MEDIO AMBIENTE

AS RUTAS QUE TRASLADAN AOS SEUS VISITANTES A MEMORIA DO LITORAL CEDEIRENSE

O proxecto Cedeira Mariñeira ten como finalidade principal valorizar o labor e a memoria pesqueira e marisqueira a través da creación de dúas rutas nas que se resalten as infraestruturas, enclaves e colectivos que protagonizan a actividade no mar. Así, na elaboración destas rutas tematizadas para promocionar o patrimonio mariñeiro material e inmaterial, leváronse a cabo labores de recollida de datos por varias vías.

Por unha parte, fíxose un estudo das zonas potenciais polas que poderían discorrer as rutas, para valorar o seu estado, a súa adaptabilidade e a viabilidade do percorrido. Deste xeito puidéronse marcar os tracks que compoñerán estes itinerarios que se poderán realizar tanto a pé como en BTT. Por outra parte, realizouse unha recollida de información a partir de entrevistas a algúns dos colectivos profesionais claves no territorio. Así púidose coñecer máis sobre a historia e os oficios que caracterizan o litoral e elaborar o relato que conformará as rutas.

Unha vez feita a documentación previa e traballado o territorio, realizouse o deseño das rutas e dos contidos informativos que as acompañarán. O resultado son dúas alternativas circulares nas que se traballan dúas partes moi importantes do municipio. Unha ruta urbana de baixa dificultade (duns 6km) na que se repasa a historia mariñeira da vila, pasada e presente, a través de puntos clave como o porto, a lonxa ou o casco histórico. Tamén, unha ruta litoral na que desprazarse polas panorámicas da contorna da serra da Capelada que reflicten outra gran parte dos oficios e a actividade no mar. Esta última presenta dúas versións, unha máis curta (algo máis de 7km) na que ir bordeando toda a serra e unha versión máis longa (9,5km), na que podes baixar ata o núcleo de Santo André de Teixido antes de volver ao punto inicial.

Ambas rutas contarán cun perfil en Wikiloc no que estarán dispoñibles os datos máis relevantes para a súa realización: lonxitude, duración aproximada do percorrido, nivel de dificultade, desniveis, altitude e información sobre os puntos máis relevantes que se visitarán, así como fotografías destes enclaves. Ademais, estes itinerarios subiranse á web de turismo municipal, na que se atoparán os enlaces ao perfil en Wikiloc, a información sobre os puntos que se visitan na ruta, audios en tres idiomas (galego, español e inglés) que farán máis accesibles os contidos e dúas videotestemuñas protagonizadas por dous dos colectivos profesionais do mar explicando os seus oficios. O proxecto denominado como “Definición, deseño e implementación de rutas tematizadas para a promoción do patrimonio mariñeiro do concello de Cedeira. CEDEIRA MARIÑEIRA” está impulsado polo Concello de Cedeira e conta co respaldo do GALP A Mariña-Ortegal e do Fondo Europeo Marítimo e de Pesca (FEMP).

XORNADAS EMPRENDEPESCA, PROXECTO DE EMPRENDEMENTO NO SECTOR DO MAR NOS CONCELLOS DE CARIÑO, CEDEIRA E VALDOVIÑO

A finais do mes de setembro e principios de outubro celébranse unhas xornadas informativas do proxecto Emprendepesca nas que se pretende achegar á poboación o potencial e oportunidades de emprendemento que ten o territorio dos concellos de Cedeira, Cariño e Valdoviño dentro do sector do mar.

Nestas xornadas ofrecerase información á poboación sobre as posibles oportunidades de negocio que ofrece o sector, fundamentalmente no ámbito da transformación, e no ámbito da diversificación. A través da presentación de datos socieconómicos e das oportunidades de negocio que teñen cabida no territorio, preténdese dar un impulso as mentes emprendedoras no sector.

No mes de setembro e as 17 horas celebrarse a primeira xornada nos tres concellos Emprendepesca os seguintes días:

· Cedeira día 20 de setembro no Auditorio Municipal

· Cariño día 21 de setembro no Auditorio Municipal

· Valdoviño día 22 de setembro na Casa da Cultura.

Xornadas nas que toda a poboación está invitada, e poderá informarse sobre ideas de negocio de éxito noutros lugares costeiros de Galicia, e que polas súas características representan unha boa práctica para o territorio Emprendepesca.

E no mes de outubro e tamén as 17 horas terá lugar a segunda e última xornada Emprendepesca:

· Cedeira día 4 de outubro no Auditorio Municipal

· Cariño día 5 de outubro no Auditorio Municipal

· Valdoviño día 6 de outubro na Casa da Cultura.

Esta segunda xornada está dedicada a aquelas oportunidades de negocio para o territorio e que están relacionadas fundamentalmente coa transformación do sector e a súa diversificación.

Para aquelas persoas que teñen en mente unha idea emprendedora ou nova liña de negocio relacionada co sector do mar, abriuse en setembro e ata finais de outubro, un servizo de asesoramento adaptado e individualizado que ofrece a axuda necesaria tanto para un asesoramento completo como para consultas puntuais.

Emprendepesca ven liderado polos Concellos de Cedeira, Cariño e Valdoviño, que apoian a transformación e diversificación do sector do mar e o nacemento de novas empresas ou novas liñas de negocio que fagan medrar o sector do mar e polo tanto do territorio.

Para saber mais sobre Emprendepesca se pode consultar a súa páxina web emprendepesca.gal ou as súas redes sociais de Facebook @emprendepesca20212022 e Instagram @emprendepesca. Ou ben poñerse en contacto a través de correo electrónico emprendepesca21@gmail ou no teléfono 664 538 215.

Emprendepesca conta coa colaboración de cinco entidades clave neste territorio, e que son as Confrarías de Pescadores de Cedeira e de Cariño, a Asociación de Mariscadoras e Mariscadores de Cariño, as Asociacións de Percebeiros de Cariño e de Meirás.

ARRANCAN OS TRABALLOS DO PROXECTO CEDEIRA MARIÑEIRA

Coincidindo co comezo da romaría de Santo André de Teixido, desprazámonos cara este enclave do municipio para comezar co traballo de campo do proxecto Cedeira Mariñeira. Este proxecto, xestionado polo Concello de Cedeira, traballará na implantación de dúas rutas mariñeiras polo territorio, ligadas ao patrimonio litoral e os oficios. Ambas rutas contarán cun track completo no perfil de Wikilock, información sobre os puntos máis relevantes para visitar e o testemuño dalgúns dos protagonistas da contorna, para que se poidan realizar de xeito autoguiado en calquera momento. Dúas rutas nas que calquera persoa, con ganas de aprender un pouco máis sobre o litoral, poida facelo mentres desfruta da paisaxe, os paraxes e a súa historia.

O Concello vén de xestionar outros proxectos como o de Cedeira MAR, no que se trataba de dar visibilidade a actividade extractiva no municipio a través de actividades como: obradoiros de sensibilización e saídas polo litoral dirixidos a escolares da vila, a presentación de paneis informativos sobre a actividade e o patrimonio mariñeiro e a realización de rutas polos enclaves do territorio. Estas rutas, en concreto, tiveron unha gran acollida, polo que se evidenciaba a necesidade de crear unha oferta de rutas permanente.

O proxecto Cedeira Mariñeira conta xa coa súa propia imaxe gráfica. Unha imaxe na que se mestura a identidade corporativa da vila – formando o conxunto o nome do proxecto – cos atributos diferenciais que evocan á actividade mariñeira e o litoral, véndose reflexada a imaxe típica do “sanandresiño” mergullado no mar.

Nos próximos días teremos a oportunidade de falar coas persoas que máis saben do territorio por medio de pequenas entrevistas. Persoas vinculadas directamente ao patrimonio litoral e mariñeiro, a través da súa tradición e os seus oficios. O seu relato serviranos para coñecer máis sobre os puntos clave do territorio que compoñerán as futuras rutas mariñeiras. Algunhas destas testemuñas serán recollidas en pequenas pílulas audiovisuais nas que se poderá coñecer un pouco máis sobre os seus oficios e a contorna na que os desenvolven. Pronto iremos coñecendo a cada unha destas persoas!

O proxecto “Definición, deseño e implementación de rutas tematizadas para a promoción do patrimonio mariñeiro do concello de Cedeira. CEDEIRA MARIÑEIRA” está impulsado polo Concello de Cedeira e conta co respaldo do GALP A Mariña-Ortegal e do Fondo Europeo Marítimo e de Pesca (FEMP).