MEDIO AMBIENTE

OS VECIÑOS DE CEDEIRA DEIXAN DE BOTAR POLO VERTEDOIRO 4.100 QUILOGRAMOS DE ACEITE USADO SÓ NO ÚLTIMO ANO

Os veciños de Cedeira foron quen de evitar a contaminación de máis de 4,5 millóns de litros de auga. É o resultado no último ano do plan de recuperación do aceite usado, para o que o Concello dispón dun total de nove colectores repartidos polo casco urbano da vila.

Segundo os datos barallados pola Concellería de Medio Ambiente, ao longo de 2017 foron recollidos un total de 4.100 quilogramos de aceite, unha cantidade que traducida a litros vén sendo uns 4.500. Estímase, segundo os expertos, que cada litro de aceite pode chegar a contaminar uns 1.000 litros de auga.

O equipo de goberno móstrase moi satisfeito por ter estes resultados pero tamén insiste en que “todo isto estase a conseguir co mínimo esforzo que significa depositar de cando en vez un recipiente no sitio axeitado en vez de tirar o seu contido polo vertedoiro”, segundo apuntou o responsable municipal de Medio Ambiente, Camilo Casal. O concelleiro explicou que, a nivel local, a recuperación do aceite garante o correcto funcionamento da estación depuradora, mentres que, nun plano máis xeral, tamén se evita a obstrución das tubaxes, se reduce a proliferación de organismos prexudiciais para a saúde e dalle unha segunda vida ao aceite cara á fabricación de biodiésel, un combustible ecolóxico que non ten xofre e apenas emite gases responsables do cambio climático.

CASAL PIDE Á VECIÑANZA COLABORACIÓN PARA DEPOSITAR CORRECTAMENTE AS CAIXAS E EMBALAXES DENTRO DOS CONTEDORES DE PAPEL E CARTÓN

O goberno de Cedeira reitera a necesidade de contar coa colaboración da veciñanza para manter limpo o municipio e para facer rendibles os recursos públicos.

O concelleiro de Medio Ambiente, Camilo Casal, sostén que “a limpeza dun barrio, vila ou ci­dade depende, en gran medida, dos medios que as institucións poñen a disposición dos cidadáns pero, sobre todo, do comportamento e actitude destes. Se é cívica, e seguen as pautas estable­cidas ou ditadas polo sentido común, o resultado é satisfactorio; de non ser así, a sensación de suciedade e abandono é evidente a primeira vista”.

Casal apunta, nesta ocasión, ao caso concreto do aspecto que presentan os contedores de papel e cartón “case sempre están a reverter e as caixas e embalaxes esparexidos polos seus arredores”. Esta situación, segundo o responsable de Medio Ambiente, case sempre leva im­plícita unha chamada ao Concello “para que veña o camión e os leve sen pararnos a pensar se fixemos o correcto cando os depositamos”. Casal entende que o compromiso dos veciños co seu municipio en materia de limpeza tamén pasa por se tomar a molestia de “pregar os envases de papel e cartón para reducir o volume e, polo tanto, conseguir que se tarden máis en encherse os colectores”.

Este elemental xesto, segundo o concelleiro, “é decisivo para que o contedor tarde máis en estar cheo, seguramente ata que toque vir recollelo, unha operación que sucede cada certo tem­po, en función do acordo que existe entre o Concello e a empresa adxudicataria, e que non se pode modificar a capricho”. Por todas estas cuestións, desde o goberno municipal prégase á cidadanía que “cumpra co seu deber e nós, desde a administración local, e sempre que sexa pre­ciso, incrementaremos o número de contedores postos a disposición de todos”.