DEPORTES

MÁIS DUN CENTO DE PERSOAS PASA ESTE VERÁN POLA ESCOLA MUNICIPAL DE PÁDEL, QUE ESTREA NOVAS INSTALACIÓNS

A escola de verán de pádel do Concello de Cedeira, na que están a participar este mes arredor de medio cento de persoas, serviu de estrea para o novo cerramento das dúas pistas de xogo, no que a administración local investiu 59.773,62€. Para os cursos do mes de agosto están apuntadas a estas alturas máis de 75 persoas e a intensidade de uso que ten as instalacións ten un pico importante estes días coa celebración da sexta edición do Torneo de Pádel Cedeira, no que hai 240 xogadores e xogadoras.

O alcalde, Pablo Diego Moreda Gil, destacou que a estrutura de peche permite aproveitar ao máximo ás dúas pistas, que ata o momento non podían ser empregadas con vento e choiva, e informou de que o Concello está actualmente facendo obras de mellora do pavimento e as bancadas nas outras dúas pistas de pádel xa existentes, que están no mesmo complexo deportivo, e que se vai construír outra nova, tamén nesta zona. En total, o investimento nestas actuacións suma máis de 54.000€ en diferentes partidas incluídas na modificación de créditos feita coa incorporación dos remanentes do pasado ano.

O presidente do Club de Pádel Cedeira, Alex Piñón, explicou que o novo peche das pistas afórralles aos xogadores e xogadoras os frecuentes desprazamentos que habitualmente facían ao longo do ano a Ferrol para adestrar cando chovía e facía vento. A entidade conta con preto de 90 persoas asociadas que practican este deporte con regularidade ao longo do ano e ten competindo, de feito, catro equipos, dous masculinos e dous femininos.

Alex Piñón destacou que ao longo dos anos foi aumentando moito o número de personas que se apuntan á práctica do pádel en Cedeira e sinalou que o torneo deste ano ten moita máis participación que o ano pasado. Tal como comentou, as pistas municipais están ocupadas habitualmente de xeito ininterrompido de luns a domingo, entre as nove da mañá e as dez e media da noite, non só coa actividade do clube, senón tamén coa escola deportiva do Concello, que adoita ter arredor de 80 personas apuntadas, e coas personas que se achegan para xogar de xeito individual.

A UTE formada por Meraki CR e Carpintería Metálica Ferreiro encargouse das obras de construción da nova estrutura de cerramento das dúas pistas de pádel. Anteriomente tiñan un teito de chapa e paredes de malla e vidro templado que eran insuficientes para permitir o xogo en condicións meteorolóxicas adversas. A actuación consistiu en crear unha nova estrutura, colocando novos piares e paramentos que pechan as pistas totalmente, con partes que deixan pasar a luz.

Moreda Gil recordou que no anterior mandato se fixeron dúas pistas de pádel novas, co que Cedeira pasou a contar coas catro actuais, e destacou que pronto serán cinco. “A nosa vontade é acompasar as actuacións á demanda real que teñen os equipamentos, incrementando as instalacións a medida que o fai tamén a afección por este deporte na nosa vila”, comentou. “A atención á mellora constante nas instalacións deportivas é unha prioridade para o noso goberno – engadiu-, mesmo porque as persoas que o compoñen son deportistas e porque temos o convencemento de que a práctica deportiva é unha escola de hábitos saudables e un espazo fundamental para a convivencia, o compañerismo e os valores”.

A LIGA GALEGA DE TRAÍÑAS CHEGA Á VILA COA DISPUTA MAÑÁ SÁBADO DA VI BANDEIRA CONCELLO DE CEDEIRA

A Liga Galega de Traíñas recala de novo mañá na vila para a disputa da sexta edición da Bandeira Concello de Cedeira, organizada polo clube de remo local co respaldo do Goberno municipal. A regata, incluída na segunda categoría da competición autonómica, reunirá a sete embarcacións, a partir das cinco e media, sobre un campo de regatas situado nas inmediacións do espigón do peirao novo.

Trátase da cuarta cita dun calendario do que só puideron disputarse dúas probas –a de Perillo foi suspendida polo vento- e nas que Castropol resultou o gran dominador, polo que a tripulación asturiana parte coma favorita para imporse nunha regata na que Samertolameu-Oversea B parece, a priori, o seu máximo adversario. O Club de Remo Cedeira, que actualmente ocupa a terceira posición na clasificación xeral tratará de dar a sorpresa e puxar xunto con Amegrove por inquietar esa hexemonía. Estas serán as catro traíñas que compoñan a quenda de honra. Con anterioridade, sairán ao mar Vila de Cangas, Muros e Salgado-Perillo. “Confiamos en que os nervios non nos pasen factura”, advirte Chema Hermida, presidente do clube e un dos remeiros da tripulación cedeiresa, ao valorar as posibilidades dos anfitrións.

A pesar de seren un campo de regatas en mar aberto, as boas condicións meteorolóxicas que se prevén para a tarde de mañá, con vento escaso e mar en calma, non invitan a que se produzan sorpresas deportivas, aínda que si aseguran un gran espectáculo. Por iso, tanto desde o clube como desde o Consistorio animan aos veciños e visitantes a achegarse á zona do espigón para desfrutar dun dos maiores espectáculos do remo en banco fixo do que se pode ver en Galicia.

A traíña anfitrioa conta cunha tripulación composta nun noventa por cento por remeiros da vila, reforzada nesta tempada por catro xuvenís procedentes do Náutico Ribeira. Con estes vimbios tratará de loitar, coma o ano pasado, por acceder ao play-off de ascenso á primeira categoría da Liga Galega de Traíñas.

O remo é un dos deportes con máis tradición na vila de Cedeira. O clube local, creado en 1960, formou xa a varias xeracións de remeiros nestes máis de sesenta anos de vida. O banco móbil é a súa disciplina prioritaria, na que acumula algúns títulos estatais e logrou situar a varios deportistas en competición internacionais defendendo as cores da selección española. Porén, desde fai cinco anos sae ao mar tamén cunha traíña e retomou a competición en diversas modalidades de banco fixo.

“DESCOBRE CEDEIRA” PERMITE AOS VISITANTES COÑECER MÁIS A CONTORNA DA VILA A TRAVÉS DE CATRO ROTEIROS

A través do programa “Descobre Cedeira”, o Concello da vila ofrece un ano máis aos visitantes a posibilidade de coñecer polo miúdo algúns dos emprazamentos máis destacados da súa contorna. Para este período estival (ata mediados de setembro) programáronse dezaoito excursións repartidas en catro roteiros, un máis que en edicións precedentes. Así, ás xa clásicas visitas ao casco urbano, a península de Robaleira ou Santo André de Teixido, se engaden agora saídas tamén pola serra da Capelada, en todos os casos coa dirección dunha guía titulada.

O programa arrincou esta mesma semana cunha excursión pola localidade que se repetirá os días 28 deste mes, o 10 e 30 de agosto e o 12 de setembro. O roteiro, que parte da oficina de turismo, ten unha duración de tres horas (10.00 a 13.00 horas) e unha dificultade baixa. Durante a mesma, os visitantes saberán máis da historia da vila e das súas tradicións visitando o casco antigo, o Castelo da Concepción ou o Castro Sarridal.

Hoxe mesmo arrincaron tamén os roteiros da Pedra Chantada, unha das grandes novidades da oferta para este 2022, pois permitirán aos visitantes descubrir a excepcional riqueza natural e paisaxística da Capelada, con visita a varios dos seus miradoiros máis destacados e ao curro. A proposta repetirase o 26 deste mes, o 8 de agosto e o 1 de setembro. Neste caso, as expedicións partirán da Estación de Servicio A Trabe e prolongaranse durante tres horas (10.00 a 13 horas).

O Roteiro dos Tesouros é outra das suxestións clásicas desde programa para gozar tamén das excelencias naturais da vila. Desde a praia da Madalena, os participantes accederán á península da Robaleira, ao faro e a cala de Cerdeiras, gozando dunhas magníficas vistas da ría e do porto cedeirés. Pódense reservar prazas para as excursións que se celebrarán o 18 deste mes, o 2 e 23 de agosto e o 6 e o 18 de setembro. Como nas anteriores, a dificultade é baixa e a duración do percorrido será de tres horas (10.00 a 13.00 horas)

Un pouco máis esixente en canto a dificultade (media) e duración (cinco horas) é o Roteiro de Santo André de Teixido, que parte ás dez da mañá da igrexa de Régoa e para o que se recomenda levar xantar, pois a chegada está prevista en torno ás cinco da tarde. As datas fixadas para esta excursión son o 20 deste mes, o 4 e o 25 de agosto e o 8 setembro.

Todas estas actividades son gratuítas, porén, posto que as prazas son limitadas, as persoas interesadas deben tramitar a súa inscrición previa de forma presencial na Oficina de Turismo de Cedeira, a través do teléfono 981 48 21 87 ou no correo electrónico mar.lopez@cedeira.gal. Recoméndase acudir a todas elas con calzado axeitado, bastón, auga, froita e chuvasqueiro.

O interese que espertaron as primeiras visitas permite augurar que o programa “Descobre Cedeira” mellorará os números da pasada edición en canto a afluencia. Entón foron case duascentas persoas as que participaron nas excursións propostas. Unha cifra que podería superarse tendo en conta que, como apunta Mar López, técnica de Turismo, neste 2022 na vila pálpase desde xuño a presencia dun maior número de visitantes, xa non só nacionais, senón tamén estranxeiros, coma antes da pandemia.

A todos eles están dirixidas estas excursións, pero tamén aos propios veciños de Cedeira que estean interesados en coñecer máis polo miúdo e ver con outros ollos moitos dos emprazamentos polos que pasan decotío.