Skip to content Skip to left sidebar Skip to footer

NOVAS

A Xunta publica no DOG a aprobación do proxecto de mellora da estrada AC-566

A Axencia Galega de Infraestruturas da Xunta publicou onte no DOG a resolución pola que se aproba o expediente de información pública e o proxecto de construción e acondicionamento da estrada de Cedeira (AC-566) ao seu paso polo termo municipal de Valdoviño.

O orzamento estimado da intervención é de 4,6 millóns de euros dentro dos que se inclúen as expropiacións de 126 parcelas. As estimacións da Xunta prevén o levantamento de actas previas á licitación dos traballos no segundo trimestre do ano.

En total acondicionaranse catro quilómetros de vial. A intervención iníciase no punto quilométrico 13+100, unha vez superado o núcleo de Valdoviño, e ao longo dos dous primeiros quilómetros prevese realizar unha mellora do trazado existente. Para iso, incrementarase a plataforma coa inclusión de carrís adicionais para adiantamento entre os puntos quilométricos 0+100 e 0+810 en sentido directo e do 1+150 ao 1+625, en sentido inverso.

No tramo entre os puntos 1+919 e 2+535 mantense o trazado existente e rectificarase a curva existente á beira da canteira. As obras continuarán entre os 2+535 e 3+635, onde se volverán a rectificar as curvas existentes coa ampliación de radios a un valor mínimo de 130 metros. Tamén se engadirá un carril adicional en sentido inverso entre os quilómetros 2+900 e 3+600.

A continuación, ata o punto quilométrico 3+970 manterase o trazado actual, xa que nesta zona existen numerosas edificacións en ambas as marxes do tramo, segundo sinalan desde a Xunta.

Desta forma a actuación proxectada permitirá a ampliación do ancho e reforzo do firme en 2,11 quilómetros e a rectificación de curvas e o incremento dun terceiro carril en 1,86 quilómetros da vía.

Fonte : Diario de Ferrol

Enlace a noticia: https://www.diariodeferrol.com/articulo/comarcas/xunta-publica-dog-aprobacion-proyecto-mejora-carretera-ac-566/20200303223101276116.html

Enlace o DOG: https://www.xunta.gal/dog/Publicados/2020/20200303/AnuncioG0181-210220-0002_gl.html

O Concello impulsa unha campaña para sensibilizar sobre o correcto uso da rede de sumidoiros

O Concello de Cedeira inicia unha campaña de información pública para sensibilizar á veciñanza sobre a importancia que ten para a calidade ambiental da ría o uso responsable da rede de sumidoiros. “A ría de Cedeira comeza nos sumidoiros” é o lema dunha iniciativa coa que se queren evitar xestos tan nocivos como verter a auga dos fregados, tirar cabichas e lixo no chan ou directamente no sumidoiro.

Neste sentido, desde o equipo de goberno recórdase que existe unha rede urbana para a recollida das augas pluviais que remata na desembocadura do río Condomiñas e mesmo na ría, o que fala “da importancia de adoptar condutas respectuosas con noso entorno”. Tamén se insiste no feito de apostar por verter cada residuo no colector axeitado, usar as papeleiras e baleirar a auga socia no inodoro para garantir un correcto tratamento e eliminación de cada refugallo.

A campaña deu comezo con charlas informativas no CEIP Nicolás del Río, entre escolares de 4º, 5º e 6º curso de Primaria. Baixo o título “Onde vai a auga que usamos?” os rapaces e rapazas descubriron como afecta o seu comportamento na casa o no funcionamento da rede de saneamento.

A iniciativa dará lugar así mesmo á sinalización dos sumidoiros para lembrar aos transeúntes que nese punto comeza o mar. Así, cun pequeno xesto de colaboración cidadá contribuirase a manter limpa a nosa ría, aseguran desde o goberno local.

O Entroido en Cedeira levará a festa ás rúas cun programa de actividades organizado polo Concello

Cedeira prepárase para celebrar o Entroido co programa de actividades organizado polo Concello que, segundo as previsións meteorolóxicas, vai vir acompañado de bo tempo.

Desde o equipo de goberno convídase á veciñanza a sumarse ás celebracións pero mantendo a moderación e o respecto para que sexan unhas festas divertidas e compartidas, sen incidentes e sen ocasionar danos en bens e propiedades públicas.

O calendario dará comezo hoxe sábado co desfile do Entroido, que sairá ás 17.00 da praza Roxa para rematar no pavillón polideportivo, donde terán lugar as actuacións e o acto de entrega dos premios do concurso, no que se repartirán 2.205 euros. Esta primeira xornada rematará cunha verbena amenizada pola orquestra Metrópolis, que será na praza Roxa e que dará comezo ás 23.30 horas.

A festa infantil será o luns 24 e terá lugar no pavillón polideportivo. A organización informa de que haberá inchables, animación e actividades para que as nenas e nenos gocen destas primeiras citas festivas do ano. O peche da xornada virá da man da orquestra Trovadores, que actuará a partir das 23.30 horas na praza Roxa.

As celebracións do Martes de Carnaval consistirán nunha batukada, ás 17.00 horas, a cargo do grupo da Asociación Cultural Discalz@s, e nunha feira de xogos na Praza Roxa. Esta última cita dará comezo ás 18.00 horas.

Co Enterro da Sardiña, previsto para a xornada do día 29, rematará a programación de Entroido. A despedida do defunto dará comezo ás 19.00 horas na praza da Marieta e rematará no auditorio municipal coa lectura de coplas.