Skip to content Skip to left sidebar Skip to footer

MOCIDADE

Cedeira despediu hoxe aos últimos participantes do campus de fútbol da RFEF

CEDEIRA DESPEDIU HOXE AOS ÚLTIMOS PARTICIPANTES DO CAMPUS DE FÚTBOL DA RFEF

O auditorio de Cedeira acolleu hoxe a clausura do Campus de Fútbol da Real Federación Española de Fútbol (RFEF). O alcalde, Pablo Moreda Gil, presidiu un acto que tamén contou coa presenza do representante da Federación Española de Fútbol Jesús Paredes e do xogador Nando, internacional en dúas ocasións coa selección absoluta e lateral esquerdo tanto no Valencia Club do Fútbol como no Deportivo da Coruña. Tamén foi adestrador do Somozas entre os anos 2009 e 2011.

Por segundo ano consecutivo a RFEF apostou pola vila de Cedeira como sede do Compus de Fútbol dirixido a mozos e mozas con idades comprendidas entre 8 e 17 anos de idade. A actividade se levou a cabo en dúas quendas, dando comezo o día 15 e finalizando na xornada de mañá día 28 de xullo. As instalacións tanto do campo de fútbol municipal como do pavillón polideportivo acolleron o programa de formación mentres que o colexio público Nicolás del Río foi o lugar de descanso duns rapaces que hoxe recolleron os seus diplomas nun acto no que tamén recibiron o cariño de profesores e do público en xeral.

A Xunta autoriza a reversión da estación de autobuses a prol do Concello de Cedeira

A XUNTA AUTORIZA A REVERSIÓN DA ESTACIÓN DE AUTOBUSES A PROL DO CONCELLO DE CEDEIRA

A corporación de Cedeira vén de aprobar a reversión da antiga estación de autobuses que o goberno municipal prevé converter nun centro xuvenil.

O goberno municipal valora significativamente a consecución dun obxectivo “para o que se vén traballando desde hai tempo” e destaca de maneira especial o feito de recuperar unha propiedade que no seu día foi cedida á Xunta de Galicia e que agora volverá formar parte do patrimonio municipal cunha clara finalidade pública e social”.

O executivo local apunta así mismo á importancia de recuperar un inmoble que se atopaba en estado de abandono, así como o aforro que representa para as arcas municipais dispoñer dunha propiedad cuxo valor catastral é de 175.742,40 euros e o de construción está por enriba dos 131.000 euros. A superficie construída é de 334 metros cadrados. Tamén se sinala a ubicación da antiga estación de autobuses, situada nas proximidades do IES Punta Candieira, e se considera moi vantaxoso para os intereses do Concello dispoñer de só público de uso dotacional.

As obras previstas transformarán as antigas instalacións destinadas ao tránsito de viaxeiros nunhas estancias pensadas para favorecer o encontro da mocidade local. O Concello traballa cun orzamento estimado de 25.000 euros para recuperar o inmoble e prevé manter o espazo do contorno da estación como punto de parada de autobuses.
No ano1995, a corporación acordaba a cesión gratuíta á Xunta de Galicia dun terreo de 1.575 metros cadrados para a construción dunha estación de autobuses, sempre e cando a administración autonómica executase a obra nun prazo de cinco meses e o seu destino fose o previsto durante, polo menos, un período de trinta anos. De incumprir calquera destas dúas condicións a propiedade doada retornaría ao Concello, tal e como quedou reflectido en escritura notarial.

No mes de abril do 2017, o goberno municipal entendeu que houbo un claro incumprimento por parte da Xunta -a concesión para a explotación da estación de autobuses finalizou en decembro de 2016 sen que fora obxecto de nova adxudicación- polo que o executivo local tomou a decisión de iniciar o proceso de reversión do terreo ó patrimonio e a edificación construída nel ao Concello.

Mediante unha Providencia da Alcaldía (19.04.2017), amparada por un informe policial e acta notarial incluída, o executivo cedeirense defende a súa postura que finalmente tamén recoñece a secretaría xeral técnica e do Patrimonio da Consellería de Facenda cando en marzo deste ano “autoriza a entrega por reversión ao Concello de Cedeira dun inmoble na rúa Deportes con todas as súas pertenzas e accesións”.

O pleno aproba o convenio para ampliación da escola infantil

O PLENO APROBA O CONVENIO PARA AMPLIACIÓN DA ESCOLA INFANTIL

O goberno confía que a obra poida ser unha realidade cara ao curso escolar 2018-2019.

O pleno vén de aprobar o convenio de colaboración entre o Consorcio Galego de Servizos de Igualdade e Benestar e o Concello de Cedeira para a ampliación e reforma da escola infantil, unha reivindicación do equipo de goberno e máis dun grupo de nais e pais “que fixeron unha recollida de sinaturas moi importante para que este proxecto puidese saír adiante”, tal e como recordou o alcalde, Pablo Moreda Gil, no transcurso da sesión plenaria.

O alcalde tamén aproveitou a súa intervención para recriminar ao anterior goberno a súa falta de colaboración en relación a todo este asunto. “Botamos de menos”, apuntou Moreda Gil, “que ningún membro do anterior executivo do PP nos informase dos traballos previos ou se os tiñan feito”, ao que tamén acusou de utilizar electoralmente o asunto durante a campaña do ano 2015 sen ter realizado trámite algún diante da Xunta. Polo contrario, o presidente da corporación cedeirense quixo agradecer o traballo realizado polos seus compañeiros de goberno e por parte
dos funcionarios do Concello, así como o esforzo das traballadoras da Escola Infantil “para que hoxe teñamos a posibilidade de aprobar esta proposta de convenio tan demandada por todos”.

O goberno municipal confía en que a obra subscrita a esta colaboración co Consorcio poida ser unha realidade cara ao curso escolar 2018-2019 “dada a demanda e necesidade que existe”.

O executivo local permañece estos días á espera de que o Consorcio fixe a data para asinar un acordo, “un obxectivo para o que este grupo de goberno está a traballar desde o día 27 de xullo de 2015”.
O acordo aprobado onte compromete ao Concello a redactar e aprobar o proxecto básico e de execución da reforma e ampliación da escola, así como a asumir a dirección dunha obra orzamentada en 141.337,70 euros. Deste importe, o Consorcio Galego de Servizos de Igualdade e Benestar achegará en dúas anualidades a cantidade de 100.000 euros, mentres que o Concello contribuirá con 41.337,70 euros.

Para os efectos e seguimento e control das actuacións previstas neste convenio, crearase unha comisión, da que formarán parte representantes das partes asinantes nun acordo que estará vixente ata o día 31 de decembro de 2019.
As actuacións incluídas no convenio son as seguintes:

-Na escola existente: Un aseo de uso público, un despacho, un aseo con cambiador e unha sala de profesores.

-Obra de ampliación: un aula para nenos de 2-3 anos, un aseo para menores, un cuarto de limpeza-lavandería, cociña, despensa, distribuidor, hall e acceso á primeira planta.

Ademais, o acceso actual ao edificio novo integrarase na amplación da escola como saída de emerxencia, polo que é necesario habilitar unha nova entrada para chegar á planta primeira deste modulo. Para entrar ao edificio, proxéctase modificar o acceso á parcela xenerándose unha nova rampa e unha plataforma horizontal na fronte da edificación. Tamén se amplía o patio do colexio, polo que haberá que adaptar os enreixados existentes ás novas disposicións.