Skip to content Skip to left sidebar Skip to footer

PARTICIPACION

A Biblioteca Municipal López Cortón xa loce un aspecto máis rexuvenecido

O goberno de Cedeira acaba de dar por finalizada a obra de pintado exterior da biblioteca municipal López Cortón, un edificio que xa fora sometido a unha profunda renovación no seu interior e que forma parte do conxunto arquitectónico do casco vello. Desde o executivo local destácase o seu interese en contribuír á posta en valor do núcleo urbano da vila e, neste sentido, recórdase que cara ao 2020 está prevista a execución do proxecto que transformará o pazo de Moscoso nun novo edificio de carácter municipal e de servizos.

A obra agora executada pola empresa Agustín González Carro na biblioteca consistiu no pintado exterior dunha edificación cuxos orixes se remontan ao século XVIII e que durante anos tamén foi sede consistorial do municipio. Cun orzamento superior aos 6.600 euros, o traballo realizado deu lugar ao lavado e saneado de todas as paredes exteriores do inmoble, que posteriormente recibiron dúas mans de imprimación e un total de tres de pintura impermeabilizante. A intervención mellora considerablemente o aspecto exterior da construción e evita posibles problemas de humidade. Segundo o alcalde, Pablo Moreda Gil, “o Concello tamén debe velar pola conservación dos edificios municipais e pola posta en valor da riqueza local”.

O goberno municipal apostou por manter os colores branco e amarelo tan característicos da edificación, así como a faciana e os versos de Rosalía de Castro que desde hai un ano figuran na fachada posterior e principal do edificio, situado entre a praza da Rectoral e a travesía do Cristo.

Cedeira recupera para a memoria colectiva os nomes e valores dos trece veciños asasinados no 36

A corporación municipal de Cedeira convoca a veciñanza a participar no acto de desagravio contra a ignominia da sentenza pola que o 18 de decembro de 1936 morrían asasinados trece veciños do municipio, na súa maioría membros da corporación municipal, no castelo de San Felipe de Ferrol.

A convocatoria, que será ás doce deste domingo, dará lugar á inauguración dun panel explicativo e ao bautizo como praza do 18 de Decembro da que antes era coñecida como “dos Cabalos”.

O alcalde, Pablo Moreda Gil, presidirá un acto que se celebra de acordo a unha iniciativa da sección local da Asociación da Memoria histórica Democrática aprobada por unimidade da corporación na sesión plenaria celebrada o pasado mes de novembro. Moreda Gil sinalou que “para min é un orgullo representar a toda a corporación nun acto no que se recoñecerá a grandeza dunha xente humilde que loitou e defendeu ata coa súa propia vida a democracia”.

En base a devandita decisión colocarase un panel explicativo no que figurará, ademais dunha fotografía do Concello cedeirense do ano 1936, os nomes e profesións dos asasinados, incluído o do veciño de Cabanas que compartiu o mesmo destino que os cedeirenses.

A partir de agora todas aquelas persoas que pasen por esta céntrica praza da vila de Cedeira poderán ler o seguinte texto: “Os militares rebeldes, que se levantaron en armas contra a España democrática en xullo de 1936, condénanvos a morte e execútanvos no castelo de San Felipe por rebelión militar. Xunta vós, tamén sería asasinado Antonio Ameneiro Brage, veciño de Cabanas. A ignominia da sentenza, que intentaba xustificar o criminal fusilamento de xente de paz, viría acrecentar, se iso fose posible, o horror do delirante fanatismo dos golpistas”.

Os veciños axecutados foron Manuel Fernández Freijeiro, militar retirado e alcalde de Cedeira no ano 1936; José Cipriano Durán Fraguela, labrador e segundo tenente de alcalde; José Lago Beceiro, labrador e concelleiro; Miguel Fernández Santos, funcionario de Correos; Isaac Forneiro Varandela, mestre e empregado de banca; Enrique Martínez Teijeiro, condutor de autobús; Francisco Rodríguez, barbeiro e músico; Ginés Fernández Rodríguez, estudante, e Antonio Iglesias Freire e Adolfo Bouzón Teijeiro, mariñeiros.

O programa de Nadal de Cedeira inclúe panxoliñas, sesións de photocall e un concerto de Guadi Galego

O Concello de Cedeira convida a veciñanza a participar activamente no programa de Nadal que dá comezo esta fin de semana cos festivais de panxoliñas organizados polas Rondalla de Cedeira e mais da Coral Virxe do Mar, e no que tamén haberá obradoiros, concertos, unha festa acuática e as esperadas visitas de Papá Noel e dos Reis Magos. Estes dous primeiros festivais de panxoliñas serán sábado e domingo ás 20.00 e 19.00 horas, respectivamente.

A música volverá o venres 20 ao centro cultural coa celebración da audición de Nadal protagonizada polos 130 alumnos matriculados na Escola de Música Vila de Cedeira.

Tanto ese venres como o sábado 21, haberá sesións de photocall na bóla xigante que desde a pasada fin de semana adorna e ilumina a céntrica praza Roxa, e o sábado 21 e domingo 22 celebraranse os festivais de panxoliñas promovidos pola Coral Estrelas do Mar (19.30 horas) e Coral Eixil (20.00 horas).

A visita de Papá Noel está prevista para a tarde do domingo 22, coa súa chegada en lancha á praza do Peixe, o posterior percorrido polas rúas da vila e a recepción oficial que será na praza Roxa.

O centro de ocio xuvenil acollerá obradoiros de cine, que se levarán a cabo os días 27, 28 e 29 de decembro e para os que é necesario apuntarse previamente no polideportivo municipal ou a través do correo electrónico manuel.martinez@cedeira.gal.

O venres 27 haberá ademais unha sesión de laser tag no pavillón polideportivo, mentres que ao día seguinte(28 decembro) será o Concerto de Nadal da banda de música Vila de Cedeira, e que dará comezo ás 20.00 horas no auditorio.

O domingo 29 terá lugar o esperado concerto no que Guadi Galego interpretará as cancións do seu último traballo discográfico, que leva por título immersión e que é unha revisión en varias linguas afíns á autora, por territorio cultura e emoción, “unha reinterpretación da súa propia música”. A cita coa intérprete local será ás 19.00 horas.

A noite de fin de ano despedirase como é tradicional na praza Roxa e, nesta ocasión, estará amenizada pola orquestra La Favorita.

O 2020 dará comezo, para efectos de ocio, o venres 3 coa celebración dunha festa acuática infantil na piscina municipal, para nenos/as de 5 a 12 anos, e coa visita dos Reis Magos durante a tarde do día 5. Os magos sairán ás 18.00 horas do colexio Nicolás del Río para, a continuación, presidir a recepción oficial no Palacete da vila. A festa rematará cunha merenda “de reis” e xogos inchables no pavillón do devandito centro educativo.