Skip to content Skip to left sidebar Skip to footer

CULTURA

CEDEIRA XA TEN A SÚA MARCA EN TAMAÑO XIGANTE NOS XARDÍNS DO PASEO DA MARIÑA

O Concello instalou hai poucos días a súa marca corporativa, coas letras de Cedeira en tamaño xigante e a imaxe do peixe de Teixido, nos xardíns do Paseo da Mariña, diante dunha das súas vistas máis emblemáticas. Tal e como comentou o alcalde, Pablo Diego Moreda Gil, “é un elemento que vai contribuír a espallar o nome de Cedeira co mellor marco, o da nosa ría e a praia da Madalena, e a identificar a icona do peixe como a marca deste municipio”.

A marca de Cedeira creouse no marco do desenvolvemento do proxecto Pescaturacción, con financiamento europeo xestionado polo GALP A Mariña. Este e outros programas de acción postos en marcha ao abeiro destas liñas de axuda van dirixidos a potenciar a tradición pesqueira da vila xunto cos seus valores turísticos.

A instalación das letras de Cedeira chega en pleno mes de agosto e a poucos días do comezo das festas, coa vila especialmente animada e chea de visitantes. Nestes últimos días centos de persoas aproveitaron xa o lugar como “photocall” para facer fotos e presumir das vistas.

Desde o Concello recordan que este mércores hai unha nova ruta do programa “Descobre Cedeira”. Tócalle a quenda ao percorrido pola vila, moi doado e con saída desde a Oficina de Turismo. De 10.00 a 14.00 h, as persoas inscritas irán coa guia turística polo casco vello ata a capela de San Antón e despois achegaranse ao xacemento arqueolóxico do Sarridal.

As persoas interesadas poden informarse ou inscribirse de xeito gratuíto a través da Oficina de Turismo, en persoa ou a través de mail -mar.lopez@cedeira.es- ou teléfono -981 482 187-.

CEDEIRA VOLVE CELEBRAR ESTE ANO UN DOS SEUS EVENTOS GASTRONÓMICOS MÁIS ESPERADOS, A FESTA DO PERCEBE

Cedeira volverá a gozar esta fin de semana da Festa do Percebe, outro dos eventos que quedaron en suspenso nos dous últimos anos. A Confraría de Pescadores organiza coa colaboración do Concello o evento gastronómico, que se vai desenvolver o sábado e o domingo, días 6 e 7 de agosto, na explanada do porto. Ao longo das dúas xornadas, de 12.00 a 18.00 h serviranse racións de percebes, polbo á feira e empanada, baixo a sombra das carpas que se instalarán para a ocasión e cun tren turístico que fará durante todo o tempo viaxes desde a vila.

A Confraría prevé servir máis de 500 quilos de percebe, en racións de 300 gramos ao prezo de 14 ou 15 euros –o prezo establecerase unha vez que remate a compra do produto, estes días, aos percebeiros do pósito-, así como outros 500 quilos de polbo, a 14€. Tamén poranse á venda 1.500 racións de empanada de berberechos ou de liscos, a 6€, e bebidas.

O público poderá comprar en billeteiras dispostas para elo os tickets dos produtos que desexe. A afluencia de xente, a teor do que sucedeu outros anos nos que acompañou a meteoroloxía, estará entre as 2.000 e as 3.000 persoas.

Desde o Concello de Cedeira celebran a volta desta festa gastronómica tan emblemática para a vila, que chega este ano a décimo novena edición, e destacan que pon de relevo a extraordinaria calidade dun dos produtos estrela do pósito local.

O PROXECTO CEDEIRA MAR CONTINÚA AS SÚAS ACTIVIDADES CUNHA EXPOSICIÓN DURANTE O DISCALZ@S POLO FESTIVAL

O proxecto denominado como “Valorización da actividade pesqueira e marisqueira e dos seus espazos extractivos no litoral de Cedeira. Cedeira Mar” é un proxecto impulsado polo Concello de Cedeira que traballa na visibilidade e posta en valor dos oficios vinculados ao mar e a súa contorna, mediante accións de sensibilización orientadas a diferentes públicos.

Entre estas accións recóllese a actividade expositiva que terá lugar esta fin de semana, durante a celebración do festival de música Discalz@s. A través de 8 paneis en gran formato presentarase unha exposición orientada a 4 temáticas principais: a identidade mariñeira da vila, os oficios do mar, a sostibilidade e a creación da Reserva Mariña de Interese Pesqueiro e os enclaves do litoral. Ademais de datos e curiosidades, os paneis incluirán os testemuños dalgunhas das persoas máis implicadas co mar, as xentes que traballan vinculadas a el. Tamén dispoñerán de códigos QR, mediante os cales, acceder á audioguía do panel en tres idiomas: galego, español e inglés.

A consecución desta actividade foi posible, en gran parte, grazas á colaboración da xente da vila. A través das súas ensinanzas, relatos e gran implicación, recompiláronse os contidos para os paneis didácticos da exposición, que servirán para difundir a importancia da gran tradición mariñeira da vila.

Durante a fin de semana do 5, 6 e 7 de agosto, veciñanza e visitantes poderán desfrutar dunha exposición na que descubrir un pouco máis das actividades que se levan a cabo no litoral, a súa morfoloxía e os oficios das xentes que dedican o seu día a día ao mar. A exposición poderá visitarse na praza da Marieta.

O proxecto Cedeira Mar é un proxecto coordinado polo Concello de Cedeira que conta ademais co apoio do Fondo Europeo Marítimo e de Pesca, a través das axudas outorgadas polo GALP A Mariña – Ortegal na convocatoria extraordinaria de 2021. Dentro do proxecto desenvolvéronse outras actividades dirixidas a diferentes públicos, como os obradoiros de sensibilización para escolares ou as rutas polo litoral abertas a toda a poboación en xeral.