Skip to content Skip to left sidebar Skip to footer

NOVAS

O Concello de Cedeira estará presente no pacto dos alcaldes para o clima e a enerxía

O pleno de Cedeira acaba de aprobar por unanimidade a adhesión do Concello de Cedeira ao Pacto dos Alcaldes para o Clima e a Enerxía (Covenant of Mayors Climate&Energy), polo que a administración local se compromete a mellorar a eficiencia enerxética, a reducir as emisións de CO2 e a aumentar a resiliencia fronte ao cambio climático.

Na actualidade, o 10% do consumo eléctrico do Concello de Cedeira ten a súa orixe nas enerxías renovables e entre os obxectivos nesta materia do executivo local está estender a medida á totalidade de iluminación pública antes de que remate o próximo ano.

O alcalde, Pablo Moreda Gil, que participou nunha reunión do Pacto dos Alcaldes, destacou o traballo que desde o Concello se leva realizado nos últimos anos no sentido de reducir consumo e contaminación e apostar pola eficiencia e respecto polo medio ambiente, ademais de engadir que “o cambio climático é responsabilidade de todos, comezando polas administracións”.

Esta política, segundo o rexedor municipal, tamén dará lugar á adhesión do Concello á Central de Contratación da Federación de Municipios e Provincias para garantir que toda a enerxía eléctrica que se compre proceda de renovables.

A participación de Cedeira no Pacto de Alcaldes obriga a administración local a redactar, no prazo de dous anos, un plan de acción para facer un seguimento das medidas adoptadas e avaliar os riscos e vulnerabilidades ante o cambio climático.

O Pacto dos Alcaldes para o Clima e a Enerxía consiste no compromiso dos concellos en faceren propios os obxectivos da Unión Europea para o ano 2030 e reduciren as emisións de CO2 no seu territorio en, polo menos, o 40% a través de eficiencia enerxética e dun maior uso de fontes de enerxías renovables.

Aprobación da convocatoria e bases do concurso de disfraces entroido 2020

Para fomentar a participación e manter a tradición do entroido, o Concello de Cedeira organiza o “Desfile de Entroido 2020” o sábado 22 de febreiro de 2020 e convoca á veciñanza a participar nel e no tradicional concurso de disfraces.

Pode consultar as bases do concurso na apartado da web de concursos culturais e deportivos dispoñible na seguinte ligazón:

IR Á LIGAZÓN Concursos culturais e deportivos

O pleno de Cedeira insta á Xunta a restaurar o servizo de pediatría que agora comparte con Valdoviño

O pleno de Cedeira aprobou por unanimidade unha moción do equipo de goberno pola que se insta á Xunta de Galicia a restaurar “ao cen por cen” o servizo de pediatría no centro de saúde da localidade, por considerar que “é urxente” acabar coa situación de precariedade que obriga á facultativa de Valdoviño a desprazarse tres días da semana a Cedeira para pasar consulta. Esta circunstancia tradúcese, segundo o executivo, nunha perda de calidade do servizo.

A presentación desta iniciativa coincide co inicio dunha campaña de recollida de sinaturas impulsada polos pais e nais e apoiada desde o Concello. De feito, o goberno está a colaborar poñendo a disposición da veciñanza follas de adhesión en todos os edificios públicos.

O alcalde, Pablo Moreda Gil, considera que a situación que se está a dar en Cedeira non é propia destes tempos e evidencia así mesmo unha falta de respecto, por parte da Xunta de Galicia, a Cedeira e ao conxunto dos usuarios da sanidade pública. Rexeita como unha posible alternativa acudir ás consultas privadas, “porque nós apostamos pola sanidade pública”, e demanda da administración autonómica que se cubra a praza de pediatra e que ademais sexan atendidas outras necesidades tanto de espazo como de servizos que existen no centro de saúde local.

Segundo explica o texto da propia moción, a súa presentación obedece ao feito de compartir desde setembro os servizos de pediatría, responde tanto á nula vontade do Goberno galego á hora de reclamar máis prazas da devandita especialidade médica, como a unha política laboral e de contratación deficiente, que castiga aos profesionais do sector e que favorece a fuga dos pediatras galegos a outras comunidades autónomas.

Na iniciativa aprobada pola corporación cedeirense solicítase así mesmo o retraso da idade de xubilación dos pediatras, desenvolver un plan de contratación de profesionais de pediatría en atención primaria e acordar co Goberno central a axilización dos procesos de acreditación de prazas de novo ingreso nesta formación especializada, así como dotar dos recursos necesarios aos centros sanitarios para que exista a mellor cobertura posible en todo o proceso formativo.