MEDIO AMBIENTE

CARIÑO, CEDEIRA E VALDOVIÑO REÚNENSE PARA FOMENTAR O EMPRENDEMENTO NA TRANSFORMACIÓN E DIVERSIFICACIÓN DO SECTOR PESQUEIRO

O “PROGRAMA DE VALORIZACIÓN DA PESCA SUSTENTABLE, E PARA IMPULSO DO EMPRENDEMENTO, PRIORITARIAMENTE NA TRANSFORMACIÓN, NO SECTOR PESQUEIRO NOS CONCELLOS DE CARIÑO, CEDEIRA E VALDOVIÑO. EMPRENDEPESCA” (2021-2022) é unha iniciativa conxunta entre os Concellos de Cariño, Cedeira e Valdoviño, financiada co Fondo Europeo e Marítimo da Pesca (FEMP), aprobado na primeira fase de axudas dos Grupos de Acción Local Participativo, de 2021.

EMPRENDEPESCA é un proxecto que ten como prioridade dar a coñecer as diferentes posibilidades que ofrece o sector do mar no territorio Emprendepesca, e dar visibilidade a aquelas oportunidades emprendedoras que o diversifican facéndoo máis competitivo e innovador.

Esta iniciativa, que vén liderada polo Concello de Cedeira, aposta polo xurdimento de novos negocios ou liñas de negocio relacionadas co sector pesqueiro e mariñeiro, como está a suceder noutros territorios da costa galega, e que a través da aparición de novas ideas innovadoras e diversificadoras, ven crecer social e economicamente os seus pobos.

Na reunión celebrada no Concello de Valdoviño, e na que participaron os representantes dos tres Concellos, falouse das diferentes actividades que nesta anualidade 2022 estanse a executar, como é a posta en marcha da páxina web emprendepesca.gal/.

A páxina web de EMPRENDEPESCA vén sendo un lugar de referencia para toda persoa que queira obter información do proxecto, facer unha consulta ou requirir axuda dos técnicosasesores que están a disposición das persoas interesadas nesta actuación. Ademais nela pódense consultar, entre outra información: os recursos que teñen a súa disposición as persoas emprendedoras, casos de emprendemento que son considerados boa práctica na transformación, ou nos sectores de hospedaxe, hostaleira, así como outras experiencias todas elas relacionadas co sector do mar.

EMPRENDEPESCA diríxese a persoas con interese, ilusión e gañas de emprender no sector pesqueiro e ver crecer a súa iniciativa dentro do seu pobo. Para todas estas persoas que se enrolen en EMPRENDEPESCA ofrecerase un asesoramento dirixido a posta en marcha da súa idea emprendedora, traballando o plan de empresa, o plan de viabilidade, a forma xurídica a elixir, os trámites legais e administrativos a cubrir, entre outras áreas.

Dentro do proxecto, tamén se detectan e se dan a coñecer oportunidades de negocio relacionadas co mar, sobre todo coa transformación do sector pesqueiro e a diversificación do mesmo e que teñen posibilidade de implantarse no territorio dos Concellos de Cedeira, Cariño e Valdoviño.

Emprendepesca conta coa colaboración de cinco entidades clave neste territorio, como son as Confrarías de Pescadores de Cedeira e de Cariño, a Asociación de Mariscadoras e Mariscadores de Cariño, as Asociacións de Percebeiros de Cariño e de Meirás.

O AUDITORIO ACOLLE ESTE SÁBADO A REPRESENTACIÓN DA OBRA DE MANUEL MARÍA A LÚA VAI ENCUBERTA

O Auditorio de Cedeira acolle este sábado a representación da obra A lúa vai encuberta, un texto de Manuel María que por primeira vez é posto en escea polas compañías Incendiaria e A Quinta do Cuadrante. A peza xira arredor da historia de Galicia e a súa loita por conformar unha identidade propia, partindo do Estatuto de Autonomía do 36, truncado polo golpe de estado, e chegando ata a transición democrática. A función, que estivo programada en marzo pero foi adiada por enfermidade, comezará ás 20.00 horas.

“A lúa vai encuberta” é un texto que o autor chairego escribiu nos anos setenta e que non chegou a representarse. Incendiaria, unha compañía que se define como plataforma artística para a investigación arredor da creación escénica contemporánea, e A Quinta do Cuadrante, un grupo que sitúa como prioridade a procura de espectáculos nos que dialoguen diferentes disciplinas, uniron sus forzas para representala. A obra estreouse en Ourense en setembro de 2021, despois de gañar o II Certame Manuel María de Proxectos Teatrais.

A montaxe ten a Tito Asorey na dirección e a Vanesa Sotelo encargada da dramaturxia. Ambos os dous actúan xunto con Davide González e Melania Cruz.

Festa da Pescada

Por outra banda, desde o Concello recordan que este domingo, día 19, se celebrará na zona portuaria, nas inmediacións da Confraría de Pescadores, a IV Festa da Pescada. A celebración, organizada no marco do proxecto Cedeixura, exaltará este peixe preparado de dúas maneiras. O público poderá tamen degustar berberechos e empanada de polbo ou de atún. A festa comezará ás 12.00h e as 150 primeiras persoas que acudan recibirán un prato conmemorativo de madeira como agasallo.

AS ASOCIACIÓNS E COLECTIVOS DO TERRITORIO XA PODEN UNIRSE AO PROXECTO DE XEOPARQUE COMO “ENTIDADES AMIGAS”

Os xeoparques mundiais da UNESCO son iniciativas de desenvolvemento construídas desde abaixo, que precisan a máxima base social para empezar a andar e consolidarse. Son proxectos para as persoas e feitos día a día polas persoas dun territorio que busca ampliar o seu potencial socioeconómico, cultural, turístico e de coñecemento, aproveitando para iso o patrimonio xeolóxico. Neste sentido, a asociación de concellos reuniuse hai unhas semanas con colectivos do territorio para coordinar a súa participación no proxecto, que se fará a través da figura da “Entidade Amiga”. Trala recollida de suxestións e o seu traslado ao correspondente protocolo, desde xa mesmo os colectivos, clubs ou asociacións radicadas en calquera dos sete municipios poden solicitar a súa entrada no proxecto, sempre que as súas fins sexan coincidentes coa filosofía dun xeoparque e sempre e cando estean legalmente constituídas.

O primeiro que deberán facer é acordar e aprobar a solicitude nos seus respectivos órganos de decisión, e logo enviar a documentación para que a Asociación xestora poida aprobar formalmente a petición, coa que accederán ao Foro de Participación Local. O Foro é un órgano consultivo que busca estreitar a colaboración do tecido social co proxecto e favorecer as relacións entre as propias entidades que participan nel.

Ser “Entidade Amiga” non implica o pagamento de cotas, pero si requirirá certos compromisos, como por exemplo a exhibición do distintivo do Proxecto de Xeoparque do Cabo Ortegal nas comunicacións de actividades, participar en xornadas e cursos formativos relacionados co proxecto, asesorar á asociación xestora en materias nas que as entidades sexan especialistas e, tamén importante, facer activismo como embaixadoras do xeoparque dentro e fóra do territorio.

Alén de reforzar o proxecto pola base -algo que a UNESCO mira con lupa á hora de conceder o distintivo Global Geopark-, ser Entidade Amiga tamén ten beneficios, entre eles o de crear sinerxias para levar adiante iniciativas conxuntas de todo tipo -culturais, ambientais, de posta en valor do patrimonio material e inmaterial, etc- e o de estar contribuíndo á implantación no territorio dun modelo de desenvolvemento social e ambientalmente sostible.

Documentación descargable:

Protocolo “Entidade Amiga” (.pdf)
Solicitude de adhesión como “Entidade Amiga” (.pdf) (. docx)
Acordo de colaboración “Entidade Amiga” (.pdf) (. docx)

Solicitude de baixa como “Entidade Amiga” (.pdf) (. docx)