Skip to content Skip to left sidebar Skip to footer

NOVAS

CEDEIRA INAUGURA A CAMPAÑA DE VELA DA DEPUTACIÓN DA CORUÑA NA QUE PARTICIPAN 240 NENOS E NENAS ESTE VERÁN

Cedeira inaugura estes días a primeira quenda da Campaña de Vela 2023 da Deputación da Coruña, na que participarán preto de 240 nenos e nenas de distintos municipios da provincia ao longo do verán. Os cursos, que se levan a cabo do 17 de xullo ao 25 de agosto en seis quendas, inclúen a iniciación nos conceptos teóricos de náutica e prácticas de navegación a vela.

O Concello de Cedeira puxo a disposición o Club de Remo Cedeira, no camiño da Arealonga, para impartir este primeiro ciclo dos cursos, que se leva a cabo desde o pasado luns ata este venres, 21 de xullo. Cinco días nos que 25 escolares de 9 a 17 anos poderán adquirir coñecementos básicos sobre a navegación neste tipo de embarcacións.

Con esta iniciativa búscase fomentar a práctica deportiva e o respecto polo medio mariño entre os máis pequenos.

Quendas

As cinco quendas restantes terán lugar en diferentes municipios. A segunda parada será Neda, do 24 ao 28 de xullo, e a terceira As Pontes, do 31 de xullo ao 4 de agosto. A penúltima parada será Corcubión, do 14 ao 18 de agosto, e a última Cerceda, do 21 ao 25 de agosto. Para estas quendas aínda están abertas as inscricións, ata o 2 e 9 de agosto respectivamente.

A Campaña de Vela foi posta en marcha un ano máis co obxectivo de fomentar a práctica dos deportes náuticos. Está dirixida a rapaces e rapazas da provincia nados entre o 1 de xaneiro de 2005 e o 31 de decembro de 2014.

Fonte: www.dacoruna.gal

ENLACE A NOTICIA Cedeira inaugura a Campaña de Vela da Deputación da Coruña na que participan 240 nenos e nenas este verán

OS CONCERTOS SERÁN OS PROTAGONISTAS DAS FESTAS NA HONRA DE SANTA ANA, OS VINDEIROS 25 E 26 DE XULLO

O Concello de Cedeira organiza unha serie de actividades coa música como protagonista. Os vindeiros 25 e 26 de xullo a vila celebra as Festas na Honra de Santa Ana.

A primeira actuación musical vén da man do dj Brunookavvi, que ofrecerá unha sesión ás 23.30 horas o martes 25 na Praza Roxa. Na mañá do día 26, ás 12 horas terá lugar unha misa cantada pola Coral Eixil de Cedeira e a tradicional procesión polo casco antigo acompañada pola Banda de música Vila de Cedeira, que ofrecerá ao rematar un concerto na Praza Roxa. Á noite, haberá unha verbena ás 22.30 horas na Praza Roxa coa Orquesta Finisterre.

Paralelamente, do 25 ao 28 de xullo, na praza da Revolta haberá tobogáns inchables xigantes, unha actividade gratuíta que estará aberta de 11.30 a 12 horas e de 16.30 a 20.00 horas (excepto o 25 que só será en horario de tarde).

Outros concertos

Esta noite, o grupo Amaltea ofrece un concerto no marco da súa segunda xira por Galicia, na que van a presentar temas que aparecerán nas súas próximas gravacións e algunhas cancións do seu primeiro álbum. Será no Auditorio Municipal (rúa María Mediadora, esquina rúa Convento) ás 21 horas. O prezo das entradas establécese mediante billeteira inversa, pois o espectador decide despois do espectáculo canto quere pagar polo que escoitou.

Mañá, sábado día 22, o Auditorio acolle o Festival de Verán Rondalla de Cedeira, ás 20 horas. Participarán a coral polifónica ferrolana, A Magdalena, a coral polifónica Costumes de Bergondo e a Rondalla de Cedeira.

O CONCELLO OFRECE VISITAS GUIADAS GRATUÍTAS POLO CASTELO DA CONCEPCIÓN

O Concello de Cedeira ofrece visitas guiadas durante este mes de xullo e agosto para coñecer o Castelo da Concepción. Haberá dúas quendas diarias de luns a venres: unha ás 12 e outra ás 18 horas, e os sábados ás 12 horas. A actividade é gratuíta e non se necesita inscrición previa.

Con estas visitas o Concello pretende ofrecer a turistas e locais a oportunidade de coñecer en profundidade esta fortificación do século XVIII que foi construída polos veciños a raíz dun ataque da frota inglesa. A poucos metros de onde se atopa o Castelo da Concepción tamén pode visitarse o castro de Sarridal, que está en proceso de escavación, e que segundo os últimos achados, estivo habitado desde o século V a.C. ata o IV d.C

No centro de interpretación do castelo expóñense obxectos atopados durante as escavacións e unha mostra sobre a historia de Cedeira nos séculos XVIII e XIX. Entre as pezas do castro, destaca unha moeda romana co rostro de Vibia Sabina, muller do emperador Adriano, datada no I a.C.

As instalacións do castelo poden ser visitadas en xullo e agosto en horario de 10.30 a 14 horas e de 17 a 19 horas, de luns a venres. E os sábados de 10.30 a 14 horas.

Ademais, a oficina de Turismo (Palacete Municipal, avenida de Castelao s/n) adapta o seu horario á época estival. Está aberta de 9 a 14.30 horas e de 15 a 21 horas de luns a venres; de 9 a 14.30 horas e de 16.30 a 21 horas os sábados; e os domingos e festivos de 10.30 a 13 horas.

  • 20 Xullo, 2023 en NOVAS