Skip to content Skip to left sidebar Skip to footer

MOCIDADE

O CLIA COMEZA A TRABALLAR PRIORIZANDO E TRASLADANDO VARIAS PROPOSTAS AO GOBERNO MUNICIPAL

O Consello Local da Infancia e a Adolescencia de Cedeira, constituido a finais do pasado ano, está xa a traballar para cumprir co seu obxectivo de ser un espazo de reflexión e debate sobre a realidade do municipio e ter un papel activo como órgano consultivo que é para o goberno municipal. Nas súas primeiras reunións, os 30 nenos e nenas e mozos e mozas que integran o CLIA decidiron o seu nome, “Ondiñas da vila” e acordaron dar prioridade a tres das liñas de traballo que están contempladas no Plan de Infancia e Adolescencia de Cedeira.

Así, a promoción da Saúde mental entre os menores, a organización de obradoiros sobre sexualidade para alumnado do IES Punta Candieira e a participación do CLIA como grupo asesor da programación de actividades culturais e deportivas son as cuestións sobre as que o consello decidiu focalizar os seus primeiros esforzos e que xa ten trasladado ás diferentes concellerías do goberno municipal. Decidiuse isto despois dunhas reunión mantidas, a finais de febreiro, con representantes do CEIP Nicolás do Río e o IES Punta Candieira.

Outras cuestións que tamén están no Plan de Infancia de Cedeira e nas que o CLIA ten previsto traballar son a organización de xornadas de limpeza nas praias, unha campaña para previr a violencia sexual e ofrecer información sobre os recursos nesta materia, a instalación dun merendoiro en San Isidro, o autocine de verán e unha programación de cine no Auditorio. Igualmente, xunto co nome, o CLIA traballa no deseño dun logo que o identifique.

ESPECTÁCULO MUSICAL E TEATRAL ARREDOR DA FORMA E O SON DA TROMPA PARA O PÚBLICO INFANTIL

O Auditorio Municipal de Cedeira acollerá este sábado, ás 19.00h, o espectáculo musical e teatral “A trompa non só é cousa de elefantes” dirixido aos máis pequenos. A función corre a cargo do cuarteto de trompas Catro Cores, formado por catro mulleres, que van descubrindo sobre o escenario a forma e o son deste instrumento, co que ofrecerán diferentes pezas musicais nun recital pensado para estimular a vista e o oido.

O cuarteto Catro Cores está formado por Aida Lozano, Ana Vergara, a cedeiresa Mónica García Bereijo e Alma Sarasola, catro trompistas con ampla experiencia e que coincidieron tocando nunha orquestra sinfónica. Desde 2014, a súa boa conexión plasmouse neste grupo de cámara, co que levan a música a todo tipo de público.

As entradas estarán á venda por 2,5€ na billeteira, o mesmo sábado, desde media hora antes do comezo do espectáculo. Tamén poden reservarse anticipadamente a través de whatsapp, no número 649 876 614. A obra está incluída na programación da Rede Cultural de Teatros e Auditorios da Agadic.

O CONCELLO DE CEDEIRA RECUPERA NESTAS FESTAS O CAMPAMENTO CONCILIA PARA NENOS E NENAS

O Concello de Cedeira recupera este ano o campamento Concilia para ocupar con xogos e actividades as mañás de nenos e nenas nados entre os anos 2011 e 2018 e facer compatible a vida familiar e laboral durante as vacacións de Nadal. O programa funcionará nos días laborables entre o 22 de decembro e o 5 de xaneiro, ambos incluídos, entre as 09.00 e as 14.00 horas. Hai un total de 60 prazas e as solicitudes poderán presentarse ata o día 14 de decembro.

O campamento Concilia estará atendido por tres monitores/as que desenvolverán moi diversas actividades cos nenos e nenas. Haberá xogos inchables, karaoke, photomaton con impresora, labirinto, obradoiros con materiais de refugallo…

Nas bases do campamento Concilia establécese que cinco das 60 prazas disponibles serán para nenos ou nenas cun grao de discapacidade igual ou superior ao 33%. Na inscrición, terán preferencia os menores empadroados en Cedeira, e a continuación aqueles cuxos titores traballen no termo municipal. Atendendo a isto, a continuación tamén terán prioridade as unidades familiares nas que ambos proxenitores acrediten traballar polas mañás ou ben estar realizando un curso de formación na mesma franxa horaria. Nas bases, que están colgadas no taboleiro de anuncios da sede electrónica do Concello, está o formulario de inscrición e os documentos a presentar.

Cómpre recordar que o Concello de Cedeira tamén vai organizar xogos e actividades de lecer no Polideportivo Municipal durante as tardes do periodo de vacacións, así como dúas festas acuáticas na piscina municipal.

Pódese descargar as bases campamento urbano de Nadal 2023 na seguinte ligazón:

Descarga PDF Bases campamento nadal 2023