MOCIDADE

O DÍA 14 ÁBRESE O PRAZO PARA OFERTAR CURSOS RELACIONADOS COA ÁREA DE CULTURA

Coa finalidade de organizar dende a Concellería de Cultura a oferta formativa durante o primeiro semestre do ano, ábrese prazo no período comprendido entre os día 14 e 21 de xaneiro, ambos inclusive, mediante a publicación do presente anuncio na páxina web municipal, para que as persoas ou entidades interesadas en ofertar cursos relacionados coa área de Cultura a través do Concello ao longo do período febreiro/xuño de 2022 presenten as súas propostas no rexistro xeral do concello ou a través da sede electrónica.

Ditas propostas deberán indicar:

Nome do curso:
Breve curriculum da persoa que impartirá o curso:
Obxectivos: Destrezas que poderá adquirir o alumnado ao longo do curso.
Contidos: Temas a tratar.
Temporalización: Número de sesións totais e distribución temporal en sesións por semana e número de semanas.
Ratio: Nº de persoas por grupo. Nº de grupos aos que se pode atender.
Espazo: Descripción do espazo necesario para o desenvolvemento do curso.
Material necesario para a participación do curso, indicando se vai ser aportado polo profesorado ou o debe adquirir o alumnado.
Orzamento total.
Sinatura e dni do interesado.

Haberá un prazo de prematrícula para decidir os cursos que se van impartir no período comprendido entre febreiro e xuño (ambos incluídos)

As persoas que desexen matricularse deberán facelo nas oficinas municipais ou oficina de turismo e pagar as tasas municipais establecidas.

Os casos exentos de pago deberán presentar a documentación oportuna no momento da matrícula.

O Concello fará pública a listaxe de posibles cursos e unha vez realizadas as preinscricións fará públicos os cursos finalmente ofertados.

OS REIS MAGOS RECIBIRÁN O DÍA 5 AOS NENOS E NENAS DE CEDEIRA NO AUDITORIO MUNICIPAL

Os Reis Magos de Oriente enviaron estes días unha carta aos nenos e nenas de Cedeira comunicándolles a súa decisión de cambiar a tradicional cabalgata por un encontro, similar ao que xa se desenvolveu o ano pasado, para minimizar os riscos de contaxio do covid e atender igualmente as súas peticións. Melchor, Gaspar e Baltasar estarán o día 5 no Auditorio Municipal, a partir das 16.00 horas, recibindo e escoitando ás crianzas.

Desde o goberno local organizouse un sistema de cita previa para garantir que a recepción das Súas Maxestades se desenvolve sempre cun aforo reducido, en orde e sen colas. Así, é preciso enviar unha mensaxe por whatsapp aos números de teléfono 649 876 614 ou 673 223 392, ou ben un correo electrónico a enrique.vazquez@cedeira.gal ou carmela.prieto@cedeira.gal, indicando o nome do neno ou da nena que vai acudir e o seu ano de nacemento (se son varios irmáns xuntos, incluír o nome e o ano de nacemento de todos), así como o número de persoas adultas que irán como acompañantes. O Concello porase en contacto o día 4 pola tarde coas persoas inscritas para informar da hora na que serán recibidas polos Reis Magos.

Está previsto citar primeiro os nenos e nenas de menor idade (en caso de grupos de irmáns terase en conta ao máis pequeno ou pequena) e desde o goberno local pídese puntualidade.

Pista de xeo e xogos

Por outra banda, está a ter unha excelente acollida a carpa de xogos instalada polo Concello de Cedeira na praza Roxa. Tal como se informou recentemente, ata o vindeiro 9 de xaneiro funcionará a pista de xeo sintético de 200 metros cadrados, así como os inchables e os talleres de actividades para as familias. Esta oferta de ocio está a disposición da cidadanía todos os días –agás o festivo do 1 de xaneiro- entre as 11.00 e as 14.00 e de 16.30 a 20.30 horas. A pista de xeo conta con 150 pares de patíns, con números desde o 25 ao 47, para repartir entre as persoas que vaian patinar. E na zona de xogos hai un inchable para nenos e nenas a partir de tres anos e un tobogán de 8×3 metros polo que as crianzas poden deslizarse subidas a un trineo. Xunto con estas atraccións, gratuítas e abertas no devandito horario, todos os días desenvólvense talleres lúdicos e educativos para as familias entre as 18.00 e as 20.00 horas.

CARTA DOS REIS MAGOS ÁS NENAS E NENOS DE CEDEIRA

Queridas nenas e queridos nenos de Cedeira:
este ano contabamos con poder pasear polas rúas da vosa vila acompañándoos, mais as medidas sanitarias recoméndannos que non o fagamos, polo que organizamos co persoal do voso concello unha visita para poder vernos.
Acordamos que o día 5 de xaneiro estaremos no Auditorio Municipal de Cedeira desde as catro da tarde para que poidamos compartir un pouco do noso tempo con vós.
Para que nos poidamos ver necesitamos que unha persoa adulta se poña en contacto con nós a través de mensaxe, ben por whatsapp nos números 649876614 ou 673223392, ou por correo electrónico a enrique.vazquez@cedeira.gal ou carmela.prieto@cedeira.gal antes do día 4 de xaneiro, indicando:
– O teu nome
– O teu ano de nacimento
– O número de persoas adultas que virán contigo.
A través dese mesmo número, contestando a vosa mensaxe, poñeranse en contacto con vós o día 4 pola tarde para decirvos a hora na que teredes que vir ao auditorio. Se ides vir varios irmáns podedes poñelo na mesma mensaxe.
Xa acordamos coa organización que irán vindo primeiro as nenas e nenos máis noviños, e se vides varios irmáns xuntos, elexiremos a idade do menor de vós para asignar a hora.
Debemos ser moi puntuais, chegando a hora que nos indiquen, para evitar posibles retrasos que afectarían a todas as nenas e nenos que virían despois de nós, e tamén debemos entender que a hora non se pode cambiar, somos moitas persoas e debemos adaptarnos ao horario que nos indique a organización.
Tomar todas estas precaucións son a maior maneira de amosarvos o noso respecto e o noso cariño.

Estamos desexando vervos o día 5 de xaneiro.