Skip to content Skip to left sidebar Skip to footer

MOCIDADE

CEDEIRA RECUPERA O SAMAÍN E CHAMA Á VECIÑANZA E VISITANTES A PASALO DE MEDO

Cedeira volve a celebrar o Samaín este ano con moitos azos e case que con total normalidade, despois dunha edición de mínimos pola pandemia. A vila, lugar indispensable para explicar a recuperación e o novo auxe que ten esta festa de orixe celta, convértese de novo no epicentro desta celebración en Ferrolterra e en Galicia. A concelleira de Cultura, Ermitas García, destacou que o programa mantén case todos os actos habituais e invitou tanto á veciñanza como ás persoas doutras localidades a achegárense á localidade para participar e pasalo de medo.

O programa inaugúrase xa este xoves cun espectáculo dirixido a nenos e nenas de entre un e catro anos. Trátase de Nano Canta Croac, un contacontos musical a cargo da actriz Raquel Queizás no que se amosa ás crianzas como expresaren as súas emocións. Será ás 19.00 horas no Auditorio Municipal.

As actividades centrais do Samaín desenvolveranse o venres e o sábado baixo as carpas que se van instalar no Paseo da Mariña. Alí faranse este venres, a partir das 17.00 horas, os tradicionais obradoiros de zonchos, e terá lugar o espectáculo de Brais das Hortas Contos para caghar patatillas, ás 20.00 horas e dirixido a un público familiar. Ao día seguinte, o sábado a partir das 17.00 horas, poderán depositarse alí as cabazas decoradas para ir fomando unha participativa e tebrosa exposición. Ao longo da tarde celebraranse baixo a carpa os obradoiros de tallado de cabazas e de maquillaxe, para que as persoas que queiran, maiores ou pequenas, esculpan alí mesmo rostros tétricos nas cabazas ou pinten as súas propias caras con expresións que dean arrepío.

Ás 20.30 horas, o mesmo sábado, comezará o “Pasacalle das Pantasmas”, sen dúbida a actividade máis popular do programa, no que se coidará de que as persoas participantes manteñan a distancia anti-covid.

O programa terá outra cita máis o luns, día 1 de novembro. De novo no Auditorio Municipal, ás 19.00 horas, David Maestro ofrecerá a súa función de maxia Soñando desperto.

A recuperación do Samaín en Cedeira cumpriu xa máis de tres décadas e foi resultado da iniciativa do profesor Rafael López Loureiro e a entidade Chirlateira, á que lle tomou despois o relevo a Asociación de Amigos do Samaín. O Concello de Cedeira colabora estreitamente desde hai anos con esta entidade na organización conxunta desta festa, que adquiriu gran relevancia en toda Galicia pola súa popularidade e autenticidade.

O cartel deste ano, que representa a un par de cativas camiñando entre cabazas baixo dous paraugas que emulan dúas cabazas talladas, foi obra de Laura Recio Hidalgo (@aole.ilustra en Instagram), unha ilustradora e deseñadora madrileña vencellada a Cedeira que leva anos colaborando co Samaín, encargándose tanto doutros carteis como do mural que desde o ano pasado decora unha parede da rúa da Cruz, polo que tradicionalmente pasa a ruada das pantasmas.

CEDEIRA VAI HABILITAR NA SERRA DA CAPELADA A PRIMEIRA VÍA FERRATA DE GALICIA

A Serra da Capelada vai contar en breve coa primeira vía ferrata de Galicia, unha instalación deportiva que facilita a práctica da escalada a persoas non iniciadas en dita práctica. Segundo informou o alcalde de Cedeira, Pablo Diego Moreda Gil, o goberno local confía no éxito que vai ter este novo recurso para a dinamización do turismo na zona, concretamente para o ocio activo ou de aventura, coa vantaxe de que non existen outras ferratas na comunidade e co atractivo indubidable das espectaculares paisaxes que acompañarán o percorrido pola Capelada.

A empresa Tierra&Ferrol Mountain Logistics encargarase da subministración e colocación dos elementos que compoñen a ruta por un orzamento de 17.998€ (IVE incluído), despois de presentar o prezo máis vantaxoso e de ofrecer, a maiores, a realización dun informe de certificación coa realización de probas de tracción aos diferentes elementos.

As vías ferrata son itinerarios por paredes verticais ou horizontais, nos que se colocan oportunamente banzos, cravos, grampas, pasamáns, cadeas, pontes ou tirolinas coas que as persoas que realizan a ruta poden progresar, sempre suxeitas cun cable de vida e equipadas co arnés, casco e outros aparellos necesarios. Trátase dun tipo de instalación deportiva que comezou a ter moita sona nos últimos anos e que representa un atractivo para o turismo activo e de aventura.

Segundo subliñou Moreda Gil, a vía ferrata “é unha peza máis que vai sumar forzas no proxecto do Xeoparque Cabo Ortegal, o marco no que o Concello de Cedeira está a traballar, xunto aos outros seis implicados, para o desenvolvemento do turismo e o desenvolvemento sostible”. Este roteiro de escalada pola Capelada será outra forma máis de que a xente coñeza e valore as condicións xeolóxicas extraordinarias da zona e goce dunha experiencia diferente, afastada dos circuítos turísticos máis masificados.

A vía terá dous itinerarios, con diferentes niveis de dificultade, nos que haberá paneis informativos e explicativos para as persoas que acudan a realizalos. Coa vía ferrata, o Concello de Cedeira fai unha aposta máis pola diversificación da oferta deportiva no municipio, á que se une o parque de calistenia que se instalou este verán e o skatebowl que se está a construír.

ABERTO O PRAZO DE PREINSCRICIÓN AOS CURSOS DA CONCELLERÍA DE CULTURA

O prazo de inscrición será desde hoxe mércores 22 ao martes 28 de setembro (ás 14.00h).

Poderase presentar as solicitudes a través de:

  • Presencial no rexistro xeral de 9.00h a 14.00h.
  • Na oficina de turismo de 9.00h a 14.30 e de 15.30 a 21.00h.
  • Telemáticamente a través da sede electrónica do concello: https://sede.cedeira.gal/opencms/gl/

A resolución e comunicación de cursos a realizar e lugar e forma de pago de taxas será o venres 1 de outubro.

A idade mínima ara participar é nados/as no 2016 para “todas as idades” e no 2005 para “persoas adultas”.

Os cursos desenvolveranse sempre tendo en conta un número mínimo de persoas inscritas en cada un deles.

Pódese descargar a ficha de preinscrición na seguinte ligazón:

Descarga PDF ficha de preinscrición