NOVAS

O alcalde de Cedeira acusa de desleixo aos responsables de sanidade pola demora na ampliación do Centro de Saúde

O alcalde de Cedeira, Pablo Moreda Gil, calificou de “lamentable” o desleixo que están a mostrar os responsables de Sanidade da Xunta de Galicia con respecto á ampliación do centro de saúde da localidade.

O rexedor municipal explicou que leva medio ano esperando que o titular da Consellería, Jesús Vázquez Almuiña, poña data á reunión solicitada polo Concello para avanzar na realización dun proxecto que “resulta prioritario” e para o que o Concello xa “fixo os deberes” coa compra da propiedade coa que se poderá incrementar ata un 40% a actual capacidade do actual centro médico. A adquisición supuxo un desembolso superior aos 60.000 euros.

Moreda Gil, que destacou o elevado número de chamadas que se están a producir desde o Concello para concretar a reunión, considerou que a ausencia de resposta por parte Sanidade obedece “á falta de compromiso e seriedade” dos seus responsables, aos que lles recorda que existe un acordo do Parlamento de Galicia polo que se instaba á Xunta a dialogar co concello de Cedeira sobre os servizos de asistencia sanitaria dispoñibles no municipio e sobre a posibilidade de chegar a acordos para a mellora do centro de saúde e a súa ampliación, que “se debe cumprir”. Apuntou, ao fío do mesmo tema, que existe xa un anteproxecto e unha moi boa sintonía co xerente de Xestión Integrada de Ferrol, Ángel Facio Villanueva, para a realización dunha obra que virá a satisfacer as necesidades que, en materia de sanidade, agora existen no municipio e que foron denunciadas pola veciñanza coa celebración de concentracións diante do centro de saúde. Entre outros problemas, o equipo de goberno apuntou no seu día deficiencias estruturais no servizo de urxencias (PAC), a falla dunha sala acondionada para cirurxía menor, a necesidade de reubicar a área de pediatría e mesmo a de mellorar a accesibilidade á zona de consultas. O rexidor de Cedeira tamén recordou que na actualidade o municipio carece de consulta pediátrica propia, polo que “unha vez a semana ten que vir o de Valdoviño a pasar consulta”.

O alcalde urxe aos responsables de Sanidade a atopar a data na que se poda celebrar a reunión solicitada e a traballar de maneira conxunta para poder ofrecer mellores prestacións sanitarias á veciñanza e mesmo aos visitantes e turistas ocasionais.

A Biblioteca Municipal López Cortón xa loce un aspecto máis rexuvenecido

O goberno de Cedeira acaba de dar por finalizada a obra de pintado exterior da biblioteca municipal López Cortón, un edificio que xa fora sometido a unha profunda renovación no seu interior e que forma parte do conxunto arquitectónico do casco vello. Desde o executivo local destácase o seu interese en contribuír á posta en valor do núcleo urbano da vila e, neste sentido, recórdase que cara ao 2020 está prevista a execución do proxecto que transformará o pazo de Moscoso nun novo edificio de carácter municipal e de servizos.

A obra agora executada pola empresa Agustín González Carro na biblioteca consistiu no pintado exterior dunha edificación cuxos orixes se remontan ao século XVIII e que durante anos tamén foi sede consistorial do municipio. Cun orzamento superior aos 6.600 euros, o traballo realizado deu lugar ao lavado e saneado de todas as paredes exteriores do inmoble, que posteriormente recibiron dúas mans de imprimación e un total de tres de pintura impermeabilizante. A intervención mellora considerablemente o aspecto exterior da construción e evita posibles problemas de humidade. Segundo o alcalde, Pablo Moreda Gil, “o Concello tamén debe velar pola conservación dos edificios municipais e pola posta en valor da riqueza local”.

O goberno municipal apostou por manter os colores branco e amarelo tan característicos da edificación, así como a faciana e os versos de Rosalía de Castro que desde hai un ano figuran na fachada posterior e principal do edificio, situado entre a praza da Rectoral e a travesía do Cristo.

Cedeira recupera para a memoria colectiva os nomes e valores dos trece veciños asasinados no 36

A corporación municipal de Cedeira convoca a veciñanza a participar no acto de desagravio contra a ignominia da sentenza pola que o 18 de decembro de 1936 morrían asasinados trece veciños do municipio, na súa maioría membros da corporación municipal, no castelo de San Felipe de Ferrol.

A convocatoria, que será ás doce deste domingo, dará lugar á inauguración dun panel explicativo e ao bautizo como praza do 18 de Decembro da que antes era coñecida como “dos Cabalos”.

O alcalde, Pablo Moreda Gil, presidirá un acto que se celebra de acordo a unha iniciativa da sección local da Asociación da Memoria histórica Democrática aprobada por unimidade da corporación na sesión plenaria celebrada o pasado mes de novembro. Moreda Gil sinalou que “para min é un orgullo representar a toda a corporación nun acto no que se recoñecerá a grandeza dunha xente humilde que loitou e defendeu ata coa súa propia vida a democracia”.

En base a devandita decisión colocarase un panel explicativo no que figurará, ademais dunha fotografía do Concello cedeirense do ano 1936, os nomes e profesións dos asasinados, incluído o do veciño de Cabanas que compartiu o mesmo destino que os cedeirenses.

A partir de agora todas aquelas persoas que pasen por esta céntrica praza da vila de Cedeira poderán ler o seguinte texto: “Os militares rebeldes, que se levantaron en armas contra a España democrática en xullo de 1936, condénanvos a morte e execútanvos no castelo de San Felipe por rebelión militar. Xunta vós, tamén sería asasinado Antonio Ameneiro Brage, veciño de Cabanas. A ignominia da sentenza, que intentaba xustificar o criminal fusilamento de xente de paz, viría acrecentar, se iso fose posible, o horror do delirante fanatismo dos golpistas”.

Os veciños axecutados foron Manuel Fernández Freijeiro, militar retirado e alcalde de Cedeira no ano 1936; José Cipriano Durán Fraguela, labrador e segundo tenente de alcalde; José Lago Beceiro, labrador e concelleiro; Miguel Fernández Santos, funcionario de Correos; Isaac Forneiro Varandela, mestre e empregado de banca; Enrique Martínez Teijeiro, condutor de autobús; Francisco Rodríguez, barbeiro e músico; Ginés Fernández Rodríguez, estudante, e Antonio Iglesias Freire e Adolfo Bouzón Teijeiro, mariñeiros.