Skip to content Skip to left sidebar Skip to footer

CULTURA

MATERIAL DEPORTIVO, CENTRO MUSICAL E PARQUE CANINO, ENTRE AS PROPOSTAS DOS ORZAMENTOS PARTICIPATIVOS

O alumnado de 3º de ESO do IES Punta Candieira ten listas xa catro propostas para os Orzamentos Participativos de Cedeira que serán sometidos a votación en asemblea o vindeiro día 26. A terceira edición deste proceso democrático, no que o Concello reserva 20.000€ das súas contas para investilos no que decidan os mozos e mozas do instituto, culminará o 5 de maio nun pleno extraordinario no que eles defenderán a súa proposta final e que servirá tamén para aprobar a constitución do Consello Local da Infancia e Adolescencia.

Un total de 47 alumnas e alumnos de 3º de Secundaria foron este ano os implicados no proceso de Orzamentos Participativos, que se desenvolve por terceiro ano consecutivo en Cedeira. Nos últimos meses recibiron formación sobre a elaboración de proxectos, diagnóstico do territorio e funcionamento da administración municipal e as súas competencias. Pasaron despois a elaborar propostas de gasto que, como xa sucedeu en anos anteriores, están moi centradas no eido do deporte e na programación de actividades culturais. A concelleira de Participación Cidadá e Xuventude, Carmela Prieto, destaca a excelente experiencia que supón este proceso “para os rapaces e rapazas, porque coñecen en primeira persoa os procedementos e condicionantes que ten o goberno local para sacar adiante calquera iniciativa, e tamén para os propios políticos, porque podemos escoitar directamente as demandas das novas xeracións”.

Finalmente, as propostas viables que serán elevadas á asemblea de votación do vindeiro mércores son as seguintes:

 CEDEIRA RESPIRA DEPORTE / ADQUISICIÓN DE EQUIPAMENTO DEPORTIVO PARA O XIMNASIO MUNICIPAL, por importe de 22.602,47€. Na proposta inclúense varios xogos de halteres, ketlebel ou pesas rusas, moble de baldas para gardar este material e 8 máquinas para o fortalecemento de diversos músculos e partes do corpo (dorsais, abductores, femorais, glúteos, deltoides, etc.)

 LUZ NO SKATE BOWL, consistente nun punto de iluminación para o paseo marítimo na zona do skate bowl (2 proxectores de luz instalados nunha columna) por importe de 4.694,05€.

 CENTRO MUSICAL, coa adquisición de equipamentos musicais e para poder gravar cancións, coa idea de formar grupos musicais ou bandas por importe de 5.000,00€

 PUPPY PARK ou construción dun parque canino na Rúa Ortigueira 16, con valado de madeira para peche e porta de dobre acceso, cartel indicativo en poste de madeira. Inclúe a instalación de varios módulos, como slalom, módulo de pasarela, de roda de detención e túnel para cans, ademais de papeleira. Esta iniciativa vai á asemblea por importe de 26.065,99€

Aínda que algunhas destas propostas exceden da cifra de 20.000€ reservada aos Orzamentos Participativos, o Concello de Cedeira decidiu incorporalas igualmente. Outras non chegaron a esta fase final por estar xa en proxecto ou mesmo en funcionamento e algunhas quedaron fóra por ser inviables técnica ou economicamente, como unha nota piscina municipal, a creación dun carril bici, unha boleira ou unha pista de karts.

A asemblea do vindeiro día 26 celebrarase no salón de actos do IES Punta Candieira. O alumnado elixirá a representación que vai levar diante do pleno da corporación municipal o resultado da súa votación, o vindeiro 5 de maio.

PUBLICADAS AS BASES DAS SUBVENCIÓNS CULTURAIS, DEPORTIVAS E COMISIÓNS DE FESTAS

O BOP ven de publicar as bases das subvencións para as entidades deportivas, asociacións socioculturais e comisións de festas .

Nas seguintes ligazóns pode accederse aos textos íntegros das bases das subvencións:

IR Á LIGAZÓN BASES DAS SUBVENCIÓNS PARA AS ENTIDADES SOCIOCULTURAIS
➡️ https://cedeira.gal/wp-content/uploads/2023/04/BASES-LIBRE-CONCORRENCIA-CULTURAIS-2023.pdf

IR Á LIGAZÓN BASES DAS SUBVENCIÓNS PARA AS ENTIDADES DEPORTIVAS
➡️ https://cedeira.gal/wp-content/uploads/2023/04/BASES-LIBRE-CONCORRENCIA-DEPORTIVAS-2023.pdf

IR Á LIGAZÓN BASES DAS SUBVENCIÓNS PARA A COMISIÓN DE FESTAS
➡️ https://cedeira.gal/wp-content/uploads/2023/04/BASES-COMISIONS-DE-FESTAS-2023.pdf

Máis información:
https://cedeira.gal/subvencions-municipais

APROBADAS AS BASES DA NOVA CONVOCATORIA DE AXUDAS PARA ASOCIACIÓNS SOCIOCULTURAIS DE CEDEIRA

A Xunta de Goberno Local vén de aprobar a nova convocatoria de subvencións para entidades e asociacións socioculturais de Cedeira, que neste 2023 incrementa a súa dotación nun 66% respecto ao ano pasado e chega a un total de 60.000€. Como en exercicios anteriores, o programa estrutúrase en dous apartados, o de actividades e o de investimentos, un para apoiar os gastos de funcionamento, desprazamentos, persoal, seguros e todo o que é preciso para o funcionamento das entidades e todas as súas propostas, e outro para que poidan mercar diferentes materiais inventariables que fan posible ou melloran o seu labor.

O prazo para solicitar estas axudas, que se concederán en réxime de concorrencia competitiva en función da aplicación dos criterios obxectivos establecidos na convocatoria, será de 15 días a partir da publicación das bases –en próximas datas- no Boletín Oficial da Provincia. O gasto das axudas concedidas deberá realizarse antes do 15 de novembro e a xustificación do mesmo terá que estar presentada antes do 30 do mesmo mes deste ano.

Ao capítulo de actividades destinou o Concello de Cedeira unha contía de 45.000€ este ano (foi de 30.000 en anos anteriores). As axudas, neste caso, van destinadas a subvencionar actividades musicais, teatrais e outros programas e actividades socio-culturais. Son gastos que poden acollerse a esta liña a compra de trofeos, material non inventariable e funxible, desprazamentos para participar en eventos, alugamento de locais e materiais, pago a persoal, facturas de mantemento como o teléfono, a luz, etc., seguros, cartelería e demais traballos de divulgación das actividades.

No apartado de investimentos, ao que o Concello reserva 15.000€ (eran 6.000€ en convocatorias anteriores), as entidades poden atopar os recursos precisos para mercar material, sempre inventariable e con importe igual ou superior a 100€, que estea directamente relacionado coa súa actividade.

Tal como establecen as bases, entre os criterios puntuables para a concesión das axudas está o número de socios, antigüidade, instalacións, desenvolvemento de actividades nas parroquias, participación feminina, contratación de persoal, desprazamentos, etc.