Skip to content Skip to left sidebar Skip to footer

NOVAS

O Concello instala unha estrutura elevada para resgardar aos nenos/as das inclemencias do tempo

O CEIP Nicolás del Río está a estrear unha nova estrutura que resgarda aos escolares das inclemencias meteorolóxicas. Trátase dunha construción elevada, a base de chapas prelacadas e translúcidas, que situada no corredor de acceso ao centro converte a esta zona nun patio cuberto máis para que os nenos e nenas de Infantil poidan gozar do recreo ata en días de choiva ou estean resgardados tanto a saída como a entrada da xornada escolar. A superficie cuberta é aproximadamente duns 15 metros de largo.

A obra, que foi executada por Talleres Metálicos Luciano, supuxo un investimento de 11.620,84 euros (IVE Incluído) e estaba contemplada, a petición do colexio, dentro das melloras que o Concello de Cedeira realiza cada ano no centro. Neste sentido, o alcalde, Pablo Moreda Gil, destacou a boa relación que existe entre a dirección do Nicolás del Río, a ANPA Picapeixe e o executivo local, xa que “todos estamos a buscar o mellor para os pequenos/as”. Adiantou así mesmo que xa se están a planificar as actuacións que se levarán a cabo ao longo do curso 2019-2020 para seguir buscando o benestar dos alumnos e a actualización das instalacións escolares.

A matrícula actual do centro está en 407 alumnos/as con idades comprendidas entre os tres e doce anos.

A corporación de Cedeira apoia a petición dos traballadores de Navantia dun novo AAOR para garantir emprego desde xullo deste ano ata o inicio das f-110, previsto para xaneiro de 2022

A corporación de Cedeira apoia as reivindicacións dos traballadores de Navantia, no que se refire á solicitude de carga de traballo, iniciando hoxe unha recollida de firmas en todo o termo municipal. Desde o Concello, invítase a veciñanza a implicarse na iniciativa asinando as follas que se poden atopar, desde hoxe e ata o día 14, nos comercios, establecementos, locais sociais e negocios da vila.

Todos os grupos municipais súmase así ás demandas dos traballadores, que pasan principalmente pola construción dun novo AAOR para a Armada Española a fin de garantir emprego para 32 meses suplindo deste xeito o período de inactividade previsto para o centro de Ferrol.

Os traballadores apuntan que a realización do AAOR podería comezar de inmediato, pois a enxeñería xa está feita, e daría así mesmo continuidade aos traballos de aceiro, así como ao resto de profesións que ao ir rematando os traballos dun buque poderían ter continuidade no seguinte. No escrito faise constar que “nos estaleiros da Ría de Ferrol (Fene e Ferrol) xeran ao redor de 2.000 empregos directos, 10.500 de carácter indirectos, o que en si mesmo supón o 22% da contribución do emprego industrial da provincia, achegando o 24% do PIB da Coruña”.

Ademais considérase que “as dúas factorías son un polo de atracción de numerosas empresas auxiliares que desenvolven a súa actividade industrial, complementando os labores principais do estaleiro, colaborando a alcanzar os seus obxectivos de futuro e ofrecendo emprego a gran cantidade de traballadores e traballadoras” e apúntase así mesmo que, “debido a escasa diversificación da comarca de Ferrol, Navantia segue xogando un papel primordial á hora de xerar riqueza, emprego e benestar social, do que se benefician tódolos sectores: comercial, industrial, servizos, e, e en definitiva, toda a economía da zona”.

En relación ao contrato das F-110, no comunicado explícase que “dotará de carga de traballo aos nosos estaleiros a medio prazo, pero aínda non permite solucionar o baleiro da carga de traballo que imos sufrir en Navantia e na comarca de Ferrol no curto prazo (anos 2020/2021) como consecuencia do seu atraso”.

Para rematar os traballadores apuntan que “hoxe temos en nova construción dous buques da clase AAOR, onde se atopan traballando arredor de 1.300 operarios da industria auxiliar máis o persoal propio de Navantia e señálase que “a finais de xaneiro de 2020 prevese a entrega do primeiro, e en xullo, tamén de 2020, a do segundo buque da serie, polo que desde xullo de 2020 ata xaneiro de 2022 (data de inicio das F-110) non haberá actividade dentro do estaleiro”.

  • 8 Xaneiro, 2020 en NOVAS

A Cabalgata de Reis de Cedeira sairá ás 18.00 horas do colexio Nicolás del Río

O Concello de Cedeira organiza a Cabalgata de Reis que sairá o día 5 ás 18.00 horas do CEIP Nicolás del Río e que, nesta ocasión, percorrerá a localidade co acompañamento musical da banda de Buxainas.

A continuación, as Súas Maxestades de Oriente deixaranse ver polo Camiño Real da Madalena, pola rúa San Sadurniño, a avenida de Castelao, a praza de Galicia, a Ponte Vella, a rúa Ezequiel López, a praza do Peixe, a Ponte Nova, rúa Ponte Nova-praza de Galicia e de novo a avenida Castelao. A recepción dos Reis Magos terá lugar no Palacete municipal, onde recibirán aos nenos e nenas do municipio e escoitarán as súas peticións.

O programa rematará no pavillón do devandito centro escolar, no que haberá inchables para pásalo ben e roscón de reis e chocolate quente para facer máis doce a espera do Día de Reis.

O Concello contou coa colaboración da ANPA Picapeixe, da asociación Amas de Casa, da entidade cultural As Aturuxeiras, Protección Civil, Gadis, Eroski, La Caixa e Muebles García para a organización dun desfile que fará as ledicias dos máis pequenos e tamén, e por que non, dos maiores.