MEDIO AMBIENTE

O Concello de Cedeira enviou xa á Consellería de Medio Ambiente, para a súa avaliación ambiental, a modificación puntual do PXOM para a ampliación do Centro de Saúde. O alcalde, Pablo Diego Moreda Gil, recordou que a súa redacción foi contratada en marzo pasado, unha vez que a Xunta de Galicia retomou o seu compromiso de mellorar os servizos sanitarios na vila, e confiou en que a Consellería de Sanidade, pola súa banda, tamén cumpra o compromiso de axilizar os trámites e estudos necesarios para que, unha vez que a ordenación urbanística quede lista, poidan poñerse en marcha as licitacións precisas.

A Consellería de Medio Ambiente someterá a modificación puntual aos trámites de exposición pública e decidirá se procede a tramitación ordinaria ou simplificada. A segunda é máis rápida e desde o equipo de goberno do Concello de Cedeira confían en que o expediente poida acollerse a ela. Unha vez que Medio Ambiente emita o seu informe, que non será antes de catro meses, haberá que trasladalo a outros organismos, entre eles á Demarcación de Costas, antes de poder sometelo ao pleno municipal para a súa aprobación inicial e exposición pública. Posteriormente aprobaríase provisionalmente e o expediente iría á Dirección Xeral do Territorio e Urbanismo da Xunta de Galicia, que é o organismo que terá que dar a súa aprobación definitiva.

O Concello de Cedeira contratou por 17.500 euros a redacción da modificación puntual do PXOM para facer viable a ampliación do Centro de Saúde. O cambio na ordenación urbanística consiste en dotar de usos sanitarios á zona na que está situado o Centro de Saúde e o colindante edificio do número 7 da rúa Ortigueira, no que se vai executar a ampliación.

Cómpre recordar que en decembro de 2019 o Concello de Cedeira mercou o baixo, terceiro piso e baixo cuberta do citado edificio, por máis de 60.000 euros, para facerse coa propiedade de todo o inmoble e poñelo a disposición da Consellería de Sanidade. Porén, non foi ata marzo pasado cando a administración autonómica retomou o seu compromiso de poñer en marcha este proxecto de ampliación tan longamente demandado.

A veciñanza de Cedeira depositou durante o pasado ano 2020 nos contedores de recollida un total de 5.005 quilogramos de aceites de cociña usados, un 24% máis que o ano anterior. O alcalde, Pablo Diego Moreda Gil, celebrou as cifras, que “reflicten a sensibilización da cidadanía sobre a importancia de coidar do medio ambiente” e sinalou que este esforzo ten unha consecuencia directa sobre a calidade das augas. Estímase que a vertedura dun litro de aceite pode chegar a contaminar máis de 1.000 litros de auga dos ríos ou do mar, polo que a actuación da poboación de Cedeira no pasado ano evitou a contaminación de máis de 5 millóns de litros de auga.

O incremento da reciclaxe de aceite de cociña produciuse tamén como consecuencia do aumento do número de colectores instalados polas diferentes parroquias de Cedeira. Así, no ano 2018 e 2019, cando había 10 contedores de recollida, a veciñanza depositou 3.925 e 3.810 kg, respectivamente. No ano 2020 dispuxeron de seis máis, ata un total de 16, o que favoreceu un mellor resultado. O alcalde amosouse moi satisfeito e apuntou que “froito do traballo colectivo que fixemos nos últimos anos, conseguimos que as augas das praias da Madalena e Area Longa teñan de novo a cualificación de excelente”.

Cómpre recordar que o goberno local levou a cabo nos últimos anos diferentes iniciativas dirixidas a sensibilizar á cidadanía sobre a importancia de coidar o medio ambiente, unha delas a de sinalizar os sumidoiros na vila coa mensaxe “A ría comeza aquí. Axuda a mantela limpa”. Trátase de subliñar que tirar a través deles augas sucias de fregar, con deterxentes, é o mesmo que tirarlas directamente ao río ou ao mar.

Tirar o aceite usado polo vertedoiro da cociña provoca problemas nas depuradoras e nas tubaxes, de maneira que o máis recomendable é recollelo nun recipiente e levalo ao contedor para a súa reciclaxe. Ademáis de evitar problemas e gastos no mantemento de depuradoras e na rede, o aceite pode aproveitarse para fabricar biodiésel para un transporte máis sostible, e para outros usos.