MEDIO AMBIENTE

Os roteiros e as xeorutas estarán operativas ata a segunda quincena do presente mes

OS ROTEIROS E AS XEORUTAS ESTARÁN OPERATIVAS ATA A SEGUNDA QUINCENA DO PRESENTE MES

O goberno de Cedeira estima en máis dun cento de persoas as que este ano tomaron parte no programa “Roteiros”, unha iniciativa municipal para dar a coñecer os principais recunchos da vila e que terá continuidade ata o día 19 do presente mes.

Roteiros dos Tesouros, da Vila e de San André de Teixido son os nomes que serven para identificar unha actividade que permite aos visitantes descubrir lugares de interese etnográfico e cultural como poden ser o santuario de Teixido, así como a costa cedeirense con parada no faro da Robaleira, ou a hermida de San Antón, o xacemento do Sarridal e o castelo da Concepción.

As persoas interesadas aínda están a tempo de participar nunha actividade que é de balde e para a que só é necesario apuntarse na oficina de Turismo (teléfono 981 482 187). As saídas tamén se realizan desde o devandito punto de información municipal (situado na avenida de Castelao). Desde a organización recoméndase aos participantes levar calzado de monte, bastón, auga, froita e chuvasqueiro. As distancias a percorrer oscilan entre os 18 quilómetros (ida e volta a San André) e os seis ou sete contabilizados no caso das outras dúas saídas.

O programa das Xeorutas, rutas guiadas de contido xeolóxico, tamén estará operativo ata o día 15 do presente mes. Nesta caso, as saídas previstas para a esta fin de semana son as do litoral, cantís e praias negras e para o seguinte (días 13,14 e 15) serán as dos cantís, praias negras e cromo.
A participación é gratuíta.

A obra que dotará de saneamento aos núcleos de Casal de María e Vila do Río xa está en fase e execución

A OBRA QUE DOTARÁ DE SANEAMENTO AOS NÚCLEOS DE CASAL DE MARÍA E VILA DO RÍO XA ESTÁ EN FASE E EXECUCIÓN

O Concello de Cedeira está a dotar de saneamento os núcleos de Casal de María e Vila do Río, os dous pertencentes á parroquia de San Román de Montoxo, cos traballos que darán comezo este mes e que estarán rematados no prazo de 28 días naturais.

O prezo de licitación superou os 98.500 euros e o proxecto finalmente foi contatado, por un importe de 76.830 euros, á empresa José No Mantiñán e Hijos Construcciones SA, ao resultar gañadora dun proceso de adxudicación no que tomaron parte un total de 13 construtoras.

As obras, no seu conxunto, discurrirán ao longo de un quilómetro e darán lugar á instalación dun total de 26 pozos prefabricados e á construción de zanjas con profundidade maior aos 1,75 metros. As canalizacións discorrerán por camiños de propiedade municipal e transportarán as augas residuais ata a estación depuradora situada na mesma parroquia, nas inmediacións do ría das Mestas.

O goberno municipal de Cedeira considera que é unha satisfacción poder anunciar o inicio dunha nova actuación que, neste caso, beneficiará de maneira máis directa aos veciños de Casal de María e de Vila do Río, pero que tamén repercutirá no conxunto da poboación cedeirense e mesmo dos seus visitantes, porque con ela estase a evitar a vertedura de augas residuais.

Cedeira promove a xeoloxía como alternativa ao turismo máis tradicional

CEDEIRA PROMOVE A XEOLOXÍA COMO ALTERNATIVA AO TURISMO MÁIS TRADICIONAL

O Concello de Cedeira vén de abrir o prazo de inscrición para tomar parte no programa de Xeorutas, unha iniciativa municipal de promoción turística na que a riqueza xeológica estase a converter unha alternativa aos tradicionais recursos de sol e montaña. As prazas son limitadas e os interesados xa poden facer a reserva na Oficina de Turismo (981 482 187) ou no blog: rutasxeoloxicasdegalicia.blogspot.com.es.

O doutor en Xeoloxía Francisco Canosa volve a poñerse á fronte dunhas visitas guiadas que terán lugar de venres a domingo e que darán lugar a un total de 33 saídas. A presente convocatoria, que comezará o próximo venres día 5 de xullo, estará operativa ata mediados do próximo mes de setembro.

Con respecto a pasadas edicións, a que agora comeza presenta como novidade a aplicación dunha penalización ás persoas que reserven e non notifiquen que causan baixa, ante calquera contratempo ou imprevisto. De non facelo, quedarán excluídos do programa durante un ano.

O executivo local recorda que as prazas son limitadas e a participación segue a ser gratuíta, polo que considera que o feito de non anular a reserva está a causar prexuízo a outras persoas e mesmo á administración local por non poder aproveitar un recurso que ademais de público a súa finalidade é dar a coñecer o territorio. O goberno anima aos posibles interesados a apuntarse o máis axiña posible, “porque as prazas acábanse en días” e valora a importancia dunha iniciativa que tamén sirve para reivindicar a declaración, por parte da Unesco, do Xeoparque do Cabo Ortegal.

En canto aos destinos son:

-Ruta do Litoral: Consiste un paseo xeolóxico pola contorna do porto de Cedeira e da praia da Madalena e na que, ademais, se inclúe unha visita ao xacemento arqueolóxico do Sarridal. Trátase dunha actividade de dificultade baixa e cunha duración dunhas tres horas.

-Ruta Os Cantís: Con esta xeorruta existe a posibilidade de contemplar unhas impresionantes vistas panorámicas da Serra da Capelada, descubrindo así unha salientable estrutura xeolóxica de máis de 400 metros de altura e rochas de hai millóns de anos. Ten unha dificultade baixa.

-Ruta de Areas Negras: Esta saída permite coñecer a que está considerada como a única praia de arena negra non volcánica do planeta e tomar contacto cos cantís máis altos da Europa continental, así como ollar a fervenza ou a falla de Teixidelo, unha estrutura xeolóxica que discorre por un fermoso val de orixe glaciar. Neste caso, a dificultade é alta e a distancia superior aos 5,5 quilómetros.

-Ruta do Cromo: Trátase dunha zona que xeoloxicamente destaca pola presenza de rochas moi pouco habituais na superficie da Terra. Asociadas a elas foron descubertas acumulacións de minerais de cromo e platino. A visita permite ollar tamén a presenza dunha salientable falla que corta toda a Serra da Capelada. A súa dificutade é media.

-Ruta do Granate. Esta ultima saída discorre por un pequeno sendeiro de pescadores dende o santuario de San Andrés ata a ensinada das Cortes. Trátase dun percorrido de dificultade alta, orientado á participación de persoas maiores de 16 anos e que ten unha distancia de cinco quilómetros.