NOVAS

Cedeira pide a colaboracion dos comerciantes para elaborar un plan estratéxico fronte á crise climática

O Concello de Cedeira chama á colaboración dos comerciantes da localidade a participar nunha campaña que dará como resultado a elaboración dun Plan de Acción para o Clima e a Enerxía Sostible (PACES). Trátase dun documento estratéxico para avanzar, desde a administración local, nos obxectivos da Unión Europea cara ao ano 2030 e reducir as emisións do CO2 no conxunto do municipio.

A adhesión do Concello, en febreiro de 2020, á iniciativa europea “Pacto das alcaldías para o Clima e a Enerxía” representa o compromiso do executivo local pola eficiencia enerxética, as fontes de enerxía renovables e por reducir as emisións contaminantes.

Trala declaración de Emerxencia Climática e Ambiental en España, o goberno municipal decidiu tamén desenvolver liñas de acción que fagan fronte á crise climática e aproveitar os beneficios sociais e económicos que ofrece a transición ecolóxica para mellorar a calidade de vida de veciños e veciñas.

Esta acción de goberno materializarase nos próximos días coa visita de persoal técnico de Energal Sl aos locais comerciais para coñecer o consumo enerxético coa fin de reducir o gasto eléctrico e deseñar a mellor estratexia posible. Só será necesario ter a man unha factura na que figure o consumo.

O alcalde, Pablo Diego Moreda Gil, adiantou que a intención do Concello tamén pasa por ampliar ao conxunto do municipio o uso de enerxía obtida a través de fontes renovables, unha política xa vixente nos edificios de titularidade municipal, e que, no seu momento, levou a Cedeira a acollerse á plataforma de contratación da FEMP para poder facelo.

O compromiso do executivo local co medio ambiente ponse así mesmo de manifesto tanto pola adhesión ao pacto polo clima como á política de substitución das lámpadas de Vapor de Sodio (WAPS) polas de tecnoloxías Led. Cabe recordar que tan só nas últimas semanas o goberno contratou proxectos que darán lugar á substitución de máis de 1.500 bombillas na zona rural e tamén urbana.

Cedeira busca fortalecer o comercio e a hostalería local cun plan de acción para súa dinamización

O goberno municipal impulsa un plan de dinamización do comercio e a hostalería da localidade para revitalizar dous dos sectores máis afectados pola pandemia da Covid- 19 e así tamén mellorar as súas perspectivas de futuro.

Esta acción de goberno levou ao executivo a contratar á empresa Goodlife Factory SL, que estará á fronte duns traballos que necesitan desde o contacto directo con empresas e consumidores ata o deseño de estratexias de mercado. Estas medidas axudarán a debuxar unha folla de ruta que incrementará a competitividade global do tecido comercial de Cedeira cara aos próximos tres anos. O contrato ascende a 18.000 euros (IVE incluído), sendo a empresa adxudicataria a de menor contía das tres que presentaron ofertas.

Porque, segundo o alcalde, Pablo Diego Moreda Gil, “o noso obxectivo, como goberno, é crear un sinal de identidade do que é Cedeira”. “En definitiva”, apuntou a rexedor, “non só queremos que o municipio sexa cabeceira de comarca a nivel turístico senón tamén da hostalaría e, por suposto, do comercio”. Para alcanzar estes propósitos, é necesario, segundo Moreda Gil, “elaborar un plan que axude a comercios e locais de hostalería a optimizar todos os seus recursos con innovación e melloras que veñan a incrementar a calidade dos servizos”. Para o equipo de goberno, dixo o alcalde, o plan de dinamización tamén se convertirá nunha referencia para fixar prioridades cara a futuros proxectos.

Xa para rematar, Pablo Diego Moreda Gil, destacou a importancia que ámbolos dous sectores teñen para a economía local e considerou necesario investir para coñecer cal é a súa situación actual e, a partir desa realidade, idear medidas que contribúan a fortalecer o seu futuro.

Cedeira ordena os accesos ao areal da madalena para evitar posibles contaxios

O Concello de Cedeira está a organizar o fluxo de entrada e de saída de persoas da praia da Madalena para poñer freo aos riscos sanitarios fronte á Covid-19.

Hoxe mesmo daba comezo a obra de instalación de novas pasarelas de madeira que, situadas á altura da praza Roxa e na zona da Revolta, permitirán garantir a distancia entre persoas recomendada pola Consellería de Sanidade para evitar posibles contaxios. Deste xeito, cada acceso á praia terá unha prioridade de paso peonil, ben de entrada ou de saída.

O proxecto xurde, segundo o alcalde de Cedeira, Pablo Diego Moreda Gil, “da necesidade de adoptar estratexias destinadas a controlar a propagación do virus, especialmente nun municipio costeiro cunha alta demanda turística como é o noso, ademais de representar unha mellora significativa na accesibilidade do areal”. Moreda Gil reiterou así mesmo a prioridade que para o executivo local representa a realización de obras que axuden a mellorar a mobilidade das persoas.

En cuestión de días, na contorna da Praza Roxa comezará a funcionar unha estrutura dobre de madeira, en forma de “U”, que permitirá ordenar o circuíto de entrada e saída desde o paseo marítimo. Esta vía será prioritaria para persoas con discapacidade, mobilidade reducida ou maiores, que forman parte dos grupos de risco fronte á Covid-19.

O segundo punto, paralelo ao Rego da Veiga desde a zona coñecida como A Revolta, contará cunha nova pasarela que prolonga varios metros á xa existente e que será utilizada unicamente como vía de saída desde a franxa central do areal.

A intervención completarase coa instalación de carteis informativos para axudar á adaptación da veciñanza e mesmo dos visitantes a estas novas medidas organizativas. Os carteis colocaranse en distintos puntos de accesos á praia.

O Concello de Cedeira contou coa colaboración económica de Vicepresidencia e da Consellería de Presidencia, Administracións Públicas e Xustiza da Xunta de Galicia para a realización dunha obra, cuxo importe superou os 13.800 euros. O convenio firmouse esta mesma semana.