antes os estudos previos para mellorar o trazado no tramo de dous quilómetros de curvas que se suceden na zona de Landeira. Moreda explicou que é unha zona afectada pola Rede Natura e que o goberno local é consciente de que a tramitación vai ser longa, polo que é preciso comezala canto antes. “Son actuacións que impactan directamente no progreso do pobo, que contribúen a fixar poboación”, comentou, engadindo que “a Consellería ten que ser sensible as demandas que presentamos os alcaldes, porque estamos a recoller as necesidades reais da cidadanía”.

As obras que executou a Consellería de Valdoviño ata A Ramalleira traducíronse no ensanchamento da calzada nalgúns tramos, incorporando un terceiro carril que permite os adiantamentos, e a rectificación das curvas máis pronunciadas e perigosas. A intervención incluíu a reforma de interseccións, habilitáronse cambios de sentido e facilitáronse aqueles xiros á esquerda que reúnen as condicións de seguridade obrigadas. Nalgúns puntos do trazado, o ancho da calzada ampliouse ata os dez metros.

ADXUDICADA, POR MÁIS DE 204.000€, A MELLORA DE BEIRARRÚAS EN CINCO VIAIS DA ZONA URBANA DE CEDEIRA

O Concello de Cedeira adxudicou á empresa Meraki a execución do proxecto “Mellora das beirarrúas na Avenida de España, as rúas Ponte Nova, José Pascual López Cortón, Salinas e Camiño de Pitilleira”. Cinco empresas concorreron ao proceso de licitación, que partía dun prezo de preto de 220.000€ e que gañou a devandita compañía por 204.344,99€ (IVE incluído).

As obras van consistir na renovación de máis de 1,2 quilómetros lineais de beirarrúas en cinco viais do casco urbano de Cedeira, con financiamento procedente do POS+Adicional por maior achega da Deputación da Coruña.

O proxecto contempla a substitución das beirarrúas en ambas marxes, salvo no caso da rúa López Cortón, na que as obras só afectarán a unha. Levantarase o pavimento e o bordo actual, que se atopa bastante deteriorado, e colocaranse outros novos. Nas rúas Avenida de España, López Cortón, Camiño de Pitilleira e Salinas as novas pezas serán de formigón granallado, mentres que na Ponte Nova empregarase a pedra granítica.

Ademais, as obras aproveitaranse para dotar dun maior ancho ás beirarrúas na Avenida de España, no tramo que vai da rúa México á de As Pontes. Alí, o espazo destinado aos peóns ampliarase ata ter 1,80 metros de ancho, corrixindo a estreitura actual.

A realización destas obras vai emendar algunhas das eivas detectadas no Plan de Mellora da Mobilidade Urbana de Cedeira, en canto ao deterioro do firme nalgunhas rúas e á falta de espazos amplos para o tránsito dos peóns, como é o caso da Avenida de España, onde se vai ensanchar a beirarrúa.

O CONCELLO LICITA OBRAS DE MELLORA EN PRETO DE DOUS QUILÓMETROS DE PISTAS DE ACCESO A PARCELAS AGRÍCOLAS

O Concello de Cedeira ten en proceso de licitación a obra de “Mellora da capa de rodadura de camiños municipais”, unha actuación que o goberno local vai acometer no marco da convocatoria do Plan de Camiños Rurais de acceso a parcelas agrícolas da axencia Agader. Os traballos saen a concurso cun presuposto de 57.800€, dos que 43.986€ serán financiados coa subvención concedida pola axencia autonómica e os 13.814€ restantes irán a cargo dos orzamentos locais.

Concretamente, as obras realizaranse nas pistas de Condomiñas, Espiñaredo e Casal María, que teñen en común o estado de deterioro actual do firme. Os traballos consistirán en limpar as marxes e rechear as fochancas con pedras, aplicando unha triple capa de rego asfáltico nas dúas primeiras e unha de mestura bituminosa na terceira. O camiño de maior percorrido é o de Condomiñas, que ten 1,3 quilómetros. En total, a intervención abranguerá 1,8km.