MOCIDADE

CEDEIRA CELEBRARÁ O DÍA 26 DE DECEMBRO UNHA NOVA EDICIÓN DA CARREIRA LÚDICA DE SAN SILVESTRE

O Concello colabora un ano máis co Club Natación Cedeira na organización da carreira de San Silvestre, unha proba de carácter lúdico e festivo que adoita ter unha alta participación de persoas de todas as idades. A actividade está programada para o vindeiro 26 de decembro, domingo, ás 20.30 horas, e desde as 19.00 horas poderán recollerse os dorsais no punto de saída, o Pavillón Municipal.

A definición como “carrera/andaina” que aparece no cartel desta San Silvestre destaca o seu carácter aberto e non competitivo. De feito, non é precisa a inscrición e tampouco ten clasificación. A cita deportiva, na que cada quen corre ou camiña ao seu ritmo, celebrouse por primeira vez no ano 2013 e desde aquela mantívose todos os anos excepto o pasado, pola pandemia, cunha alta participación.

Como en anteriores edicións, haberá un percorrido curto, de 3.240 metros, e outro longo, de 5.255 metros. No primeiro, o trazado vai pola rúa dos Deportes, Salinas, Camiño Real da Madalena, Santo Isidro, Camiño Real da Madalena, praza 18 de Decembro e avenida de España ata a meta, que estará no Pavillón Municipal. As persoas que opten polo percorrido longo, seguirán, ao chegar á praza 18 de Decembro, pola rúas Rosalía de Castro e Ortigueira, o Camiño da Acea, rúa Gaias da Area, avenida da Area, praza de Galicia e volverán pola avenida de España ata o pavillón.

O CONCELLO REPARTE AO ALUMNADO DO CEIP NICOLÁS DO RÍO UN CALENDARIO COA NOVA MARCA DE CEDEIRA

O Concello de Cedeira acaba de entregar ao CEIP Nicolás do Río 350 exemplares dun calendario de 2022 coa súa nova marca territorial, o peixe de Santo André de Teixido, asociada nos doce meses do ano a diferentes eidos da vida local, como son os deportes, o Entroido, o Samaín, a natureza, as festas e o Nadal. O alcalde, Pablo Diego Moreda Gil, explicou que os nenos e nenas do centro van levar para casa estes calendarios e con eles unha imaxe “que temos que facer nosa, como sinal de todo o que temos en común as xentes de Cedeira”.

Un pequeno texto, nunha das páxinas do calendario, explica a xénese da nova marca de Cedeira. Foi creada ao abeiro do desenvolvemento do proxecto Pescaturacción –con financiamento europea procedente do GALP A Mariña Ortegal- como un distintivo territorial que identifica a calidade do peixe e o marisco de Cedeira e a riqueza paisaxística, xeolóxica e territorial do municipio. É un elemento que o Concello quere impulsar como unha denominación de orixe de Cedeira, tanto para os produtos da pesca, o comercio ou a artesanía local, como para as actividades culturais, educativas e deportivas.

Moreda Gil desexou que a chegada dos calendarios aos fogares dos nenos e nenas do colexio Nicolás do Río contribúa a consolidar o peixe de Santo André como icona de Cedeira. A iniciativa do Concello de repartir un almanaque ao alumnado do centro inaugurouse o pasado ano cun que ía ilustrado por Leandro Lamas e facía referencia ao aforro de enerxía na vida cotiá para loitar contra o cambio climático.

A BANDA LOS ETERNOS PRESENTA ESTE SÁBADO NA SÚA VILA O SEU ÚLTIMO TRABALLO DISCOGRÁFICO SONORA

O Auditorio Municipal acollerá o sábado a actuación do grupo Los Eternos, unha banda de Cedeira que está a recoller excelentes críticas tras a presentación do seu terceiro traballo discográfico, Sonora, co que nos últimos meses viaxou por escenarios de dentro e fóra de Galicia. O reencontro co público da súa terra será ás 20.00 horas, con entrada libre ata completar aforo.

A música de Los Eternos ten a súa base no country americano, con influencias do folk e o pop. Triunfaron con esta fórmula no ano 2010, cando a Warner lles publicou o disco Back on the road, e despois estiveron varios anos retirados ata o lanzamento de Vientos Solitarios en 2018. Desde o pasado verán a banda está inmersa na presentación do novo traballo, Sonora, que a crítica especializada eloxiou pola súa calidade. Na súa actuación en Cedeira, Los Eternos compartirán escenario coa banda local P-Rayada, un grupo de rapaces do instituto de Cedeira, que xa levan tempo tocando e que no pasado verán estiveron no festival Discalz@s.

Por outra banda, estes días están a desenvolverse as Audicións de Nadal que ano tras ano organiza a Escola de Música Vila de Cedeira. Ao longo da semana, en diferentes actuacións, amosan o aprendido os alumnos e alumnas de clarinere, piano, gaita, saxofón, acordeón, guitarra, percusión e canto.