MOCIDADE

O colexio Nicolás del Río xa ten o seu propio desfibrilador, que no verán operará na praia

O COLEXIO NICOLÁS DEL RÍO XA TEN O SEU PROPIO DESFIBRILADOR, QUE NO VERÁN OPERARÁ NA PRAIA

O Concello de Cedeira acaba de facer entrega dun desfibrilador á comunidade escolar do Nicolás del Río. Trátase do terceiro equipo destas características que está a funcionar no municipio e chega despois dos instalados no campo de fútbol e pavillón municipal.

O acto tivo lugar hoxe nas instalacións do colexio e no mesmo déronse cita o alcalde, Pablo Moreda Gil; a directora do centro, Marta Cameselle; a concelleira de Turismo, Carmela Prieto Cal, e o secretario e profesor de Educación Física, Alejandro Martínez.

O alcalde, Pablo Moreda Gil, destacou a intención do executivo local de crear unha rede de desfribriladores que abarque a totalidade das instalacións municipais coa intención de poñer as ferramentas necesarias para poder actuar o máis axiña posible ante un accidente cardiorrespiratorio. Moreda tamén apuntou que, durante os meses de verán, este novo desfibrilador estará operativo para atender aquelas posibles urxencias que poidan ter lugar no areal da Madalena.

Pola súa banda, a directora do Nicolás del Río agradeceu o “agasallo” do Concello e explicou que, cando menos, desde a dirección do colexio existe a intención de facer partícipe ao alumnado da incorporación deste novo aparato á vida cotiá do centro así como informar dos seus usos.

O investimento, asumido na súa totalidade polo Concello, superou os 1.800 euros.

O Concello repartirá esta semana o boletín As7parroquias que volve á rúa despois do verán

O CONCELLO REPARTIRÁ ESTA SEMANA O BOLETÍN AS7PARROQUIAS QUE VOLVE Á RÚA DESPOIS DO VERÁN

O boletín As7parroquias, que edita o Concello de Cedeira para ter informada a veciñanza, volverá este xoves estar na rúa despois do verán. Por esta razón, na publicación recóllense balances moi exitosos tanto no campo deportivo como no relativo á campaña turística, así como outros moitos asuntos de actualidade.

Durante o tempo estival o municipio acolleu competicións de tríatlon, pádel, fútbol sala e fútbol praia, ao tempo que recibía unha morea de viaxeiros que se achegaron á vila para visitar o castelo da Concepción, o santuario de Santo André de Teixido ou mesmo para tomar parte nas xeorrutas e roteiros promovidos polo Concello dentro da súa oferta turística. Case 7.000 persoas pasaron este verán pola oficina de turismo e xa son máis de 2.000 as que nos últimos tres anos se acercaron á xeoloxía a través das saídas gratuítas, que fan desta riqueza natural un recurso turístico diferencial.

No boletín tamén houbo espazo para explicar os contidos dos orzamentos que se aprobaron no mes de agosto e estarán vixentes ata final de ano, a aposta do goberno municipal para incrementar o número de lámpadas de tecnoloxía LED tanto na zona rural como urbana, así como a licitación da obra que fará do castelo da Concepción o centro interpretativo do xacemento arqueolóxico de Punta Sarridal.

Cedeira convoca cursos gratuítos de pintura, manualidades e tapices

CEDEIRA CONVOCA CURSOS GRATUÍTOS DE PINTURA, MANUALIDADES E TAPICES

O Concello de Cedeira acaba de abrir o prazo de inscrición para as persoas interesadas en participar en cursos gratuítos de pintura, manualidades e tapices. As clases, que darán comezo o 14 de outubro, finalizarán o mesmo día pero do mes de decembro e serán impartidas por Andrés Urrutia, no caso do obradoiro de pintura, e Fernando Villoslada e Tapices Galicia (Fina e Xavier) nos de manualidades e tapices, respectivamente.

Os interesados xa poden formalizar as reservas de prazas. Así, para os cursos de manualidades e tapices haberá que apuntarse na oficina de turismo (Palacete Municipal, no teléfono 981 482 187 ou no e-mail: enrique.vazquez@cedeira.gal), mentres que para o de pintura hai que chamar ao teléfono 650 610 358. O prazo finaliza o día 11 de outubro.

En canto aos contidos e localización, o Palacete Municipal acollerá as clases de elaboración de tapices, que serán os luns en horario de 10.00 a 13.00 e de 16.00 a 19.00 horas. Pola súa banda, o de manualidades, que se impartirá os martes e venres de 19.00 a 21.00 horas, terá como referencia os baixos da praza da Rectoral e inclúe modelaxe de barro-escaiola-xeso, elaboración de moldes e restauración. O curso de pintura ocupará o terceiro piso das vivendas sindicais. As clases serán o luns e martes en horario de mañá e os mércores e xoves, no de tarde.

O goberno municipal anima a veciñanza a participar nestas iniciativas de carácter gratuíto e con moitas posibilidades tanto a nivel de formación como de entretemento.

En outubro arrinca o curso 2019-2020 de Batukada Discalz@s no Escolar de Piñeiro

EN OUTUBRO ARRINCA O CURSO 2019-2020 DE BATUKADA DISCALZ@S NO ESCOLAR DE PIÑEIRO

Entre os meses de outubro de 2019 e xullo de 2020 desenvolveranse no Escolar de Piñeiro as clases grupais de Batukada Discalz@s, para adultos e nenos e nenas a partir de 4 anos.

As clases terán lugar os martes polas tardes, e os sábados á mañá os ensaios do grupo batukada. Desde a organización do curso subminístrase todo o material e os instrumentos necesarios para os asistentes ás clases.

As persoas interesadas deberán chamar ao número 629 606 767 (Berta).

Cedeira incentiva a participación da veciñanza no certame Yutubeir@s, que vén de ser premiado

CEDEIRA INCENTIVA A PARTICIPACIÓN DA VECIÑANZA NO CERTAME YOUTUBEIR@S, QUE VÉN DE SER PREMIADO

O Concello de Cedeira promove a participación da veciñanza no certame “Youtubeir@s”, unha iniciativa impulsada polos Servizos de Normalización Lingüística de trece concellos galegos, incluído o local, a Deputación da Coruña e as universidades da Coruña, Santiago de Compostela e Vigo.

O obxectivo da convocatoria é fomentar e visibilizar o uso do galego en You Tube, buscando principalmente a complicidade a xente moza con premios en metálico que van desde os 500 aos 1.000 euros dependendo da categoría.

Vídeo-facermos, vídeo-opinarmos, canle e vídeo-cantarmos son as catro modalidades abertas á participación de todas as persoas maiores de 14 anos que desexen tomar parte nun certame que premia os vídeos en galego autoproducidos e subidos a You Tube de xeito independiente con data posterior ao 15 de marzo do 2018.

No caso de tratarse de persoas menores de idade, a petición deberá ir acompañada da autorización do pai/nai ou titor/a legal mediante o documento que se fornece na web do proxecto (http://youtubeiras.gal/). O prazo de inscrición finaliza o día 27 do presente mes de setembro. O goberno municipal anima aos veciños e veciñas a implicarse nun proxecto innovador, polo asunto do uso das tecnoloxías, e mesmo motivador, por cando favorece a creatividade, ademais de contribuír á difusión da cultura galega.

Precisamente, este sábado, día 21 de setembro, terá lugar o acto de entrega do premio Mil Primaveras que vén de recibir o proxecto Youtubeir@s polo seu carácter innovador. O acto terá lugar no Pazo de Cultura de Pontevedra.

Os premios Mil Primaveras son unha iniciativa da coordinadora de traballadores/as de Normalización da Lingua para recompensar e proxectar o traballo ben feito no ámbito da normalización lingüística, darlle visibilidade a proxectos positivos e seleccionar boas prácticas que poden servir como modelos.

No caso de Youtubeir@s, o galardón foille concedido “por abordar un medio prioritario para o futuro do idioma”, xa que ten unha grande capacidade de atracción na xente nova. Igualmente, o xurado valorou o uso que se fai de linguaxes e estratexias comunicativas atractivas para a mocidade e que favorece que “as persoas que transmiten a través de You Tube o fagan en galego e que as que comunican en galego o fagan en You Tube”.

O programa “Cantos e contos ao solpor” arranca este sábado con teatro ao pé da laranxeira do Concello

O PROGRAMA “CANTOS E CONTOS AO SOLPOR” ARRANCA ESTE SÁBADO CON TEATRO AO PÉ DA LARANXEIRA DO CONCELLO

Este sábado arrinca na vila unha nova edición do programa “Cantos e Contos ao Solpor”, unha iniciativa do goberno de Cedeira para pasar do verán ao outono da man do teatro, a música e historias populares.

Esta primeira convocatoria correrá a cargo da compañía Rilo&Penadique, que porá en escena a obra “O pazo das señoras”, un espectáculo no que se relatan historias sorprendentes protagonizadas por mulleres e contadas coa incrible capacidade de narrar de Vero Rilo e a sutileza musical de Sonsoles Penadique. É un espectáculo de monicreques e contos de 50 minutos de duración e dirixido a un público familiar.

A programación de “Contos e Cantos ao Solpor” terá continuidade o sábado día 21 de setembro co espectáculo “Maquinarias teatro e Roger de Flor”, un concerto acústico con cancións cantadas e outras tan só recitadas do compositor e Premio Nobel de Literatura Bob Dylan.

A laranxeira que está ao pé do Concello volve ser un ano máis a referencia para as persoas que queiran asistir a unhas citas culturais gratuítas e que comezan ás oito da tarde.

Cedeira informa da convocatoria de cursos Celga e de linguaxe administrativa na EOI de Ferrol

CEDEIRA INFORMA DA CONVOCATORIA DE CURSOS CELGA E DE LINGUAXE ADMINISTRATIVA NA EOI DE FERROL

O Concello de Cedeira informa da apertura do prazo de matrícula para asistir a cursos de linguaxe administrativa e preparatorios para os certificados de galego (Celga 3 e Celga 4) que, entre os meses de outubro do 2019 e maio do 2020, se impartirán na Escola de Idiomas de Ferrol. A participación é gratuíta e a formación tanto pode ser presencial como en liña.

No caso do Celga 3, as clases comezarán no mes de outubro e rematarán en xaneiro e serán os martes, xoves e venres en horario de 11.00 a 12.30 horas.

Pola súa banda, o Celga 4 dará comezo en febreiro e finalizará no mes de maio e o programa académico impartiranse os martes, xoves e venres no mesmo horario que o anterior.

As persoas interesadas deberán cubrir o formulario de inscrición telemática na seguinte ligazón:

IR Á LIGAZÓN formulario de inscrición telemática cursos Celga

As solicitudes cubertas adecuadamente entenderanse presentadas na secretaría da escola oficial de idiomas unha vez que se complete correctamente o proceso de matriculación.

Os prazos para apuntarse son: do 3 ao 11 de setembro, para os cursos do primeiro cuadrimestre (outubro-xaneiro), e do 30 de decembro de 2019 ao 10 de xaneiro de 2020, para o segundo (febreiro-maio).

A obtención do número para a adxudicación das prazas nos cursos do primeiro cuadrimestre realizarase en acto público o día 13 de setembro, ás 13.00 horas, na Escola Oficial de Idiomas de Lugo e, a partir do día seguinte, tamén se poderá consultar na aplicación web. As datas para a adxudicación das prazas nos cursos do segundo cuadrimestre serán o 14 de xaneiro na Escola Oficial de Idiomas da Coruña e o 15 dese mesmo mes na web.

Unha vez rematado o proceso de asignación de prazas, o alumnado seleccionado deberá presentar na secretaria da Escola Oficial de Idiomas de Ferrol a documentación que se especifica nas epígrafes sétima e décimo primeira da convocatoria.

O prazo para a presentación desta documentación será ata o día 18 de setembro de 2019 para os cursos do primeiro cuadrimestre e ata o 17 de xaneiro de 2020 para os do segundo.

A duración do programa académico será dun total de 60 horas e os cursos terán un número mínimo de 15 participantes e un máximo de 25.

A convocatoria pódese consultar na seguinte ligazón:

IR Á LIGAZÓN Convocatoria Celga

Cedeira acollerá os días 7 e 8 o torneo de fútbol-8, que este ano chega á súa edición número 13

CEDEIRA ACOLLERÁ OS DÍAS 7 E 8 O TORNEO DE FÚTBOL-8, QUE ESTE ANO CHEGA Á SÚA EDICIÓN NÚMERO 13

O Cedeira SD organiza para a próxima fin de semana a edición número trece do trofeo de fútbol 8, que reunirá a 550 deportistas e para a que organización conta coa colaboración do Concello local.

Un total de corenta equipos, a súa maioría procedentes da comarca, tomarán parte nunha competición que terá como escenario o campo municipal do Beco e que se desenvolverá en horario de mañá e tarde, de 10.00 a 19.30 horas.

A primeira das xornadas, día 7, está reservada á participación dos equipos de prebenxamíns e benxamíns, mentres que na do domingo xogarán os alevíns e infantís. As finais disputaranse ás 18.30 horas, tanto o sábado como o domingo. Un ano máis a organización garante o avituallamento dos deportistas e das súas familias coa venda de racións de churrasco e bocadillos nunha carpa que se habilitará a tal efecto e que estará situada a carón do recinto deportivo.

O presidente do Cedeira SD, David Abella Bouza, invita aos afeccionados ao fútbol de toda a comarca a acercarse á vila de Cedeira para seguir de cerca o campionato, do que destaca o bo ambiente que existe durante a súa celebración e a posibilidade de desfrutar do fútbol da man das novas promesas.

As festas de Cedeira entran na súa recta final cos actos máis tradicionais do programa

AS FESTAS DE CEDEIRA ENTRAN NA SÚA RECTA FINAL COS ACTOS MÁIS TRADICIONAIS DO PROGRAMA

As Festas de Cedeira entrarán hoxe xoves nos tres últimos e máis esperados días dunhas celebracións que deron comezo o venres 9 e pecharán o sábado 17 coa tradicional romaría á ermida de San Antón de Corveiro.

O programa previsto para a xornada festiva de hoxe, 15 de agosto, arrincará ás 12.00 horas coa celebración da misa solemne cantada pola coral Virxe do Mar. A continuación sairá a procesión polas rúas da vila, que contará coa intervención da banda Vila de Cedeira no seu apartado musical. A actividade retomarase a partir das 19.30 horas coa disputa do Trofeo de fútbol Muebles e Carpintería García entre os equipos femininos do Racing de Ferrol e do CD Narón.

A praza do Floreal volverá a acoller hoxe, a partir das 20.00 horas, unha nova cita de “Seráns en Familia”, unha iniciativa do Concello de Cedeira especialmente dirixida ao público infantil pero aberta a toda a cidadanía. Nesta ocasión, a actuación correrá a cargo da compañía Rojo Telón, que representará a obra “Son elas”. Trátase dun espectáculo no que se xuntan as técnicas circenses coa poesía visual. Os intérpretes desenvolverán elementos aéreos (trapecio triple, telas…), ademais de realizar acrobacias no chan e verticais que forman parte dun xogo teatral que invita aos asistentes a gozar de imaxes de gran forza visual e dun espectáculo de circo contemporáneo, divertido e sensible.

A verbena arrincará ás 21.30 horas e contará coa actuación das orquestras “Nueva Fuerza” e “Principal”. A noite da patroa despedirase, como é tradicional, cunha gran sesión de fogos de artificio, que dará comezo ás doce da noite e na que se queimarán máis dun cento de quilos de pólvora.

O venres 16 é a xornada na que a xente da mar renderá homenaxe a súa patroa cunha misa ás 12.00 horas na igrexa parroquial e unha procesión marítima polas augas da ría. Coa celebración do trofeo de fútbol “O Amanexo”, entre os equipos As Somozas e Montañero, dará comezo o programa da tardiña e no que tamén se inclúe un festival de gaitas que, a partir das sete, terá lugar na praza do Floreal. A verbena, que será ás 23.00 horas, estará protagonizada polo grupo “Claxon”.

Coa celebración, o sábado, do coñecido como “Día da Xira” pecharán nove días de festa na vila de Cedeira, un programa que concluirá coa actuación das formacións “Os Claretes” e “Ardecasas”, a partir das 23.30 horas, na praza Roxa.

Cedeira convoca para o día 25 o certame de pintura rápida, que este ano chega a súa quinta edición

CEDEIRA CONVOCA PARA O DÍA 25 O CERTAME DE PINTURA RÁPIDA, QUE ESTE ANO CHEGA A SÚA QUINTA EDICIÓN

O Concello de Cedeira vén de convocar o Certame de Pintura Rápida Vila de Cedeira, que este ano chega a súa quinta edición e que se celebrará o día 25 do presente mes de agosto.

Trátase dunha convocatoria aberta á participación de afeccionados e profesionais, que este ano repartirá un total de 1.800 euros en premios. Así, a devandita cantidade repartirase entre os 800 euros que recibirá o primeiro clasificado, os 600 cos que se premiará ao segundo e os 400 que a organización entregará ao terceiro.

O concurso dará comezo ás dez da mañá e rematará ás cinco da tarde. As persoas interesadas deben apuntarse, antes das 10.00 horas, no punto de información turística situado na praza da Marieta.

A decisión do xurado, que estará integrado polos pintores Adrián Taracido e Jane Danko e a música e concelleira de Cultura Ermitas García, darase a coñecer ás seis da tarde na sala Áncora, onde permañecerán expostas as obras ata as oito da tarde.

O equipo de goberno anima a veciños e turistas a participar nunha convocatoria na que o ano pasado tomaron parte un total de 14 artistas e da que resultaron gañadores Andrés Gabarres, Roberto Castro e Pío Costa.