Cedeira realiza unha campaña de sensibilización contra a herba da pampa
CEDEIRA REALIZA UNHA CAMPAÑA DE SENSIBILIZACIÓN CONTRA A HERBA DA PAMPA
O Concello de Cedeira está a levar a cabo unha campaña “simbólica” de erradicación da Cortaderia Selloana, máis coñecida como plumacho ou herba da Pampa. Trátase dunha especie exótica invasora que chegou a Galicia a mediados dos anos setenta da man de Audasa que a plantou nas medianas da Autopista do Atlántico. Desde entón vén multiplicándose de maneira exponencial e vertixinosamente nas cunetas das estradas e terreos baldíos, nos que pode alcanzar unha altura de tres metros.
A iniciativa do Concello de Cedeira pasa por actuar naquelas zonas máis sensibles para contribuír a sensibilizar á cidadanía sobre a conveniencia de non favorecer a súa expansión. A campaña xa está en marcha. Os traballos, que corren a cargo de operarios municipais, estanse a levar a cabo na rúa Mariñeiro e no parque do Romeiro.
Desde a área de Medio Ambiente, recoñécese que se trata dunha planta non moi doada de combater. Só se consegue con herbicidas, como o glifosato, ou arrincando ata a última das súas raíces con maquinaria axeitada. Nunca se lle debe plantar lume.
En España está prohibida a súa venta, agás en Canarias. A herba da Pampa despraza ás especies autóctonas e onde medra non hai nin zarzas.
