NOVAS

CEDEIRA IMPULSA UNHA NOVA CAMPAÑA ARQUEOLÓXICA, A TERCERIA DO PRESENTE ANO, NO CASTRO SARRIDAL

O Concello de Cedeira impulsa unha nova campaña arqueolóxica no xacemento do Castro Sarridal. É a terceira deste ano despois, das dúas anteriores de escavación e consolidación, e servirá, segundo explicou o director dos traballos, Emilio Ramil de AXA Arqueoloxía, para completar o coñecemento dos restos parciais que se descubriron na anterior e que puxeron de manifesto a existencia dun templo tardoantigo de planta basilical.

A realización desta nova campaña é posible grazas á financiación que conseguiu o Concello dun programa de subvencións da Xunta de Galicia para a mellora das infraestruturas turísticas. Así, dentro deste ano 2021 realizouse xa unha primeira quenda de escavación, financiada polo Concello con 14.399€ (IVE incluído), á que seguiu outra de consolidación dos restos descubertos, que sufragou a Dirección Xeral de Patrimonio.

Agora, dada a dispoñibilidade dunha axuda por un importe similar ao da primeira campaña, lánzase un novo programa de 22 días de traballos arqueolóxicos nos que se vai sacar á luz toda a planta do devandito templo e facer, ao mesmo tempo, a consolidación da zona para que os restos queden protexidos cara ó inverno.

Segundo explicou Ramil, os restos e materiais descubertos do antigo templo confirman a súa datación en torno a finais do século IV e comezos do V d.C., o que confirma que a zona de Sarridal estivo habitada durante oito séculos, desde o século III a.C., cando se datou a pedra formosa, ata o final da época romana e a chegada dos visigodos e a cristianización.

CEDEIRA ABRE ESTE SÁBADO A NOVA PROGRAMACIÓN CULTURAL DO AUDITORIO CO CONCERTO DE LISBOA

O Concello de Cedeira abre este sábado a nova programación cultural do Auditorio Municipal para este trimestre co Concerto de Lisboa a cargo de Gonçalo Guerreiro. A fin de semana chega tamén cunha proposta para nenos e nenas. Baixo o título Sabios, xogos e xograres, a praza do Floreal acollerá un obradoiro de xogos medievais co que se lembrará o oitavo centenario do nacemento de Afonso X o Sabio.

Gonçalo Guerreiro é un artista polifacético nacido en Lisboa e residente en Galicia. Froito desa viaxe xorde esta proposta musical, moi acaída para unha vila que ten benquerenza pola música portuguesa. En Concerto de Lisboa, Guerreiro presenta un repertorio de temas en portugués a partir de poemas de Fernando Pessoa, no que viaxa do humor á morriña, do rock á canción de amor, ou do pop ao jazz, pasando por suposto polo fado. O espectáculo será gratuíto, ás 20.00 horas no Auditorio Municipal.

Pola súa banda, a actividade para o público familiar está programado para o domingo pola mañá, a partir das 12.00 horas na praza do Floreal. Sabios, xogos e xograres é unha actividade artellada no marco do programa FalaRedes de dinamización lingüística, cuxo obxectivo é ampliar o abano de actividades de lecer que se desenvolven empregando a lingua galega. Neste caso, a actividade parte do recordo de Afonso X, o rei sabio que escribiu as Cantigas de Santa María, para aprender aos nenos e nenas asistentes diferentes xogos medievais e, a continuación, facer unha competición.

O CONCELLO DE CEDEIRA SOLICITA A REVERSIÓN DUNHA FRANXA DE 4.830M2 DE TERREOS DO DOMINIO PORTUARIO

O Concello de Cedeira ten solicitado recentemente a declaración de innecesariedade dunha franxa litoral de 4.830m2 que forma parte do dominio público portuario. Segundo explicou o alcalde, Pablo Diego Moreda Gil, a Fegamp e Portos estableceron hai uns meses a canle e os criterios polos que determinadas zonas poden pasar a mans dos concellos e na localidade están neste caso o tramo de paseo situado á dereita do último tramo do río Condomiñas, desde a praza da Marieta ata a Ponte Nova, e tamén os xardíns que seguen a liña de costa cara ao Camiño Area Longa.

Na propia DEUP (Delimitación de Usos de Espazos Portuarios) cualifícase dita franxa de terreo como de “uso non estritamente portuario”. Xunto con iso, e cumprindo cos criterios que Portos estableceu para a declaración de innecesariedade, trátase de zonas axardinadas, alonxadas da actividade portuaria e nas que non existe ningún título administrativo que regule a súa ocupación – como podería ser unha concesión-. De feito, tal como recordou o alcalde, o Concello xa se fai cargo de todos os traballos de mantemento desta zona, tanto en limpeza como iluminación, arranxo dos xardíns, etc.

O feito de que a zona dependa de Portos obriga a pagarlle as taxas a este organismo tanto por usos privados, como son as terrazas dos negocios de hostalería, como públicos, por exemplo a celebración dun mercadillo ou unha festa. Dado que o seu uso é totalmente civil e non afecta á actividade pesqueira ou portuaria en absoluto, incidiu o alcalde, “parece lóxico que estes terreos estean da man do Concello, a referencia más próxima do cidadán, e podamos facer uso deles como do resto da zona urbana”.