Skip to content Skip to left sidebar Skip to footer

CULTURA

Un total de 20 agrupacións tomarán parte mañá no festival do entroido

UN TOTAL DE 20 AGRUPACIÓNS TOMARÁN PARTE MAÑÁ NO FESTIVAL DO ENTROIDO

Un total de 20 agrupacións, entre comparsas e grupos, tomarán no festival do Entroido que o Concello de Cedeira organiza para mañá sábado. A participación será dunhas 250 persoas.

O programa dará comezo as cinco da tarde coa saída do desfile das inmediacións da estación de autobuses. Despois de percorrer as rúas, a comitiva chegará á praza Roxa, lugar elixido pola organización para a presentación dos participantes no certame de disfraces e as actuacións.

No certame de mañá repartiranse un total de 1.655 euros entre os mellores disfraces. O xurado terá en conta tanto a orixinalidade do vestiario como a coreografía, no caso das comparsas. Outros aspectos que se valorarán serán a simpatía e o emprego de material de refugallo na elaboración dos traxes o complementos. Os premiados deberán solicitar o pago do mesmo, a partir do luns 27, nos servizos económicos do rexistro do Concello de Cedeira.

A animación na rúa correrá a cargo das charangas DGT e Batería de Cariño.

Pola noite a festa trasládase á praza da Revolta. Nela a comisión de festas 2017 organiza unha velada musical, a cargo das orquestas Cinema e Garibaldi, para darlle continuidade ás celebracións populares pero tamén para recadar diñeiro de cara ás festas patronais. Os menores de 16 anos terán que abonar dous euros e os adultos cinco.

O programa de Entroido pechará ata o ano que vén o luns coa celebración da festa infantil no pavillón polideportivo. Haberá inchables e moita diversión para os máis pequenos.

O Concello convoca o certame de disfraces, que se celebrará o día 25

O CONCELLO CONVOCA O CERTAME DE DISFRACES, QUE SE CELEBRARÁ O DÍA 25

O Concello de Cedeira abre un prazo, ata o día 24, para a inscrición daquelas persoas ou grupos que desexen participar no concurso de disfraces que, con motivo do Entroido, o goberno local organiza para a xornada do 25, sábado.

A solicitude debe presentarse no rexistro xeral do Concello (horario de 9.00 a 14.00 horas) e a persoa que actúe como representante da agrupación tamén será a que asine a petición, que deberá acompañar a fotocopia do seu DNI ou pasaporte. O representante asumirá así todas as responsabilidades do beneficiario/a do premio, incluídas as obrigas fiscais.

A organización do certame establece un total de catro categorías: comparsas (conxunto de persoas formado por un mínimo de 9 compoñentes representando un mesmo motivo), grupos (conxunto de entre 3 e 8 persoas), parellas e individuais. As comparsas e grupos poderán optativamente presentarse apoiados dun móbil (carro ou plataforma). A altura máxima será de 3 metros. Por norma xeral, ademais, a mesma persoa non poderá participar en máis dunha modalidade.

En canto aos premios, serán de 500, 300 e 200 euros, no caso de quedar nos tres primeiros postos da categoría de comparsas. As cuantías para os mellores grupos, son de 200, 150 e 100 euros, respectivamente. As parellas, pola súa banda, optarán a premios en metálico de 40, 30 e 20 euros, mentres que os mellores disfraces individuais serán premiados con 30, 20 e 15 euros.

Tamén haberá premios especiais para o máis novo e o máis vello participantes, que serán de 20 e 30 euros, respectivamente.

O programa previsto para o sábado día 25 arrincará, pasadas as cinco da tarde, na estación de autobuses, dando así comezo ao percorrido polas rúas da vila ata chegar á praza Roxa. A animación musical correrá a cargo da charangas DGT e Batería de Cariño. Pola noite, terá lugar o tradicional baile de disfraces organizado pola comisión de festas de Cedeira 2017. As orquestras Cinema e Garibaldi serán as encargadas de poñer a música. O prezo das entradas oscila entre os dous euros, que pagarán os menores de 16 anos, e os cinco que terán que abonar os adultos.

A festa infantil será o luns 27 no polideportivo municipal, a partir das cinco da tarde. Haberá inchables, animación musical e actividades.

Na seguinte ligazón poderá descargar as bases entroido 2017:

Descarga Bases do concurso de entroido 2017

Entroido 2017

ENTROIDO

SÁBADO 25 DE FEBRERO

Saida ás 17:00h da estación de autobuses. Percorrido rúas de Cedeira.

CHegada e presentación dos participantes na Praza ROxa.

Tres premios por categoría (Individual, parella, grupo e comparsa)

Bases do concurso a partir do xoves 16 de febrero : www.cedeira.gal

Inscripción ata o venres 24 de febrero ás 14:00h.

Animación de rúa con Charanga DGT e Batería de Cariño.

Pola noite baile de disfraces con carpa calefactada organizado pola comisión de festas de Cedeira 2017.

 

LUNS 27 de FEBREIRO

Polideportivo municipal

Festa infantil de 17 a 20h

Inchables, música, baile e animación para tod@s!

 

A Capelada e Santa Tegra, entre os lugares «únicos» do novo portal de Turismo de Galicia

A CAPELADA E SANTA TEGRA, ENTRE OS LUGARES <<ÚNICOS>> DO NOVO PORTAL DE TURISMO DE GALICIA

A web ten un novo deseño pensado especialmente para os teléfonos móbiles e os comprimidos, que é a vía de entrada dixital do 60 % dos usuarios.

A Muralla de Lugo, as Cíes, a torre de Hércules, todas as rías de Galicia e os canóns do Sil caben en cinco polgadas. Tamén a Catedral de Santiago, os Camiños que levan ata ela, o Ferrol da Ilustración ou o cabo de Fisterra . Toda a Galicia bonita e atractiva entra no novo portal de Turismo de Galicia, que desde onte se abre ao mundo cun novo deseño pensado especialmente para os teléfonos móbiles e os comprimidos, que é a vía de entrada dixital do 60 % dos usuarios da web (www.turismo.gal).

As fotografías e os vídeos mandan neste novo portal, así como a axenda e a actualidade, por iso é polo que o entroido e a Festa do Cocido de Lalín inauguren os espazos estelares, que irán adaptándose segundo avance o calendario. E despois están as seccións fixas, nas que o ente autonómico tratou de manter o equilibrio á hora de expor a oferta. Por unha banda, destaca os lugares físicos que merecen ser visitados, entre os que se atopan os máis evidentes -os citados anteriormente- e incorpora outros dous non tan habituais nas guías, como a serra da Capelada (Cedeira, Cariño e Ortigueira) e o castro de Santa Tegra (A Guarda), nunha selección de dez destinos cualificados como «únicos». A praia das Catedrais (Ribadeo) e a Cidade da Cultura (Santiago) son os outros dous fitos que merecen unha ligazón personalizada.

Todas as comarcas galegas acaban tendo unha presenza máis ou menos destacada ao explorar a nova páxina, ben sexa a través das rutas turísticas e de carreiros (270) ou accedendo ás festas e outras experiencias (78), que poden organizarse directamente desde o portal, xa que outra das melloras é o acceso ás empresas turísticas, con máis de 15.000 referencias de aloxamentos e locais de restauración.

Geolocalización

A directora de Turismo , NavaCastro , destacou que o portal fortalece a difusión nacional e internacional de Galicia como destino -os contidos están en sete idiomas- e ponse ao día no contexto das novas tecnoloxías desenvolvidas en dispositivos móbiles, que permiten explotar ferramentas como a geolocalización. «Tamén seremos máis proactivos», indicou Castro, quen ve unha oportunidade no feito de que, ademais de planificar a viaxe, os propios turistas atopen canles de diálogo para axudar a manter a calidade da información.

Fonte: La Voz de Galicia

Pode consultar a nova na seguinte ligazón:

IR Á LIGAZÓN A Capelada e Santa Tegra, entre os lugares «únicos» do novo portal de Turismo de Galicia

Cedeira aposta pola xeoloxía como recurso turístico sostible da man de Ribadeo e Burela

CEDEIRA APOSTA POLA XEOLOXÍA COMO RECURSO TURÍSTICO SOSTIBLE DA MAN DE RIBADEO E BURELA

O proxecto conxunta inclúe a creación dun portal web e unha aplicación para dispositivos móbiles.

A xeoloxía como recurso turístico sostible constitúe o eixo do proxecto Entre Arcos e Cantís, impulsado polo Concello de Cedeira, en colaboración cos municipios mariñáns de Ribadeo e Burela. Os tres concellos conseguiron que o Grupo de Acción Local do Sector Pesqueiro (GALP) A Mariña-Ortegal achegue 118.991 euros, case o 80 % do orzamento. O resto do financiamento, ata alcanzar os 149.808 euros, corre a cargo das administracións locais.

Parte das accións previstas levarán a cabo de forma conxunta, como o desenvolvemento, os contidos, o deseño e o mantemento dun portal web e dunha aplicación para dispositivos móbiles; ou a creación e a edición de catro audiovisuais. Outras actividades competen de xeito exclusivo a cada concello, como o desenvolvemento de catro itinerarios interpretados (ou georutas), o material didáctico e formativo específico de cada territorio ou as unidades didácticas. Neste último caso, tratarán de unificar os contidos, segundo indica a primeira tenente de alcalde de Cedeira, María Xosé Rodríguez (BNG).

Parte do traballo xa se executou en 2016, aínda que o groso da actividade levará a cabo nos próximos meses. Ás accións de divulgación, o inventariado e a realización de guías ou a estratexia e as campañas de difusión en redes sociais, súmase un programa de visitas guiadas para centros escolares e o programa Terra Viva, no que Cedeira incluirá rutas fluviais.

Fonte: La Voz de Galicia

Pode consultar a nova na seguinte ligazón:

IR Á LIGAZÓN Cedeira aposta pola xeoloxía como recurso turístico sostible da man de Ribadeo e Burela

Concurso de fotografía da Asociación Camiño a San Andrés

CONCURSO DE FOTOGRAFÍA DA ASOCIACIÓN CAMIÑÓ A SAN ANDRÉS

O día 28 vence o prazo de inscrición no certame, que repartirá oito mil euros en premios.

A Asociación Cultural e Recreativa Camiño a San Andrés de Teixido convoca o primeiro concurso de fotografía homónimo, que repartirá oito mil euros en premios (3.000 para a mellor imaxe, 2.000 para a segunda, 1.000 para a terceira e catro accésits de 500). Coas obras galardoadas e outras que seleccione o xurado editarase un catálogo, ademais de montar unha exposición itinerante por Galicia. Con este certame, dirixido a profesionais e afeccionados, o colectivo pretende «promover os camiños que levan a San Andrés de Teixido». Inscrición aberta ata o día 28 de febreiro na páxina web da asociación

Fonte: La Voz de Galicia

Pode consultar a nova na seguinte ligazón:

IR Á LIGAZÓN Concurso de fotografía da Asociación Camiño a San Andrés

A promoción do camiño de Santo André de Teixido en FITUR deixou moi bo sabor de boca

A PROMOCIÓN DO CAMIÑO DE SANTO ANDRÉ DE TEIXIDO EN FITUR DEIXOU MOI BO SABOR DE BOCA

O alcalde de Cedeira, Pablo Moreda Gil, quedou moi satisfeito da boa acollida que tivo hoxe en Fitur o acto de promoción do camiño de Santo André de Teixido como destino turístico dentro da Comunidade galega.

Moreda entende que o acto celebrado en Madrid pode representar un tempo novo de coñecemento e defusión para a máis importante ruta de peregrinos, despois de Santiago, que existe en Galicia e tal vez unha das máis antigas da Comunidade.

A presentación, que se insire no programa oficial co título “Camiños de A Coruña”, contou coa intervención do deputado Antonio Leira, que falou do Camiño Inglés, e co reparto de exemplares dunha revista publicada pola Fundación Santo André de Teixido sobre a ruta que ten como destino o territorio cedeirés. Ramón Tudela, en calidade de presidente desta entidade, reivindicou o carácter popular dunha ruta que enlaza a cidade de Betanzos co Ortegal e que recorre espazos tan fermosos como as Fragas do Eume e a Fervenza do Belelle, e monumentos tan emblemá- ticos como os castelos de Naraío e Moeche. Por este motivo, Tudela lanzou unha chamada de atención no sentido de protexer un lugar “máxico e tremendamente espiritual”, ademais de promover actividades e realizar campañas para dalo a coñecer. Durante a celebración de Fitur repartiranse 15.000 exemplares dunha revista da que foron editados un total de 30.000.

O pavillón audiovisual de Galicia acolleu un encontro no que se deron cita, ademais dos alcaldes de Cedeira e Valdoviño, Pablo Moreda e Alberto González, respectivamente, representantes da Xunta e da Deputación da Coruña. De feito, a iniciativa partiu da institución coruñesa para destacar a importancia dos tres camiños que teñen unha especial relevancia turística na provincia. Son o Camiño Inglés, o Camiño Fisterra-Muxía e o Camiño de Santo André de Teixido.

O Concello promocionará en FITUR a Ruta a San Andrés de Teixido

O CONCELLO PROMOCIONARÁ EN FITUR A RUTA A SAN ANDRÉS DE TEIXIDO COMO UNS DOS TRES PRINCIPAIS CAMIÑOS MEDIEVAIS DE GALICIA

A promoción turística de Cedeira, e máis concretamente do camiño a San Andrés de Teixido, leva ao alcalde do municipio, Pablo Moreda Gil, a visitar Fitur (Feria Internación de Turismo) que esta semana se celebra en Madrid.

Son dous os asuntos que teñen especial interese para o goberno cedeirés: reivindicar o territorio como destino ou orixe da considerada por algúns investigadores como a primixenia ruta de peregrinación que houbo en Galicia, a de San Andrés, e dar a coñecer as posibilidades que ofrece o territorio cedeirés entre os operadores turísticos que acuden á feira.

O primeiro obxectivo materializarase mañá mesmo co acto de presentación do Camiño Medieval que, promovido pola área de turismo da Deputación da Coruña, correrá a cargo do presidente da Fundación Santo André de Teixido. A cita será ás 10.30 horas.

Esta iniciativa institucional está centrada nos tres camiños que percorren o territorio da provincia. Dous deles, o Camiño Inglés e o de Fisterra-Muxía están xa instalados no mapa das peregrinacións, mais será sen dúbida a Ruta do Medievo, o camiño que vai desde Betanzos até Santo André de Teixido, o que máis sorprenderá neste acto de promoción nun dos máis importantes escaparates mundiais do turismo. Trátase dunha senda de comunicación entre os dous centros de peregrinación que son Santo Andrés de Teixido e Santiago de Compostela, contando como eixe de conexión coa capital do antigo Reino de Galicia, Betanzos.

O alcalde, Pablo Moreda Gil, equipara a relevancia que poida ter Santiago dentro da ruta Xacobea á que por historia e cultura xa ten Cedeira cando se fala de San Andrés de Teixido.

Desta cuestión Moreda Gil tamén falará cos operadores na reunión prevista para o xoves. Nela, o alcalde exporá as posibilidades turísticas que ofrece un municipio que, como xa quedou claro con motivo do paso da Vuelta Ciclista a España, dispón de moitos e moi destacados recursos naturais, paisaxísticos e culturais para formar parte da oferta turística a todos os niveis.

Campaña de esquí 2017

CAMPAÑA ESQUÍ 2017

Estación invernal de Leitariegos
A consellería de deportes do Concello de Cedeira, abre o prazo de inscripción para a campaña de esquí 2017.
Dirixido a nen@s nados nos anos 2002, 2003, 2004, 2005, 2006.

Datas: do 19 ao 24 de febreiro
Custo: 95€ por nen@ (todo incluido)

Inscripción: Realizaranse no rexistro municipal (horario de 9:00 a 13:30h).
desde o luns 16 ata o luns 23 de xaneiro (data tope).

Si o número de inscripcións supero o das prazas asignadas(4).
Sortearanse o día 24 de xaneiro ás 10:00h no Polideportivo M.