Skip to content Skip to left sidebar Skip to footer

CULTURA

Cedeira e moeche volven ir da man na promoción dos territorios polos seus recursos xeolóxicos

CEDEIRA E MOECHE VOLVEN IR DA MAN NA PROMOCIÓN DOS TERRITORIOS POLOS SEUS RECURSOS XEOLÓXICOS

As xeorutas en Cedeira comezarán o día 1 de xullo, mentres que en Moeche o farán o 8.

Os concellos de Cedeira e Moeche ofrecen de novo as xeorutas para dar a coñecer e poñer en valor o seu patrimonio xeolóxico no marco do Proxecto Xeoparque Cabo Ortegal. Un ano máis estes dous municipios ofrecen unha presentación conxunta das saídas: a primeira tenente de alcalde de Cedeira, María Xosé Rodríguez Pérez e a alcaldesa de Moeche, Beatriz Bascoy, compañadas do xeólogo Francisco Canosa, deron a coñecer o programa que se desenvolverá nos dous concellos durante os meses de verán.No caso de Cedeira, as saídas comenzarán o día 1 de xullo e rematarán o 12 de setembro.

Manteñen o seu carácter gratuíto e como novidade este ano, ademais das exitosas xeorutas dos cantís, do cromo, do granate e da praia de areas negras, introdúcese a xeoruta do litoral.

O obxectivo principal deste novo percorrido é facilitar a visita ao xacemento arqueolóxico do monumento con forno localizado no 2017 no castro de Punta Sarridal.
A concelleira de Cultura e Turismo de Cedeira e o xeólogo Francisco Canosa coincidiron á hora de destacar tanto a relevancia do monumento como a importancia de incluílo nun dos trazados das xeorutas dentro das actividades do proxecto do xeoparque. “É todo un luxo poder coñecer e gozar do noso contorno a nivel xeolóxico e tamén arqueolóxico” manifestou María Xosé Rodríguez, para engadir que “as xeorutas guiadas que ofrece o Concello de Cedeira están a disposición de toda a veciñanza e visitantes, para que poidan coñecer e desfrutar o noso patrimonio xeolóxico e agora tamén cunha mostra do arqueolóxico”.

Desde Moeche son dous os puntos que se dan a coñecer con estas xeorutas, a Mina Piquito e as canteiras de toelo, a “pedra de Moeche”. Darán comezo o 8 de xullo e rematarán o 1 de setembro. Dúas delas dedícanse á Xeoruta do toelo, que inclúe a visita ao Castelo de Moeche, e as outras doce xeorutas correspóndense coa Mina Piquito, un interesante percorrido guiado que se interna na derradeira mina subterránea de cobre que pechou en Galicia, contra o ano 1969, e permite observar excepcionais formacións de estalactitas e estalagmitas de cor azul, verde, branca,
marrón e negra. As visitas desenvólvense da man do xeólogo Francisco Canosa e, en palabras da alcaldesa, Beatriz Bascoy, “permiten ampliar a oferta turística do concello e da comarca a través do coñecemento non só do patrimonio xeolóxico, tamén da forma de vida en epocas non moi afastadas en Moeche e dunha dura profesión.”

Información na seguinte ligazón http://rutasxeoloxicasdegalicia.blogspot.com/

O II festival de música Galego-Portuguesa comeza hoxe en Cedeira con actividades e concertos

O II FESTIVAL DE MÚSICA GALEGO-PORTUGUESA COMEZA HOXE
EN CEDEIRA CON ACTIVIDADES E CONCERTOS

Hoxe comeza en Cedeira a segunda edición do Festival de Música Galego-Portuguesa, unha magnífica oportunidade para descubrir a cultura lusófona a través da música, charlas e espazos creativos, segundo se pon de manifesto desde o equipo de goberno.

O programa arrinca coa celebración dun obradoiro de danza africana que, a partir das 18.00 horas, terá lugar na sala Áncora e será impartido por María Coutinho, coa colaboración do grupo Buxainas.

A actividade trasladarase a continuación ao palacete municipal, onde o profesor de lingua portuguesa na Escola Oficial de Idiomas da Coruña José Luís Fernández impartirá a charla que leva por título “O português no mundo da comunicaçâo”. Será ás 19.00 horas.

A primeira xornada, das tres que dura o festival en Cedeira, pechará coa celebración do concerto que, ás 22.00 horas, terá lugar no auditorio municipal. A entrada é libre e gratuíta.

O Concello de Cedeira invita á veciñanza e en xeral aos veciños de toda a comarca a sumarse a unha iniciativa coa que se quere estreitar lazos de comunicación e amizade con Portugal, así como contribuír a difundir a cultura común que existe entre ámbolos dous países e que ten como fío común a lingua.

Éxito da rapa da Capelada deste ano garante a continuidade da celebración

ÉXITO DA RAPA DA CAPELADA DESTE ANO GARANTE A CONTINUIDADE DA CELEBRACIÓN

A Asociación San Andrés de Teixido Eventos volverá a estar ao fronte.

O éxito de asistencia e participación na rapa das bestas celebrada o día 3 na serra da Capelada leva aos seus organizadores a pensar xa nunha nova edición. Así o confirma o presidente da Asociación San Andrés de Teixido Eventos, Jorge Bellón Rodríguez, que agradece a colaboración de veciños, Concello, comerciantes e do pobo de Cedeira en xeral na recuperación dunha tradición que, por distintas razóns, “se atopaba en horas baixas”. O ano
pasado non houbo.

A axuda recibida, segundo Bellón Rodríguez, vén de confirmar a interese que existe por parte da xente de Cedeira en conservar unha cita que foi referencia a nivel autonómico, polo que o presidente da entidade tamén se mostrou moi contento e comprometido en poñerse de novo ao fronte da festa para garantir a súa celebración dentro do calendario festivo local.

“Falei con xente maior que non recordaba unha rapa con tantas bestas, unhas 230, apuntou o presidente da Asociación de San Andrés de Teixido Eventos, que tamén destacou que a organización do programa se conseguiu nun tempo récord, catro meses, e recoñeceu que houbo certa intranquilidade por ter que mudar a data da convocatoria polos compromisos laborais da maioría das oito persoas que formaron parte da comisión organizadora. A festa viña sendo a finais de xullo.

Os resultados e as felicitacións recibidas nos últimos días levan a Jorge Bellón a pensar que o pobo de Cedeira “está contento pola recuperación da festa e aínda se implicará máis na próxima”.

O alcalde de Cedeira, Pablo Moreda Gil, sumouse aos agradecemento da organización “ás moitas persoas que contribuíron á recuperación desta festa, que ten moitos afeccionados e que, ademais, xoga un papel moi importante no que ao saneamento do gando se refiere”. Moreda Gil tamén recoñeceu a intención do goberno local de seguir colaborando coa Asociación San Andrés de Teixido Eventos para que non se perda unha festa de moita tradición.