DEPORTES

250 DEPORTISTAS DE TODA A PROVINCIA PARTICIPAN MAÑÁ NO 3º DUATLÓN MENORES “CONCELLO DE CEDEIRA”

O Club Natación Cedeira organiza a terceira edición do Duatlón Menores “Concello de Cedeira”, que por primeira vez este ano desenvólvese dentro do programa Xogade da Xunta de Galicia e que volve contar co apoio da administración local. Un total de 250 deportistas, nenos e nenas de clubes de toda a provincia, participarán na proba, que se vai desenvolver mañá pola tarde pola nova variante de Régoa. Desde o Concello, o alcalde de Cedeira, Pablo Diego Moreda Gil, destacou que “no goberno local sempre estamos dispostos a apoiar a organización deste tipo de eventos, porque apostamos polo deporte de base, e porque son unha ocasión para que moita xente se achegue á nosa vila”, comentou, sumando ademais neste caso “a oportunidade que representa para coñecer mellor un deporte como o duatlón”.

O presidente do Club Natación, Xan Xosé Suárez Vilela, explicou que a proba, que combina a carreira e a bicicleta, comenzará a partir das 16.00 horas, pero que xa unha hora antes os clubes terán que presentarse e que o tráfico estará por iso cortado –os coches poderán circular cara a San Andrés pola estrada vella-. Haberá tres categorías: benxamín (nados nos anos 2012-2013), alevín (2010-2011) e infantil (2008-2009).

O Concello de Cedeira colabora económicamente, con máis de 2.000 euros para sufragar unha ambulancia, o avituallamento e a cronometraxe para a celebración do campionato, así como achegando o apoio de Protección Civil, Policía Local e persoal municipal para o correcto desenvolvemento da proba.

REMATADOS E A DISPOSICIÓN DA CIDADANÍA A NOVA TIROLESA E O BOWL DE SKATE DO PARQUE DO CAMIÑO REAL

28 de xaneiro de 2020. O Concello de Cedeira informa de que están rematados a disposición da cidadanía a nova tirolesa e o bowl de skate do parque do Camiño Real, un proxecto executado cun investimento de preto de 121.000€. Segundo destacou o alcalde, Pablo Diego Moreda Gil, a actuación reforza o atractivo que ten toda esta zona, a carón da praia da Madalena, para as familias e en particular para a xuventude.

“Temos un espazo único, con árbores, paseos pavimentados, céspede, o río, xogos para nenos e nenas de diferentes idades e tamén estes novos elementos para o ocio da mocidade, que se suman ao parque de calistenia inaugurado hai poucos meses e xurdido do proceso de orzamentos participativos – destacou o alcalde-; un conxunto excelente para o tempo de lecer, o encontro e a convivencia da veciñanza e das persoas que visitan a vila”.

O bowl de skate ocupa o espazo no que anteriormente había unha fonte pública en desuso. É unha bañeira para practicar a patinaxe, cunha superficie irregular e con pendientes e formas redondeadas. O seu deseño está pensado para ofrecer seguridade aos principiantes, ao tempo que ofrece suficientes atractivos para skaters máis experimentados. A instalación para patinar ten 176 metros cadrados, ainda que a superficie total, contando o perímetro habilitado, abrangue 264 medros cadrados.

A tirolesa, situada a poucos metros, xunto a un parque de xogos infantís próximo, ten 28 metros de largo. Ten catro metros de altura na saída e tres na chegada, con solo de caucho ao longo de todo o percorrido.

A empresa Rog i Fills Associats foi a encargada das obras, tras gañar unha licitación aberta á que concurriron tamén outras catro empresas.

SERVIZOS SOCIAIS PON DE NOVO EN MARCHA AS ACTIVIDADES GRATUÍTAS DE INFORMÁTICA E ZUMBA

A Concellería de Servizos Sociais do Concello de Cedeira inaugura o vindeiro día 7 as clases de Informática e Zumba Gold, ambas as dúas no marco do programa de actividades gratuítas que este departamento municipal dirixe ás persoas maiores para favorecer a socialización e mellorar a súa saúde física e mental. A concelleira responsable da área, Malena Pérez, subliña que son todas propostas que teñen unha grande acollida e destaca o feito de que se desenvolven na zona urbana e tamén nas diferentes parroquias, co devezo de achegarse a todas as persoas que son potenciais usuarias.

Así, as clases de Informática desenvolveranse en Cedeira en dúas quendas. Os luns e os venres haberá un grupo de mañá, de 11.00 a 13.00 horas, e os venres un de tarde, de 17.30 a 19.30 horas. En Esteiro e en San Román as clases serán os mércores, de 16.00 a 18.00 e de 19.00 a 21.00 horas, respectivamente. En Santalla a actividade programouse para os sábados, de 18.30 a 20.30, e en Montoxo será os domingos, de 16.30 a 18.30 horas.

En canto á actividade de Zumba Gold, a cita será no patio do CEIP Nicolás do Río cada luns e mércores ás 19.30, e os venres ás 19.00 horas.

Tamén chegan á zona rural as actividades de Ximnasia Terapéutica e o Taller de Memoria, que comezaron o pasado día 17 en Cedeira. No primeiro caso, as clases que imparte a fisioterapeuta Marta González celébranse os martes en Esteiro, ás 09.45h; e os xoves en Montoxo (09.30h), San Román (10.45h) e Santalla (12.00h). O Taller de Memoria, que ten lugar en Cedeira os luns e venres ás 16.00 e 17.30 horas, desenvólvese en Santalla (martes e xoves, 18.30h); Saa (mércores e xoves, 16.00h); Sisalde (martes ás 16.00 e mércores ás 17.15h); Montoxo (martes e xoves, 17.15h) e San Román (luns e venres, ás 19.00h).

Por outra banda, o 20 de xaneiro retomaranse os talleres de “Música sen enrugas”, de musicoterapia para maiores, que xa se estiveron impartindo en novembro e decembro. A cafetería do Auditorio acolle estas sesións, en dous grupos, os xoves ás 16.30 e ás 18.00 horas. A psicóloga Sara Abuín imparte tanto esta actividade como a que leva por título “Inspira”, que abrangue musicoterapia, mindfulness e xestión emocional, e que se vai desenvolver os mércores ás 18.30h.

As persoas interesadas poden inscribirse nestas actividades acudindo a Servizos Sociais –de 10.00 a 13.00 horas-. A concelleira Malena Pérez recorda que tamén hai prazas dispoñibles nos talleres de estimulación cognitiva que o Concello de Cedeira desenvolve a través dun acordo coa asociación AFAL e que se realizan todos os días, de cinco a sete da tarde, no segundo andar do Auditorio Municipal.