NOVAS

A ASOCIACIÓN PARA A XESTIÓN DO XEOPARQUE DO CABO ORTEGAL APROBA UN PLAN DE ACTUACIÓNS E ORZAMENTO PARA O ANO 2023 POR IMPORTE DE 453.136 € NA SÚA ASEMBLEA XERAL ORDINARIA

O Proxecto de Xeoparque do Cabo Ortegal está a espera da ratificación da UNESCO para converterse oficialmente en Xeoparque Mundial, trala proposta favorable emitida, no pasado mes de decembro, polo Consello de Xeoparques da Unesco.

A Asociación para a xestión do Xeoparque do Cabo Ortegal ven de celebrar no día de onte a súa Asemblea Xeral Ordinaria, onde se aprobou un orzamento por importe de 453.136 € para esta anualidade.

Tamén se aprobou o estado de contas do ano 2022, así como o plan xeral de actuación para o ano 2023.

Tal e como establecen os estautos da asociación, procedeuse tamén ao cambio da xunta directiva, con cargos de carácter anual e rotativo, pasando á presidencia de turno a recaer sobre Pablo Moreda Gil, alcalde e representante do Concello de Cedeira, para este ano 2023.

Ademáis, deuse conta de todas as actuacións levadas a cabo no derradeiro ano, incluíndo o resultado favorable da auditoría da candidatura e, polo tanto, da proposta favorable do Consello de Xeoparques da Unesco para o recoñecemento definitivo (prevese no vindeiro mes de maio) como Global Geopark, por parte da Asamble Xeral da Unesco. Tamén se deu conta da execución de diferentes accións incluídas no Convenio de Actividade asinado coa Deputación da Coruña, así como da subvención DP0030 da Deputación da Coruña para a mellora da calidade, competitividade e actividades turísticas da provincia da Coruña.

ENTIDADES AMIGAS

Os estatutos da asociación prevén a figura das entidades amigas que, previa solicitude, son admitidas en Asamblea xeral. Así, nesta asemblea xa poideron participar aquelas entidades amigas que foran admitidas en asembleas anteriores. Ademais, aprobouse a incorporación de 6 novas entidades, ascendendo actualmente a 20 as asociacións de diversa tipoloxía (deportivas, culturais, veciñais, sectoriais…) que están admitidas. Estas Entidades Amigas forman parte tamén do Foro de Participación Local, exercendo como embaixadores do proxecto e colaborando coa asociación, sendo chave para a involucración da base social neste proxecto.

Máis información: xestionaxco@gmail.com

CEDEIRA RECOLLEU MÁIS DE 4.000 KG DE ACEITE USADO NO 2022

Os 17 contedores para aceites domésticos, instalados en Cedeira, recolleron en 2022 un total de 4.164 Kg de aceite usado; co que se evitou a contaminación de máis de 4,5 millóns de litros de auga, e que transformado en biocarburante xerou un aforro de 12,49 toneladas de CO₂ emitidas á atmósfera.

Segundo as cifras achegadas pola empresa de recollida, o contedor que máis litros recolleu o ano pasado é o do grupo de contedores próximo á “Capilla del Amor Hermoso, seguido do grupo de contedores situado preto do centro de ocio xuvenil.

Dende o concello celébranse estas boas cifras, e prégaselle a toda a veciñanza que continúe a participar desta práctica.

Para promover esta conduta entre a cidadanía, desenvolverase, a partir da próxima semana, unha campaña medioambiental para fomentar a separación do aceite vexetal de orixe doméstica.

As accións previstas asociadas á campaña irán dende a procura da sensibilización cos problemas que xera ao medio ambiente non xestionar axeitadamente o aceite doméstico usado, pasando por actuacións que facilitarán á veciñanza o hábito cotián de separación do aceite.

Lembrar que, no mellor dos casos, o aceite desbotado polos vertedoiros chega ás estacións depuradoras, ocasionando altos custes de limpeza e mantemento. No peor dos casos, eses aceites poden acabar no río ou no mar causando serios problemas na flora e fauna mariña.

Aprovéitase ademáis, para incidir na importancia da recollida selectiva doutros residuos domésticos, para os que o concello ofrece unha ampla gama de colectores; e facilita tamén a recollida a través do punto limpo fixo e a domicilio, no caso de enseres ou residuos de gran porte.

O CENTRO DE OCIO XUVENIL DE CEDEIRA ORGANIZA PARA ESTE SÁBADO UN OBRADOIRO DE TATUAXE

O Centro de Ocio Xuvenil (COX) do Concello de Cedeira programa para este sábado, día 25, un obradoiro de tatuaxe dirixido a mozos e mozas de 12 a 18 anos. É unha iniciativa que resposta á propia demanda expresada polos usuarios e usuarias no marco da dinámica participativa coa que se está a xestionar o centro. As prazas son limitadas e é preciso inscribirse previamente, de xeito presencial ou por correo electrónico escribindo á dirección coxcedeira@gmail.com.

A entidade Vella Escola, especializada na divulgación de diferentes disciplinas da chamada “cultura urbana”, será a encargada de impartir o obradoiro de Tatoo. A actividade desenvolverase de 17.30 a 19.30 horas e as persoas participantes coñecerán os diferentes estilos e as ferramentas e técnicas utilizadas na realización de tatuaxes. Na mesma sesión realizaranse prácticas individuais sen agullas, primeiro, e despois con elas, de xeito supervisado, sobre unha pel de laranxa.

Para a mesma xornada do sábado están tamén anunciadas varias actividades promovidas pola asociación Lugares Comúns, coa colaboración do Concello de Cedeira. Pola mañá desenvolverase o I Encontro de Sementes, a partir das 11.00 horas na Sala Áncora. Un agricultor da zona dará unha charla sobre o banco de sementes de Galicia e sobre os inxertos. Porén, a entidade subliña o interese da segunda parte deste encontro, o intercambio de sementes, para o que invitan a todas as persoas interesadas no cultivo da terra a acudir con sementes para intercambiar e con vontade compartir coñecementos e curiosidade.

Lugares Comúns promove tamén na tarde do sábado un encontro coas artes escénicas. O Auditorio acollerá, a partir das 19.00 horas, a representación da obra teatral “Hai alguén aí?”, o pase dun audiovisual co alumnado de violín e unha pequena mostra de músicas do mundo a cargo do grupo O Mar.

Lugares Comúns é unha asociación que xurdiu por iniciativa dun grupo de veciños e veciñas de Cedeira con diferentes orixes, moitas delas de fóra de España ou de Galicia e tamén algunhas da propia vila, que teñen o interese de compartir cultura e experiencias. Defínense como unha plataforma “para facer aos de fóra máis de aquí e aos de aquí máis de fóra”.

Xunto con estas actividades, o vindeiro sábado Cedeira acollerá tamén unha xornada para promover o deporte en idade escolar. Concretamente, o programa estará adicado ao bádminton nas categorías benxamín, alevín, infantil e cadete. A cita, encadrada na campaña Xogade da Xunta de Galicia, comezará ás 10.00 horas no Polideportivo Municipal.