CULTURA

O CONCELLO PON EN MARCHA O PROGRAMA DE VERÁN “DE RUTA”

O Concello de Cedeira pon en marcha durante o mes de agosto o programa ”De Ruta” con saídas guiadas a pé polos excepcionais paisaxes do municipio. As saídas que serán os días 2, 4, 9, 23, 25, 30 de agosto, todas de balde e cun límite máximo de 15 participantes.

O programa “De Ruta” comezará o mércores 2 de agosto cun percorrido ao faro de Robaleira. Será unha saída de 8km, de dificultade baixa/media e que se realizará nunhas catro horas, con saída desde a oficina de turismo ás 10.00 da mañá. O itinerario será circular, parte del polo sendeiro que vai desde as vellas fábricas de San Isidro ao faro. Unha vez alí o grupo poderá ver a antiga cetaria, a cala Mi Señora e gozar coas vistas da ría de Cedeira. A volta realizarase polo camiño que leva da praia das Cerdeiras ao Barral. Poderase facer esta ruta tamén o mércores 30 de agosto.

Para os venres 4 e 25 de agosto, a proposta é unha ruta polos Altos de Santo André. Serán tamén 8km dunha dificultade técnica baixa/media, pero con saída desde o mirador dos Carrís ás 10.00 da mañá, e o percorrido irá pola Serra da Capelada e permitirá gozar coas vistas dos cantís de Santo André de Teixido, a Vixía de Herbeira e as rías de Ortigueira e Cedeira.

Os mércores 9 e 23 de agosto, farase un percorrido circular no entorno de Punta Candieira, cubrindo unha distancia de 9km que, se estima, levará catro horas. Saída desde a oficina de turismo ás 9.30h. Facilitarase o traslado até o inicio da ruta a todas/os as/os participantes.

As persoas interesadas teñen que realizar a súa inscrición no Polideportivo Municipal, ou ben chamando ao número 981 482 633 ou enviando un mail a polideportivocedeira@gmail.com.

OS CONCERTOS SERÁN OS PROTAGONISTAS DAS FESTAS NA HONRA DE SANTA ANA, OS VINDEIROS 25 E 26 DE XULLO

O Concello de Cedeira organiza unha serie de actividades coa música como protagonista. Os vindeiros 25 e 26 de xullo a vila celebra as Festas na Honra de Santa Ana.

A primeira actuación musical vén da man do dj Brunookavvi, que ofrecerá unha sesión ás 23.30 horas o martes 25 na Praza Roxa. Na mañá do día 26, ás 12 horas terá lugar unha misa cantada pola Coral Eixil de Cedeira e a tradicional procesión polo casco antigo acompañada pola Banda de música Vila de Cedeira, que ofrecerá ao rematar un concerto na Praza Roxa. Á noite, haberá unha verbena ás 22.30 horas na Praza Roxa coa Orquesta Finisterre.

Paralelamente, do 25 ao 28 de xullo, na praza da Revolta haberá tobogáns inchables xigantes, unha actividade gratuíta que estará aberta de 11.30 a 12 horas e de 16.30 a 20.00 horas (excepto o 25 que só será en horario de tarde).

Outros concertos

Esta noite, o grupo Amaltea ofrece un concerto no marco da súa segunda xira por Galicia, na que van a presentar temas que aparecerán nas súas próximas gravacións e algunhas cancións do seu primeiro álbum. Será no Auditorio Municipal (rúa María Mediadora, esquina rúa Convento) ás 21 horas. O prezo das entradas establécese mediante billeteira inversa, pois o espectador decide despois do espectáculo canto quere pagar polo que escoitou.

Mañá, sábado día 22, o Auditorio acolle o Festival de Verán Rondalla de Cedeira, ás 20 horas. Participarán a coral polifónica ferrolana, A Magdalena, a coral polifónica Costumes de Bergondo e a Rondalla de Cedeira.

O AUDITORIO MUNICIPAL ACOLLE ESTE SÁBADO, 15 DE XULLO, O XXVI FESTIVAL DE MÚSICA CORAL E HABANERAS

A Asociación cultural Virxe do Mar organiza outro ano máis xunto coa colaboración do Concello o XXVI Festival de Música Coral e Habaneras. O evento musical, que é gratuíto, celebrarase este sábado, 15 de xullo, ás 19 horas no Auditorio Municipal (rúa María Mediadora, esquina rúa Convento).

Este ano o evento é máis especial, pois conmemora tamén os 26 anos da Coral Virxe do Mar, que celebra unhas vodas de prata que por mor da pandemia non se puideron celebrar antes. A Coral Virxe do Mar comezou en 1997, e ata a actualidade ofreceu concertos e actuacións en diferentes puntos de Galicia e en varias Comunidades Autónomas de España, así como en cidades europeas como Praga. Actualmente integran a agrupación arredor de 25 coralistas, que recibirán un pequeno detalle no evento como mostra de agradecemento polo compromiso e entrega coa Coral.

Este ano participarán no concerto, ademais da Coral Polifónica Virxe do Mar, de Cedeira, dúas agrupacións de Ferrol: a Coral Polifónica de Caranza e a Rondalla Añoranzas. Cada unha interpretará un total de cinco cancións.