NOVAS

SANIDADE CONFIRMA QUE A PARCELA DO CONCELLO CUBRE, E MESMO SUPERA, AS NECESIDADES DO CENTRO DE SAÚDE

O alcalde de Cedeira, Pablo Diego Moreda Gil, mantivo este mércores unha xuntanza co conselleiro de Sanidade, Julio García Comesaña, para avanzar no proxecto do novo Centro de Saúde. No encontro corroborouse que os terreos que o Concello pon a disposición do Sergas na zona da estación de autobuses están moi por arriba das necesidades do plan funcional do futuro edificio, polo que tanto o conselleiro como o resto dos responsables e técnicos presentes felicitaron ao goberno local de Cedeira pola solución adoptada.

Segundo explicou Moreda, o plan funcional do Centro de Saúde concreta a necesidade de 2.007 metros cadrados útiles que se van habilitar nun inmoble de dúas plantas (baixo máis primeiro). O terreo que pon o Concello a disposición da Consellería –segundo o acordo unánime no pleno da corporación- é unha parcela de 2.318,07 metros cadrados de superficie bruta, que permiten darlle á planta baixa ata 1.635,20 m2 e que ofrece en total unha edificabilidade de 5.232,64m2. “Poñemos a diposición de Sanidade máis do doble da superficie que precisa, polo que os responsables autonómicos quedaron moi satisfeitos e así nolo expresaron”, explicou Moreda.

Na reunión participou, xunto co conselleiro, o xerente da área sanitaria, Ángel Facio, e o arquitecto Ángel Monteoliva, por parte do Concello. Segundo expuxo alí o alcalde, a intención do goberno municipal é dotar á zona na que se vai levantar o novo Centro de Saúde dun espazo de aparcamento, un proxecto co que tamén se amosou satisfeito Julio García Comesaña polo que contribuirá a facilitar a afluencia ás consultas. Moreda Gil sinalou que coa construción do novo inmoble e o traslado do Centro de Saúde, Cedeira poderá aproveitar o edificio actual para acoller outros usos, no eido dos servizos sociais –lembrou que o Concello está a espera de ter resposta sobre o proxecto para o Centro de Día-, para o tecido asociativo ou para outros usos “que acordemos no pleno”.

Moreda Gil quedou sorprendido, á vista do resultado da reunión de onte, polas manifestacións que fixo públicas hoxe nun medio de comunicación o voceiro do PP de Cedeira, Luis Rubido. “Antes de falar hai que informarse”, dixo Moreda Gil, quen recordou que o PP votou no pleno a favor do que agora sae a criticar. “A súa xestión será recordada pola perda de 2,4 millóns de euros que xa foran consignados en 2012 polo Goberno central para a ampliación do Centro de Saúde, que non chegaron a executarse porque a Xunta do PP non aportou a súa parte”, dixo Moreda Gil, que considerou que Rubido amosa a súa pouca clase aludindo a Foz e que “non é de extrañar que o PP prescinda del”.

“Invitei ao conselleiro Julio Comesaña a vir a Cedeira para visitar os terreos, e invitarei tamén aos voceiros dos grupos municipais, tanto do PP como do BNG, porque este é un proxecto para o pobo, non para ningún partido político”, rematou Moreda.

O CONCELLO DE CEDEIRA E O COLEXIO CEIP NICOLÁS DEL RÍO COLABORAN NUNHA NOVA CAMPAÑA SOBRE SEPARACIÓN DE RESIDUOS.

Para dar inicio á campaña de fomento de separación do aceite doméstico usado. O alcalde e a técnico de medioambiente visitaron e compartiron co alumnado de 5º e 6º curso do CEIP Nicolás del Río unhas xornadas de sensibilización sobre a necesidade da correcta xestión do aceite doméstico usado, nos fogares de Cedeira.

A rapazada do centro educativo ten claro que separar é cousa de todos e que, é fundamental evitar que o aceite usado chegue aos nosos ríos e mares, sen tratamento.

Explicouse aos escolares que o concello de Cedeira conta con 22 contedores para a recollida selectiva de aceite doméstico usado, para o súa posterior transformación en biocombustible ou para outros usos industriais, sen efectos nocivos para o medioambiente.

Na actividade desenvolvida, o alumnado do centro aprendeu que o aceite usado pode ter novas vidas (biocombustibles, bioplásticos, xabóns, impermeabilizantes, etc) e que mal xestionado pode ser un “gran inimigo” tanto do medioambiente como das tubaxes do saneamento.

Resaltouse a importancia de coñecer os riscos que conleva desfacerse do aceite en sitios non axeitados para o seu tratamento. Destacando que cada litro de aceite derramado pode contaminar máis de 1000L de agua e, ademais xerar graves problemáticas de obstrución das canalizacións e incrementando custes nos tratamentos depuradores.

Ademáis, entregóuselles un funil para facilitar a recollida selectiva deste residuo, no ámbito doméstico.

Rematouse cun chamamento a todos e todas as participantes para que separen correctamente os residuos domésticos, colaborando así na protección do medioambiente.

Nos próximos días, os propios alumnos e alumnas do centro exercerán de educadores ambientais, trasladándolle esta información ao resto do alumnado, colaborando así, de forma activa na campaña.

Dende o concello agradécese a todo o profesorado do centro, por participar destas xornadas e, pola súa predisposición a calquer tipo de colaboración ao longo do ano.

O AUDITORIO ACOLLE ESTE SÁBADO UN ESPECTÁCULO DE POMPAS DE XABÓN PARA O PÚBLICO FAMILIAR

Os Fabulosos Cleaners levarán este sábado ao escenario do Auditorio Municipal de Cedeira o seu orixinal e sorprendente espectáculo de pompas de xabón. A función, dirixida ao público familiar, comezará ás 20.00 horas e as persoas interesadas poden reservar as súas localidades con antelación –enviando antes do venres unha mensaxe por Whatsapp ao número 649 87 66 14- ou ben compralas en taquilla desde unha hora antes do comezo. O prezo é de 2,50€.

O actor Luis Beviá, que ten percorrido escenarios de todo o mundo co seu espectáculo de pompas de xabón, está detrás desta proposta, chea de sorpresas visuais. Dous operarios de limpeza do teatro, interpretados por Jouse García e Xoque Carbajal, descobren por casualidade a maxia que pode xurdir da combinación das súas ferramentas de traballo, a auga e o xabón.

Fantásticas burbullas transparentes, cheas de fume, de vapor, con diferentes cores, pequenas e grandes, estáticas e voadoras enchen o teatro neste espectáculo que combina a beleza efémera e máxica das pompas co humor.