DEPORTES

O polideportivo será accesible coa instalación dun elevador de escaleiras

O POLIDEPORTIVO SERÁ ACCESIBLE COA INSTALACIÓN DUN ELEVADOR DE ESCALEIRAS

O Concello de Cedeira investirá 14.450 euros na instalación dun elevador de escaleiras no polideportivo municipal como medida de accesibilidade.

Trátase dunha solución que permitirá o acceso ás bancadas do primeiro e segundo andar do pavillón a aquelas persoas con dificultade de mobilidade.

A empresa Soluciones Técnicas Nexoted levará a cabo a obra, para a que foron solicitadas tres ofertas. A intervención estará rematada dentro do presente exercicio.

A realización deste novo proxecto obedece ao interese do equipo de goberno de cumprir coa obriga legal de eliminación de barreiras arquitectónicas nos edificios públicos.

Só nos últimos anos, o executivo local investiu case 200.000 euros na reforma da biblioteca, cuxa actuación principal consistiu na instalación dun ascensor que agora poden utilizar persoas con problemas de mobilidade. Tamén acometou distintos proxectos para a eliminación de barreiras arquitectónicas, como a ampliación de beirarrúas executada na avenida das Pontes de García Rodríguez para favorecer o tránsito de persoas en cadeiras de rodas.

O alcalde, Pablo Moreda Gil, apuntou que o asunto da accesibilidade segue a ser unha das prioridades cara ao presente mandato, como xa o foi durante o primeiro no que tamén se construíu unha rampla no palacete. Segundo o rexedor municipal, “o obxecto é facer de Cedeira un concello accesible, tanto a hora de utilizar os edificios municipais como a de facer deporte, pasear polos espazos públicos ou camiñar polas beirarrúas”.

O Concello repartirá esta semana o boletín As7parroquias que volve á rúa despois do verán

O CONCELLO REPARTIRÁ ESTA SEMANA O BOLETÍN AS7PARROQUIAS QUE VOLVE Á RÚA DESPOIS DO VERÁN

O boletín As7parroquias, que edita o Concello de Cedeira para ter informada a veciñanza, volverá este xoves estar na rúa despois do verán. Por esta razón, na publicación recóllense balances moi exitosos tanto no campo deportivo como no relativo á campaña turística, así como outros moitos asuntos de actualidade.

Durante o tempo estival o municipio acolleu competicións de tríatlon, pádel, fútbol sala e fútbol praia, ao tempo que recibía unha morea de viaxeiros que se achegaron á vila para visitar o castelo da Concepción, o santuario de Santo André de Teixido ou mesmo para tomar parte nas xeorrutas e roteiros promovidos polo Concello dentro da súa oferta turística. Case 7.000 persoas pasaron este verán pola oficina de turismo e xa son máis de 2.000 as que nos últimos tres anos se acercaron á xeoloxía a través das saídas gratuítas, que fan desta riqueza natural un recurso turístico diferencial.

No boletín tamén houbo espazo para explicar os contidos dos orzamentos que se aprobaron no mes de agosto e estarán vixentes ata final de ano, a aposta do goberno municipal para incrementar o número de lámpadas de tecnoloxía LED tanto na zona rural como urbana, así como a licitación da obra que fará do castelo da Concepción o centro interpretativo do xacemento arqueolóxico de Punta Sarridal.

As clases de zumba darán comezo o día 2 de outubro e serán os luns, mércores e venres na Sala Áncora

AS CLASES DE ZUMBA DARÁN COMEZO O DÍA 2 DE OUTUBRO E SERÁN OS LUNS, MÉRCORES E VENRES NA SALA ÁNCORA

O Concello de Cedeira acaba de abrir o prazo de inscrición para as persoas interesadas nas clases de zumba gold (baile activo) que darán comezo o día 2 de outubro e que correrán a cargo da monitora Fanny Barge.

A Sala Áncora, situada nos baixos do palco da praza Roxa, acollerá unha actividade que se impartirá os luns, mércores e venres en horario de 11.00 a 12.00 horas. As persoas interesadas xa poden inscribirse nas oficinas dos servizos sociais, situadas na terceira planta do edificio do auditorio municipal. Para máis información tamén se pode chamar ao número 981 492 179.

A actividade de ximnasia terapéutica impartirase na vila, Esteiro, Montoxo, San Román e Santalla

A ACTIVIDADE DE XIMNASIA TERAPÉUTICA IMPARTIRASE NA VILA, ESTEIRO, MONTOXO, SAN ROMÁN E SANTALLA

O Concello de Cedeira abre o prazo de inscrición para as persoas que se apunten por primeira vez á actividade de ximnasia terapéutica, que dará comezo o día 1 de outubro e que se impartirá na vila de Cedeira e máis nas parroquias de Esteiro, Montoxo, San Román e Santalla de Cervo. As interesadas deben apuntarse nas oficinas dos Servizos Sociais (centro sociocultural) en horario de 10.00 a 13.00 horas. Os repetidores poderán inscribirse na mesma clase.

O obradoiro, que será impartido pola fisioterapeuta Marta González, terá lugar os martes e xoves. O primeiro día levarase a cabo en Esteiro, ás 9.45 horas, e en Cedeira, que será ás 11.00 na sala Áncora e 12.15 horas na cafetería do auditorio.

O xoves a actividade trasladarase ás 9.30 horas a Montoxo, ás 10.45 horas a San Román e ás 12.30 horas a Santalla de Cervo.

Desde o Concello anímase á veciñanza a tomar parte nun programa que favorece a mobilidade e mellora a flexibilidade das articulacións, entre outros beneficios, e ademais axuda á sociabilidade entre o colectivo da Terceira Idade.

O Concello colabora co Club Montaña de Ferrol cara á celebración da X Andaina Terras de Cedeira

O CONCELLO COLABORA CO CLUB MONTAÑA DE FERROL CARA Á CELEBRACIÓN DA X ANDAINA TERRAS DE CEDEIRA

O Concello de Cedeira vén de acondicionar as pistas e sendeiros que o vindeiro sábado acollerán a décima edición da Andaina Terras de Cedeira, unha iniciativa do Club Montaña de Ferrol para descubrir a pé o municipio nun percorrido de 40 ou 30 quilómetros en función da condición física de cada persoa.

A participación podería chegar aos cen deportistas, moi similar á de anteriores edicións. Os interesados aínda teñen a posibilidade de se apuntar no club organizador -con sede na rúa Coruña nº 102 de Ferrol-, na páxina web clubmontana.gal, na oficina de Turismo de Cedeira, na tenda Cedeira Sport, ou de enviar un correo electrónico á dirección marchascmf@gmail.com para formalizar a reserva. A iniciativa está aberta unicamente á participación de persoas maiores de 16 anos.

A saída, que será ás 9.30 horas, terá como punto de partida a praza Roxa. O itinerario, que estará debidamente sinalizado, discorrerá polo paseo da Madalena, punta Robaleira, Serra da Capelada, inmediacións do santuario de San Andrés de Teixido e costa de Tarroiba.

Desde a organización non se fala de dificultade pero si da necesidade dun grao alto de preparación física para participar unha andaina á que tamén definen como “rompepernas”.

O goberno municipal, que traballa arreo para fomentar o deporte da man das entidades deportivas da localidade, anima aos afeccionados a tomar parte na proba e ao público en xeral a facer un seguemento da mesma nos distintos lugares polos que vai pasar.

Cedeira acollerá os días 7 e 8 o torneo de fútbol-8, que este ano chega á súa edición número 13

CEDEIRA ACOLLERÁ OS DÍAS 7 E 8 O TORNEO DE FÚTBOL-8, QUE ESTE ANO CHEGA Á SÚA EDICIÓN NÚMERO 13

O Cedeira SD organiza para a próxima fin de semana a edición número trece do trofeo de fútbol 8, que reunirá a 550 deportistas e para a que organización conta coa colaboración do Concello local.

Un total de corenta equipos, a súa maioría procedentes da comarca, tomarán parte nunha competición que terá como escenario o campo municipal do Beco e que se desenvolverá en horario de mañá e tarde, de 10.00 a 19.30 horas.

A primeira das xornadas, día 7, está reservada á participación dos equipos de prebenxamíns e benxamíns, mentres que na do domingo xogarán os alevíns e infantís. As finais disputaranse ás 18.30 horas, tanto o sábado como o domingo. Un ano máis a organización garante o avituallamento dos deportistas e das súas familias coa venda de racións de churrasco e bocadillos nunha carpa que se habilitará a tal efecto e que estará situada a carón do recinto deportivo.

O presidente do Cedeira SD, David Abella Bouza, invita aos afeccionados ao fútbol de toda a comarca a acercarse á vila de Cedeira para seguir de cerca o campionato, do que destaca o bo ambiente que existe durante a súa celebración e a posibilidade de desfrutar do fútbol da man das novas promesas.

A 23ª travesía a nado “Ría de Cedeira” será o sábado día 10 de agosto

A 23ª TRAVESÍA A NADO “RÍA DE CEDEIRA” SERÁ O SÁBADO DÍA 10 DE AGOSTO

O Concello de Cedeira e a Federación Galega de Natación organizan para o día 10 de agosto a 23ª edición da Travesía a Nado Ría de Cedeira, proba puntuable para o circuíto galego de augas abertas. A inscrición, cuxo prazo remata o martes 7, xa se pode tramitar a través das páxinas www.fegan.org e www.galitiming.com.

Haberá un total de nove categorías:

A) Anos de nacemento 2010 e posteriores, distancia 50 metros e inicio da proba ás 12:00 horas

B) Anos de nacemento 2008 e 2009, distancia 400 metros e inicio ás 12:10 horas

C) Anos de nacemento 2005, 2006 e 2007, distancia 800 metros e inicio ás 12:20 horas

D) Non federados -2004 e anteriores- distancia 800 metros e inicio ás 12.20 horas

E) Máster 1(1998 a 1984), distancia 2.800 metros e inicio ás 12:40 horas

F) Máster 2 (1983 a 1969), distancia 2.800 metros e inicio 12:40 horas

G) Máster 3( 1968 a 1954), distancia 2.800 metros e inicio 12:40 horas

H) Máster 4 (1953 e anteriores), distancia 2.800 metros e inicio 12:40 horas

I) Absoluta, 2005 e anteriores con licencia federativa, distancia 2.800 metros e inicio12:40 horas. Todas as competicións rexeranse pola normativa FINA de Augas Abertas, pola Normativa de Competición de Augas Abertas da Federación Española de Natación e por un regulamento particular. As probas estarán controladas polo comité de árbitros da Federación Galega de Natación, sendo da súa competencia a resolución de calquera cuestión ou recurso que apareza no desenrolo das mesmas.

Haberá medalla para todos os participantes da categoría A que rematen a proba, así como medalla ou trofeos para os tres primeiros clasificados e tamén trofeos para os tres primeiros clasificados do resto de categorías.

A entrega de galardóns terá lugar no transcurso dun acto que dará comezo ás 14.30 horas.

A organización conta coa colaboración do Club Natación Cedeira Muebles García, Cedeira Sport, Arena, Cruz Roja e Protección Civil de Cedeira e panadería Durán para a celebración dunha convocatoria que suscita moita expectación, tanto a nivel local como comarcal e rexional, e á que o Concello invita a veciños e visitantes a seguir de cerca desde calquera dos puntos urbanos desde os que se poderá ollar.

 

O trofeo de fútbol praia está a reunir estes días a máis de medio cento de equipos no areal da Madalena

O TROFEO DE FÚTBOL PRAIA ESTÁ A REUNIR ESTES DÍAS A MÁIS DE MEDIO CENTO DE EQUIPOS NO AREAL DA MADALENA

Máis de medio cento de equipos de fútbol praia están a participar no Torneo que, organizado polo Concello de Cedeira, deu comezo o pasado martes e rematará o próximo domingo coa celebración dos partidos dos que sairán as formacións gañadoras.

A praia da Madalena acolle unha actividade deportiva que conta con moitos seguidores a nivel local e na que están a participar equipos de toda a comarca e mesmo doutros puntos da xeografía galega.

Un total de 28 equipos -oito da categoría Sub 9, outros oito da Sub 12 e 12 da sub 15- estanse estes días a enfrontar na primeira fase do campionato en partidos que se celebran entre hoxe e o venres e dos que sairán as formacións que pasarán á final, que disputarase o próximo domingo.

Os partidos da categoría sénior disputaranse a partir das oito da tarde do venres e terán continuidade tanto a xornada do sábado como a do domingo. Arredor dunha trintena de equipos participarán nesta clase, tal e como se pon de manifesto desde o equipo de goberno.

Na xornada do domingo disputaranse as finais. Os mellores clasificados das categorías inferiores recibirán os correspondentes trofeos cedidos polo Concello local, mentres que os gañadores do torneo sénior optarán a premios en metálico de 1.000, 500 e 250 euros, respectivamente, ademais dos trofeos institucionais.

O Concello de Cedeira destaca a tradición que existe no municipio con respecto a esta modalidade deportiva e valora que se trata dunha actividade que conta con moitos seguidores que estes días está a ateigar de xente o areal da Madalena.

O domingo será o dia da bici no Municipio de Cedeira

O DOMINGO SERÁ O DIA DA BICI NO MUNICIPIO DE CEDEIRA

O gobierno de Cedeira invita a veciños e visitantes a sumarse ao Día da Bici, que será o domingo 28 e co que se quere fomentar a actividade física e o uso de transportes non contaminantes para traxectos urbanos.

A actividade dará comezo ás 11.00 horas e a praza Roxa será tanto o punto de partida como de chegada dun percorrido que discurrirá por San Isidro, polideportivo municipal, barrio de San Roque, paseo fluvial e porto pesqueiro. A distancia superará os cinco quilómetros, segundo fontes municipais.

Ao remate do paseo entregarase un trofeo aos participantes de menor e maior idade inscritos na proba e haberá un sorteo de agasallos cedidos por Ciclos Roca e Bici Total.

As persoas interesadas poden apuntarse o mesmo día da convocatoria na sala Áncora, a partir das 10.30 horas, e na praza Roxa, antes das once da mañá.