MEDIO AMBIENTE

O CONCELLO IMPULSA A TERCEIRA CAMPAÑA DESTE ANO NO CASTRO SARRIDAL

O Concello de Cedeira acaba de poñer en marcha unha nova campaña de traballos no programa de recuperación arqueolóxica dos restos castrexos do Castro Sarridal. O alcalde da vila, Pablo Diego Moreda Gil, celebrou o impulso que se ten dado tamén neste ano 2020 aos traballos de posta en valor do xacemento que comezaron en 2017, tanto coas labores de escavación e consolidación dos restos como coa creación do Centro de Interpretación no Castelo da Concepción, e manifestou unha vez máis o compromiso do goberno local de seguir investigando a pegada castrexa na zona.

O arqueólogo Emilio Ramil, que dirixe os traballos, recordou que este ano se levou a cabo a sexta campaña de escavación, á que seguiron dúas fases de consolidación, a segunda das cales se está a desenvolver desde hai poucos días. A finalidade destes traballos é presentar os achados na súa ubicación orixinal, completando as partes que non se conservaron con outros materiais diferenciados, de maneira que os restos queden protexidos e que se facilite a comprensión do conxunto.

A sexta campaña de escavación avanzou este verán no descubrimento do paramento exterior do bastión defensivo do castro, que nalgúns puntos se conserva con dous metros de altura, e tamén da muralla, que se recuperou ao longo de 12 metros. Máis aló de cumprir os obxectivos iniciais, o equipo de AXA Arqueoloxía atopouse nesta zona coa sorpresa dun torreón defensivo que está adosado ao bastión da muralla e que ten planta oval.

A continuación desenvolveuse a primeira fase das tarefas de consolidación dos elementos escavados, durante o mes de setembro, e agora está en marcha a segunda, na zona do torreón exterior e do acceso ao forno. O Concello de Cedeira financiou a sexta campaña de escavación e tamén os traballos que se están a desenvolver agora, mentres que a primeira parte da consolidación foi custeada pola Dirección Xeral da Xunta de Galicia.

A campaña agora activa, ademais de consolidar e protexer os restos descubertos, incluirá a construción dun peche perimetral de madeira e a instalación dun panel, en forma de mesa, que se situará diante da sauna, con información e un código QR que facilitarán a comprensión dos achados.

Cómpre recordar que o Castro Sarridal conta cunha das cinco saunas castrexas descubertas en Galicia e coa pedra formosa máis antiga, datada aproximadamente no ano 230 a.C. coa proba do Carbono 14.

O CONCELLO ENTREGOU 18 NOVOS COMPOSTEIROS A OUTRAS TANTAS FAMILIAS DA VILA

O Concello de Cedeira fixo entrega esta semana, nun acto celebrado no Auditorio Municipal, de 18 composteiros a outras tantas familias da vila que van utilizalos para aproveitar de xeito eficiente os residuos orgánicos da casa, converténdoos en abono para a terra. O goberno local iniciou no ano 2016 o Programa de Compostaxe Doméstico, en colaboración con Sogama, e actualmente son preto de 200 os fogares cedeireses que se adheriron ao mesmo.

Previo á entrega dos composteiros impartiuse, por parte de técnicos de Sogama, un breve cursiño sobre o correcto uso dos mesmos e os seus beneficios. Trátase de volver a un método tradicional para a fabricación de abono, aproveitando os residuos orgánicos da casa, que adoitan ser o 40% do total. É un sistema que ten claras vantaxes meioambientais e tamén económicas.

O Concello de Cedeira dispón de máis composteiros, da partida de 30 que recibiu o pasado mes de setembro, para as familias da vila que conten con xardín ou horta. As interesadas teñen que cubrir o modelo de solicitude que está colgado na web do Concello, no apartado de Medio Ambiente, e presentalo en rexistro (aberto de 09.00 a 14.00 horas) ou ben na sede electrónica – sede.cedeira.gal- ou por correo electrónico -correo@cedeira.gal-. Darase prioridade aos veciños que non tiveran participado no programa en anos anteriores.

Os composteiros son resistentes á intemperie e de sinxelo montaxe e mantemento. Están deseñados para minimizar os cheiros e controlar mellor a condicións idóneas para facer o compost.

Na seguinte ligazón pódese descargar o modelo de solicitude:

https://cedeira.gal/wp-content/uploads/2020/09/MODELO-SOLICITUDE-COMPOSTEIRO.pdf.pdf

O CONCELLO INICIA UN ESTUDO DA SITUACIÓN AMBIENTAL DUN TRAMO DE 5 KM DO RÍO CONDOMIÑAS

O Concello de Cedeira vai levar adiante un estudo da situación do leito fluvial do Río Condomiñas nun treito de aproximadamente cinco quilómetros, curso arriba desde a Ponte da Acea ata pasado o muíño de Chimparra. Segundo explicou o alcalde, Pablo Diego Moreda Gil, o traballo porase en marcha nos vindeiros días e servirá para a posterior redacción dun proxecto técnico de acondicionamento ambiental deste tramo do río. “A idea é contar cun documento técnico que proporcione o coñecemento real e sobre o terreo da situación de partida, para definir as actuacións a realizar”.

O alcalde explicou que o informe vai aportar unha visión integradora do río. Así, abordará o estudio hidráulico, hidrolóxico, xeolóxico e ambiental do Condomiñas, cun levantamento topográfico de detalle do cauce e as súas marxes. Estes aspectos serán completados tamén cunha investigación dos elementos do patrimonio histórico, cultural ou etnográfico que existen ao longo do treito a analizar.

Moreda Gil explicou que unha vez estea listo o informe, dividirase a zona de actuación en tres tramos de similar lonxitude e complexidade, coa finalidade de facilitar ao Concello a posta en marcha de sucesivas fases, en función das posibilidades orzamentarias, coas que ir avanzando no acondicionamento ambiental do río.

Agradementos

Moreda Gil agradeceu en nome do Concello a colaboración que prestan nesta e outras actuacións no eido do medio ambiente a Asociación de Amigos dos Ríos de Cedeira (ARCE) e o Club Candieira, e fixo mención especial da axuda que prestou o biólogo cedeirés Antón Pérez Cribeiro na definición deste proxecto, como gran coñecedor que é da zona. O alcalde fixo extensivo o agradecemento ao Concello da Coruña, onde traballa como técnico Pérez Cribeiro, por permitir e facilitar o seu apoio.

“O río Condomiñas e a ría son o patrimonio máis valioso de Cedeira e queremos preservalo e recuperalo alí onde estea deteriorado”, comentou o alcalde. Ao fío da realización deste estudo de situación do cauce fluvial, Moreda Gil recordou a recente iniciativa do Concello de poñer ao pé de varios sumidoiros das zonas peonís da vila a mensaxe “A ría comeza aquí. Axuda a mantela limpa”, coa que se quere sensibilizar á cidadanía sobre a importancia que teñen as súas accións para o coidado de medio ambiente.