NOVAS

O PLENO DE CEDEIRA APROBA O ORZAMENTO MUNICIPAL DE 2023, CUN INCREMENTO DO 20% NOS INVESTIMENTOS

O pleno da corporación cedeiresa aprobou inicialmente onte en sesión plenaria o orzamento do Concello para este exercicio 2023. A administración local xestionará un presuposto de 6.402.747,11€, que representa un incremento do 1,33% respecto ao ano anterior, e do que o alcalde, Pablo Diego Moreda Gil destacou o aumento do capítulo de investimentos, nun 20%, así como o destinado ás subvencións para o tecido asociativo, ás que van este ano 285.300€. “Son unhas contas para seguir adiante de xeito equilibrado, cumprindo obrigas e mantendo o esforzo por coidar e mellorar o patrimonio municipal, así como dotar a vila de novas infraestruturas e servizos”, dixo Moreda.

O goberno local consignou 695.268,03€ para o capítulo de investimentos, 143.014,70€ máis que no pasado ano. Nel están os proxectos que se van desenvolver con financiación dos plans da Deputación da Coruña –que suman un total de 465.237,45€-, así coma outros que se van acometer con recursos propios. Entre estes últimos está o da pista de baloncesto do parque Floreal, unha actuación comprometida coa mocidade no marco dos Orzamentos Participativos. A renovación do ascensor do Auditorio, a iluminación das pistas de pádel ou o arranxo das columnas da Ponte Nova son algunhas das obras que están neste capítulo.

Aumenta neste exercicio, tal como comprometera o goberno local, a contía destinada a subvencións. Suman un total de 285.300€ dentro do capítulo de transferencias correntes –que ascende este ano ata os 430.532,23€, cunha suba do 15% respecto ao pasado-. Cómpre destacar o incremento de fondos das convocatorias, en réxime de concorrencia competitiva, para as asociacións do eido cultural e deportivo. Así, os 72.000€ que sumaban ambas as dúas convocatorias nos anos anteriores elévanse este ano ata os 120.000€, incrementando nun 33% os recursos para gastos correntes das entidades e nun 60% os de investimentos.

Neste mesmo capítulo das subvencións, increméntase tamén en preto dun 20% a da Escola de Música, en concorrencia competitiva, e crece un 11% a partida para o convenio nominativo con Protección Civil.

O proxecto económico do Concello de Cedeira préstalle un ano máis especial atención ao capítulo de Servizos Sociais, que está dotado neste exercicio 2023 con 1.298.000€. Tamén eleva o Concello a partida de persoal nun 3,37% para cumprir coa suba do 2,5% establecida para este ano nos orzamentos xerais do Estado, co correspondente incremento das cotizacións e co importe preciso para afrontar posibles substitucións por baixas temporais ou acumulacións de tarefas.

PREOCUPACIÓN NO GOBERNO LOCAL DE CEDEIRA POLA FALLA DE PROFESIONAIS SANITARIOS DO CENTRO DE SAÚDE

O alcalde de Cedeira, Pablo Diego Moreda Gil, vai solicitar unha reunión con Ángel Facio, o xerente da Área Sanitaria, na maior brevidade posible, para transmitirlle a preocupación do goberno local e da poboación de Cedeira pola falla de profesionais sanitarios no Centro de Saúde e a previsión de que, de non adoptar medidas, a situación podería agravarse.

Segundo explicou Moreda Gil, nestes momentos a pediatra do Centro de Saúde de Cedeira ten unha baixa especial por embarazo que lle apartou das consultas presenciais, aínda que segue a atender as consultas telefónicas desde a casa. É a pediatra do centro de Valdoviño quen ven tres días por semana, pero “o certo é que hai dous días nos que non hai atención presencial de pediatría, e queremos saber as previsións de Sanidade ao respecto”.

A situación agrávase porque unha das cinco prazas de médico que ten o Centro de Saúde de Cedeira está sen cubrir desde hai tres meses e porque queda aproximadamente un ano para a xubilación doutro dos facultativos. “Cómpre saber qué planificación ten Sanidade sobre o cadro médico para subsanar esta situación”, explicou o alcalde.

Moreda sinalou que a entrevista con Ángel Facio servirá tamén para expresar o descontento do goberno local polo máis de mes e medio que leva esperando por unha reunión co conselleiro de Sanidade, solicitada para seguir avanzando no proxecto de construír un novo Centro de Saúde. O alcalde recordou que o pleno da corporación acordou en outubro por unanimidade a cesión do terreo e destacou que o seu equipo actuou con dilixencia, despois de que se chegara ao acordo de construír un novo Centro de Saúde en lugar de ampliar o actual, tratando de acelerar os trámites o máximo posible.

“Este é un proxecto que a mesma Consellería de Sanidade situou na primeira fase do seu Plan Director, precisamente porque é urxente dotar canto antes á poboación dependente deste Centro de Saúde de mellores infraestruturas e máis servizos”, explicou o alcalde. “É preciso axilizar o proxecto do novo Centro de Saúde e, mestres tanto, garantir que os servizos existentes non sofren minguas”, dixo Moreda Gil.

COMEZA O PROCESO DOS ORZAMENTOS PARTICIPATIVOS, OS TERCEIROS CONFIADOS AO ALUMNADO DO PUNTA CANDIEIRA

O alumnado de 3º da ESO do instituto Punta Candieira embárcase neste mes de febreiro no proceso de preparación dos terceiros Orzamentos Participativos do Concello de Cedeira. Coa positiva experiencia das dúas edicións anteriores, o Concello ten planificado o traballo para que os rapaces e rapazas poidan levar a súa proposta diante do pleno da corporación o día 5 de maio, na mesma sesión na que está previsto aprobar a constitución do Consello Local de Infancia e Adolescencia.

Os Orzamentos Participativos son unha peza máis dunha aposta decidida do goberno local de Cedeira por dar voz e voto á mocidade e á infancia, na que tamén se insire o novo modelo de xestión do Centro de Ocio Xuvenil (COX) e o desenvolvemento do Plan de Infancia e Adolescencia. Segundo destacou Carmela Prieto, a concelleira de Participación e Xuventude, nos dous últimos anos foron aprobadas varios proxectos a través dos Orzamentos Participativos, aos que o Concello reserva 20.000€ do presuposto municipal en cada exercicio. Así, destes procesos saiu o parque de calistenia e un ciclo de autocine, así como unhas melloras no parque Floreal que xa están contratadas e pendientes de executar en breve.

O traballo para sacar adiante os terceiros Orzamentos Participativos comezou este mes con unha circular informativa para as familias do alumnado de 3º de ESO e as primeiras sesións cos propios mozos e mozas implicadas, sempre nas horas semanais reservadas a titorías. A experiencia comeza por coñecer o funcionamento interno do Concello, quen o compón, cales son as súas competencias e cales son os pasos para a toma de decisións. A continuación estúdase tamén o territorio, promovendo unha reflexión sobre as necesidades do municipio. Despois comeza a elaboración de propostas, fase na que o alumnado redacta os seus proxectos e debate sobre eles baixo pautas de solidariedade e equilibrio entre parroquias e colectivos, cunha visión de xénero.

No vindeiro mes de abril o persoal técnico municipal analizará as propostas do alumnado para verificar se entran dentro das competencias municipais e son viables económica e xuridicamente. Para cada unha das ideas, o persoal do Concello emitirá un informe no que detallarán se é ou non viable e as razóns, de maneira que o alumnado poderá aprender sobre custes reais, normativas aplicables, permisos necesarios, medios e recursos ou prazos que atinxen ao seu desenvolvemento. As propostas viables serán as que se sometan a votación entre o alumnado, nunha asemblea que se celebrará o día 27 de abril. Así, os mozos e mozas que sexan elixidos polo grupo encargarase de expor diante do pleno da corporación, o 5 de maio, as propostas seleccionadas para acadar o investimento e facerse realidade.