MEDIO AMBIENTE

O CONCELLO INVISTE MÁIS DE 19.000€ NA RECUPERACIÓN DA ANTIGA FONTE DA VILA DO RÍO, EN SAN ROMÁN

O Concello de Cedeira vai investir 19.069 euros na recuperación da antiga fonte da Vila do Río, na parroquia de San Román, contando con fondos propios e tamén con 10.000 euros procedentes dunha axuda xestionada diante do Instituto de Estudos do Territorio da Xunta de Galicia. Segundo explicou o alcalde, Pablo Diego Moreda Gil, a subvención autonómica corresponde a un programa para a corrección de impactos paisaxísticos, “polo que encaixa co plan de rehabilitación de fontes e lavadoiros que levamos adiante desde hai anos en Cedeira, coa convicción do valor arquitectónico e tamén social deste tipo de elementos tan singulares”.

A empresa Kaizen Management realizará as obras de albanelería e achega de materiais, mentres que Carpintería López y Villadóniga encargarase da estrutura de madeira da cuberta. O seu traballo, contratado por un presuposto de 10.306,49 e 8.762,83€ respectivamente, consistirá a roza da zona, a demolición da actual cuberta de pizarra e do entramado de cimbros de madeira que a sustentan, así como na limpeza da estrutura de formigón e o chapado dos paramentos e o solo con pezas irregulares de pizarra. Ademais, colocaranse novas vigas de madeira de abeto e un teito de pizarra, e repararanse o sumidoiro e as tubaxes correspondentes.

A fonte da Vila do Río súmase así ás da Barca, Fernando Lago, da Area e de Vilar, que xa rehabilitou o Concello. O goberno local de Cedeira pon de relevo a importancia patrimonial destes elementos, que foron tradicionalmente lugar de encontro e relación para a veciñanza, fundamentalmente para as mulleres, e que forman parte da intrahistoria da localidade.

O PROXECTO DE XEOPARQUE CABO ORTEGAL CONVÉRTESE EN CANDIDATO A GLOBAL GEOPARK DA UNESCO

O proxecto do Xeoparque Cabo Ortegal pasou o corte do Comité Español de Cooperación coa Unesco e será presentado ao organismo internacional como unha das dúas candidaturas españolas que optarán ao distintivo Global Geopark. O alcalde de Cedeira, Pablo Diego Moreda Gil, que se reuniu onte cos responsables dos outros seis concellos implicados na iniciativa, celebrou a decisión e subliñou que despois de seis anos de traballo comeza unha apaixonante etapa “na que procuraremos a máxima identificación da cidadanía co proxecto”.

Na decisión do comité español, que xunto ao de Cabo Ortegal aprobou o proxecto cántabro de Costa Quebrada, tivo especial peso a excepcionalidade xeolóxica do Cabo Ortegal- con seis geosites ou lugares de interese xeolóxico internacional-. De feito, a proposta obtivo a máxima cualificación neste apartado.

O proceso de avaliación da candidatura que a partir de agora vai poñer en marcha a Unesco rematará cun exame sobre o terreo. Nesa visita, os representantes do organismo internacional terán en conta a adhesión da veciñanza ao seu proxecto do Xeoparque Cabo Ortegal, polo que este é un aspecto no que se vai a traballar intensamente. Segundo as previsión actuais, a fase de avaliación por parte da Unesco rematará en setembro do ano próximo e a decisión adoptaríase na primavera de 2023.

O alcalde recordou que esta boa nova súmase á recente confirmación de que o plan estratéxico para o desenvolvemento do proxecto vai contar con financiamento dos fondos Next Generation, segundo o acordo adoptado pola Xunta e o Goberno central. “É importante que todos e todas fagamos deste o noso proxecto conxunto, para conquerir unha distinción mundial que vai dinamizar a economía e o turismo dunha maneira equilibrada e sostible”, destacou Moreda.

O CONCELLO PRESENTA AO PROGRAMA DUS 5000 DE ENERXÍA LIMPA TRES PROXECTOS VALORADOS EN 2,3 MILLÓNS DE EUROS

O goberno local de Cedeira vén de presentar tres proxectos ao programa DUS 5000, que o Estado vai desenvolver con financiamento Next Generation para impulsar as enerxías limpas no mundo rural. Son tres iniciativas que suman un orzamento de máis de 2,3 millóns de euros e que serían susceptibles de financiarse cos fondos europeos que o Executivo central destinou ao Plan de recuperación, transformación e resilencia. O alcalde de Cedeira, Pablo Diego Moreda Gil, destacou que son iniciativas “das que cambian un municipio”, dirixidas todas a “acelerar o paso na transición ecolóxica e situar a Cedeira na vangarda da eficiencia enerxética”.

O programa DUS 5000 vai dirixido a impulsar proxectos de enerxías limpas nos concellos con menos de 5.000 habitantes tamén nos que teñen máis de 5.000 e menos de 20.000, pero cuxa configuración segue a ser eminentemente rural. Cedeira está no segundo caso, entre os 69 municipios da provincia da Coruña que están nalgunha desas dúas categorías.

As iniciativas de Cedeira van dirixidas á implantación da enerxía solar, á conversión do Auditorio Municipal nun edificio enerxeticamente sostible e ao impulso da peonalización para unha mobilidade non contaminante. A primeira delas podería recibir axudas por valor dun 71% do orzamento, mentres que as outras dúas son susceptibles de recibir o 100% do financiamento.

“Cedeira fotovoltaica” ten un custo de 286.532,84€ e a axuda solicitada ascende a 203.836,59€; “Auditorio Sostible” está orzamentado en 643.101,25€ e o apoio dos Next Generation podería chegar ao 100% e “Cedeira Peonil” ascende a 1.377.790,47€ e tamén solicita subvención para a totalidade do investimento.

O alcalde, Pablo Diego Moreda Gil, expresou o agradecemento do goberno local ao persoal municipal que conseguiu presentar a documentación, despois de esperar horas polo colapso da plataforma telemática do Goberno, máis alá da unha da madrugada do pasado venres. “Queremos recoñecer a dedicación e o empeño destas persoas, e tamén da concelleira Carmela Prieto, que estivo con elas, porque estiveron ao pé do ordenador horas e horas ata que lograron rexistrar as solicitudes de Cedeira”, dixo o alcalde.

Cómpre recordar que a loita contra o cambio climático e o coidado do medio ambiente é unha prioridade para o goberno municipal de Cedeira, que se adheriu o pasado ano ao Pacto dos Alcaldes polo Clima e a Enerxía. Froito deste traballo, estase a implementar unha estratexia dirixida a reducir o consumo enerxético nun 40% no ano 2030.