MOCIDADE

PRIMEIRAS ACTIVIDADES DE SAMAÍN EN CEDEIRA DA MAN DA ANPA PICAPEIXE

As celebracións do Samaín xa están en marcha en Cedeira coas actividades que desde o pasado luns reúnen aos alumnos do colexio Nicolás del Río nos obradoiros e iniciativas organizadas polo ANPA Picapeixe.

Se onte o programa deu lugar á decoración de camisetas hoxe a actividade estará centrada na elaboración de chapas. Iso será ás cinco da tarde xa que despois, ás 18.30 horas, está prevista unha sesión de contacontos e a presentación do obradoiro “Como contar un conto”.

A programación proseguirá ao longo dos dous próximos días coa celebración de novos talleres de manualidades, a proxección de vídeos doutros samains anteriores e a presentación do libro “Catro contos de medo”. Este último acto terá lugar o xoves, a partir das oito da tarde na sala Áncora, local que tamén está a acoller as actividades organizadas pola ANPA Picapeixe.

NO SAMAÍN DESTE ANO HABERÁ OBRADOIROS PARA NENOS, PASARRÚAS DE CABAZAS POLA ZONA VELLA E CONCURSO DE CURTAS

O Samaín sinala a chegada do outono en Cedeira. A celebración deste programa, que se desenvolverá a próxima semana e que terá como datas máis polulares as xornadas do 27 e 28, invita a nenos e maiores, a veciños e visitantes a participar dunha tradición que, no caso da vila, foi recuperada pola Asociación de Amigos do Samaín hai agora case 30 anos.

A organización dos actos corre a cargo do Concello, que conta coa colaboración da ANPA Picapeixe nas actividades protagonizadas polos alumnos do colexio Nicolás del Río. Esta programación especificamente dirixida aos alumnos do centro dará comenzo o luns cun obradoiro de decoración de camisetas, que o martes será de chapas e o mércores e xoves de manualidades. Ademais, haberá sesións de contacontos e a presentación do libro “Catro contos de medo”, prevista para ás oito da tarde do próximo xoves. Durante eses días, a Sala Áncora abrirá as súas portas entre as cinco e oito da tarde para acoller todas estas citas.

Ademais, a partir de onte día 18, está aberto o prazo para participar no concurso de “Curtas Samaín”. A entrega do material pódese levar a cabo a través da Oficina de Turismo ou empregando a aplicación “wetransfer” ao correo amigosdesamain@gmail.com.

As celebracións entrarán, a partir do venres 27, nos dous días máis especiais deste calendario festivo. Nesta primeira xornada haberá obradoiros de colares de zonchos e de pintura para os máis pequenos, ás cinco da tarde, e a actuación de Paco Nogueira, a partir das sete.

Ao día seguinte, sábado, a festa continuará coa presentación de cabazas e melóns ao concurso, a celebración da tradicicional xincana (unha das probas será pasar pola casa das avisións), a “merendola do outono”, e o esperado pasarrúas de calabazas pola zona vella da vila cedeirense, a partir das 19.30 horas.

O acto de entrega de premios dará comezo ás oito da tarde, pero non será ata o día 1 de novembro cando se coñecerán os traballos presentados ao concurso de curtas. Esta última convocatoria terá lugar no auditorio, a partir das 19.30 horas. As demais, excepto as organizadas pola ANPA, celebraranse na carpa que o Concello instalará na zona portuaria.