Skip to content Skip to left sidebar Skip to footer

DEPORTES

O POLIDEPORTIVO MUNICIPAL DE CEDEIRA ESTREA NOVO PAVIMENTO E MARCADOR CO COMEZO DO CURSO

Desde o pasado 2 de outubro o Polideportivo Municipal de Cedeira ten aberta de novo a súa pista multiusos. Co comezo do curso os clubes locais e as escolas municipais voltaron empregar a cancha de xogo da instalación, que foi renovada completamente durante este verán cun novo pavimento técnico de madeira, colocado sobre unha base de rastreis e gomas que garanten unha mellor absorción dos golpes e, polo tanto, menos lesións para as persoas que practican alí diferentes disciplinas deportivas.

Foi unha obra importante, na que se investiron máis de 151.000€ a través dun convenio de colaboración entre o Concello e a Deputación da Coruña. O organismo provincial financiou o 80% da actuación. Xunto co levantamento de toda a pista e a colocación do novo pavimento, tanto na cancha de xogo en si como nas zonas adxacentes, colocouse un novo marcador dixital que pode configurarse para os diferentes deportes.

Cómpre recordar que o Concello de Cedeira ten en proceso de contratación a obra de ampliación do Polideportivo Municipal para dotar de máis espazo ao ximnasio, situado nunha zona adxacente da pista principal. O orzamento de licitación é de preto de 62.000€ e a actuación incrementará un 46% a superficie do ximnasio, dos 83 metros cadrados actuais a 119.

Son dúas actuacións importantes na posta ao día do Polideportivo Municipal de Cedeira, cuxas instalacións teñen un uso intensivo ao longo de todo o ano e que ten xa máis de trinta anos de vida.

O CONCELLO DE CEDEIRA DISTRIBÚE ESTES DÍAS UN NOVO NÚMERO DO BOLETÍN INFORMATIVO AS7PARROQUIAS

O Concello de Cedeira ten xa colgado na súa web e está a distribuír polas entidades veciñais e sociais do municipio un novo número do boletín informativo As7Parroquias, ferramenta de transparencia que traslada á cidadanía o traballo do goberno local. Nesta edición, que fai a número 24, faise balance das festas e eventos lúdicos e deportivos de este verán e repásanse, como é habitual, as obras en curso ou recentemente executadas. A consecución do título de Xeoparque Cabo Ortegal ocupa tamén un espazo destacado, subliñando o vieiro de oportunidades que representa entrar neste importante club da Unesco de lugares xeoloxicamente únicos.

A publicación fai un percorrido polos eventos deste verán, desde as verbenas e demais actos das Festas da Patroa ata a Festa do Percebe e os encontros culturais e deportivos máis destacados, citas que tiveron en común sempre unha alta participación e o bo ambiente. Dase conta tamén no boletín da nova distribución de responsabilidades e a composición das comisións dentro do goberno local, despois do acordo que acadaron o PSOE e o BNG no mes de xullo.

A visita ás obras que a Deputación está a acometer na zona do Rego de Tide para mellorar o trazado da estrada provincial que vai a San Andrés, así como a aprobación do Plan Contra Incendios Forestais de Cedeira están tamén neste novo número de As7Parroquias. O mesmo que o recoñecemento ao Xeoparque Cabo Ortegal e a recente reunión que mantieron o alcalde, Pablo Diego Moreda Gil, e o concelleiro de Patrimonio, José Antonio Rodríguez, coa directora xeral de Patrimonio Cultural da Xunta de Galicia, María del Carmen Martínez Insua, para tratar os próximos pasos a dar na escavación arqueolóxica do Sarridal.

No capítulo de obras, As7Parroquias repasa proxectos xa executados ou a piques de rematar, como son a ampliación do saneamento das Pontigas, a senda peonil do camiño de Cordobelas, o arranxo das pistas de pádel ou a renovación da pista multideporte e o marcador do Polideportivo, así como outras que están en proceso de contratación como o cambio das caldeiras da piscina municipal e do ascensor do Auditorio, a ampliación do ximnasio e a colocación de novo céspede artificial no campo do Beco, entre outras. Infórmase tamén da solicitude de fondos, a través de diferentes programas supramunicipais, para acometer outras actuacións, como por exemplo a dixitalización da piscina municipal para que entre nunha rede de instalacións “intelixentes” ou a creación dunha nova zona verde e de lecer na rúa Silva.

A contraportada desde número está adicada ao Cedeira Basket Club, unha entidade que está a traballar polo rexurdimento deste deporte na localidade despois de anos nos que a súa presencia decaera. O éxito do campionato 3×3 que organizou este verán é unha proba do éxito que está a ter a entidade no seu empeño.


VER PDF Boletín as 7 parroquias nº24

O CONCELLO LICITA A SUBSTITUCIÓN DA ACTUAL CALDEIRA DE GAS DA PISCINA MUNICIPAL POR UN SISTEMA DE BIOMASA

O Concello de Cedeira publicou na Plataforma de Contratación do Sector Público o expediente de contratación do proxecto de substitución da actual caldeira de gas da piscina municipal por un sistema de biomasa. A actuación está orzamentada en 85.000€ (IVE incluído) que o goberno local ten previsto financiar a través do Fondo de Cooperación Local e as empresas interesadas teñen ata o día 6 de outubro para presentar as súas ofertas.

O cambio de sistema vai aforrar ao ano a emisión de 61,39 toneladas de CO2 á atmósfera. Actualmente, a piscina municipal conta con dúas caldeiras de gas, un combustible fósil que é máis contaminante, e unha microxeración de gas que non está en uso. A actuación pasa por modernizar as instalacións, consonte o que di o Código Técnico da Edificación e o Regulamento da Instalacións Térmicas en Edificios, para empregar enerxías renovables. Así, as novas caldeiras funcionarán con pellets e permitirán quentar o vaso de auga da piscina, proporcionar calefacción ao edificio e producir auga quente.

Instalaranse dúas caldeiras de biomasa, de 64 kW de potencia cada unha, que se alimentarán de forma automática desde un silo textil ubicado na parte superior da actual sala das caldeiras de gas. Mellorarase o illamento das tubaxes, para evitar perdas de enerxía, e levarase a cabo unha mellora na regulación do sistema, que estará mellor controlado e por tanto será máis eficiente.

O Concello de Cedeira está a reclamar a construción dunha nova piscina de 25 metros, porén cando ese proxecto se faga realidade –clarexan desde o goberno local- a actual seguirá a prestar servizo á poboación.