NOVAS

O Concello de Cedeira vén de adxudicar o contrato das obras de reforma e conservación do antigo escolar de Santalla polo orzamento de saída, 144.901,04€ (IVE incluído), á oferta mellor valorada entre as tres que concurriron ao proceso de licitación. A actuación vai dotar á localidade dun albergue para grupos, un recurso moi importante cara ao relanzamento do turismo activo que se prevé na zona como consecuencia do recoñecemento do Xeoparque Cabo Ortegal, e que tamén será un apoio para as actividades promovidas polo tecido asociativo do municipio.

O antigo escolar de Corredoira, na parroquia de Cervo, é un inmoble con 348 metros cadrados construídos, nunha parcela de 821 metros cadrados, que está situado ao pé da estrada provincial DP-2204. Durante moitos anos foi empregado como lugar para a celebración de campamentos por parte da Organización Juvenil Española (OJE), á que o Concello lle cedera o seu uso. En orixe foi unha escola unitaria, levantada no ano 1962. Entre 1995 e 2003 o Concello executou obras de ampliación e mellora do inmoble e en 2013 formalizouse a cesión á OJE. No ano 2020 o pleno da corporación acordou recuperar o uso deste edificio de titularidade municipal.

O inmoble presenta problemas de humidade, eivas no pavimento e outros problemas derivados da falta de mantemento. As obras que se van executar agora abranguen a rehabilitación da cuberta e as fachadas, así como a reforma dos vestiarios. Mellorará tamén a accesibilidade e o illamento do edificio.

A actuación terá un prazo de execución de seis meses e o Concello de Cedeira as vai acometer con cargo aos fondos do POS+Adicional 2/2023 da Deputación da Coruña. Unha das liñas de actuación principais do plan do Xeoparque Cabo Ortegal é a transición verde e, dentro deste marco, a mellora e promoción das rutas de sendeirismo. O santuario de Santo André de Teixido é un destino icónico dentro do territorio e impulsalo é un obxectivo prioritario, no que contar co albergue de Santalla será importante. Tamén ten previsto o Concello que este recurso estea ao servizo das asociacións do municipio, que terán alí un espazo no que aloxar a grupos cando promovan as súas actividades.

Cedeira é, xunto cos de Melide e Vimianzo, un dos tres concellos da provincia que participarán na experiencia piloto que pon en marcha a Asociación Española contra o Cancro (AECC) baixo o nome de Clubs de Saúde”. Trátase dunha iniciativa de intervención sociocomunitaria deseñada especificamente para as contornas máis rurais, coa idea de impulsar a saúde integral de persoas afectadas por algunha enfermidade ou que atravesen situacións que interfiren na súa esfera máis íntima ou social.

O alcalde de Cedeira, Pablo Diego Moreda Gil, participou na presentación do proxecto, xunto coa responsable de Coordinación Territorial da AECC, Rocío García da Barga; o xerente da área sanitaria da Coruña e Cee, Luis Verde; e os representantes dos outros dous municipios que estrearán os Clubs de Saúde: Mónica Rodríguez, alcaldesa de Vimianzo, e José Manuel Pérez, alcalde de Melide.

“Na AECC levamos catro anos loitando para que todos os enfermos, vivan onde vivan, teñan igualdade de oportunidades no acceso ao apoio que necesitan, á parte do sanitario”, considerou o presidente da Xunta Provincial da AECC na Coruña. “O cancro provoca outras moitas necesidades, en ámbitos como o laboral, o social ou o afectivo, e aí é onde podemos acompañar aos pacientes en todo o traxecto da enfermidade”, dixo.

Rocío García da Barga, responsable de Coordinación Territorial da AECC, explicou que “os Clubs estarán integrados por 15-20 participantes, que chegarán a nós de tres maneiras: a través dos centros de Atención Primaria, a través dos nosos voluntarios e das nosas xuntas locais e a través dunhas novas persoas voluntarias que se incorporan á asociación para sumar a este proxecto. “Calquera persoa que estea interesada en participar pode chamar ao 900 100 036, o teléfono de Infocáncer, para pedir información sobre este proxecto ou sobre calquera cuestión que precise aclarar acerca da enfermidade, sobre a asociación, etc.”.

Os Clubs de Saúde comenzarán a traballar en xuño. O 20 de xuño reunirase por primeira vez o de Cedeira, que semanalmente celebrará sesións dirixidas por profesionais sobre tres ámbitos: a saúde física, a saúde emocional e a saúde social. “E, sobre todo, fortaleceremos ese tecido social tan característico que existe no rural para reforzalo, e para que todas esas persoas que formen parte do Club, unha vez acaba a actividade, sigan tendo esa rede de apoio para todo o que necesitan”, resaltou.

O Concello de Cedeira acaba de resolver a adxudicación da obra de reforma e adecuación da EDAR de San Román, licitación á que concurriron tres empresas. O contrato establécese por 57.656,50€ (IVE incluído) e o prazo de execución é de tres meses. A estación depuradora construiuse no ano 2011 e comezou a funcionar de maneira precaria, de maneira que as obras que se van acometer agora son as precisas e esenciais para subsanar as súas deficiencias técnicas e alcanzar o rendemento de depuración para o que foi deseñada.

O Concello de Cedeira afronta a actuación con financiación do POS+2023 da Deputación da Coruña. Entre outras tarefas, o proxecto abrangue a substitución de pezas oxidadas por outras novas de aceiro inoxidable, a limpeza de pozos, o cambio de bombas, a adecuación da maquinaria para que no futuro se poidan realizar os ciclos de mantemento sen parar a instalación, a posta en marcha dun sistema de control e alarmas, un novo cadro eléctrico…

A EDAR de San Román foi deseñada para depurar un caudal diario de ata 150 metros cúbicos, dando servizo a unha poboación de 500 habitantes.