Skip to content Skip to left sidebar Skip to footer

CULTURA

A CELEBRADA OBRA DE TEATRO “CONTINENTE MARÍA” CHEGA ESTE SÁBADO AO AUDITORIO DE CEDEIRA

Unha conferencia sobre Martín Sarmiento, o Pai Sarmiento, e a obra de teatro “Continente María” sucederanse mañá venres e o sábado na axenda cultural de Cedeira. O Museo Mares acolle a primeira das actividades, promovida pola biblioteca do CEIP Nicolás do Río ao fío do proxecto interxeracional “Naturalmente, apendendo!”. Trátase de impulsar o coñecemento da flora e a fauna máis próxima, un traballo no que se encadra esta charla que mañá pronunciará o mestre xubilado do propio centro Rafael López Loureiro.

López Loureiro, autor do blog Ao noroeste do Noroeste, falará na súa conferencia sobre Martín Sarmiento (1695-1772), monxe benedictino e home ilustrado, moi interesado pola botánica e a menciña entre outros saberes. A charla, que leva por título “Martín Sarmiento… o primeiro naturalista?”, comezará ás 19.30 horas no museo.

Xa o sábado, o Auditorio Municipal acollerá unha das pezas teatrais máis celebradas do último ano na escena galega. “Continente María” é o título dunha obra na que se establece un diálogo coa extraordinaria figura de María Casares. A actriz Melania Cruz interpreta á dramaturga nesta montaxe que recolle a retranca, o humor e a musicalidade que ela desprendía nas súas entrevistas e escritos. Baixo a dirección de Tito Asorey, a peza evoca á actriz extraordinaria que foi María Casares e tamén a súa dimensión humana, como unha muller entregada á vida e á escena para vencer o medo e sobrepoñerse ao exilio.

A representación comezará ás 20.30h e as entradas teñen un prezo de 3,5€. Pódense reservar anticipadamente ata mañá venres ás 14.00h a través de whatsapp, no número 649 876 614, ou ben mercalas en taquilla desde unha hora antes do inicio da función.

UGÍA PEDREIRA LEVA ESTE DOMINGO A CEDEIRA O SEU TRABALLO “SEGMENTO CANTÁBRICO”

O Museo Mares acollerá este domingo, día 15, a presentación en Cedeira do primeiro traballo en solitario de Ugía Pedreira, “Segmento Cantábrico”, nunha cita que leva por nome “Convivio” polo seu espíritu de festa ou banquete para compartir. O concerto, que promove o Concello e a asociación de amigos do museo, será ás 13.00 horas e nel participarán tamén as artistas Guadi Galego, Uxía e Marina Oural.

Ugía Pedreira (Foz, 1970), coñecida como “A Pedreira”, ten unha longa carreira musical ás costas. Comezou como vocalista no grupo Chouteira, un dos grupos máis senlleiros do bum do folk dos anos 90, e despois participou en moitos e diferentes proxectos, como Marful, Ecléctica Ensemble, Nordestinas… “Segmento Cantábrico” é o primeiro disco de seu, un traballo ben recibido pola crítica e que ela define como dun folk claro e transparente, aínda que aúna formas tradicionais do litoral cantábrico con outras influencias da música europea e o folk americano.

“A Pedreira” celebrará no museo Mares unha festa coas cantantes Guadi Galego e Uxía e coa poeta Marina Oural. As persoas interesadas en asistir teñen que reservar entrada de maneira anticipada enviando un whatsapp ao número 649876614. Como máximo reservaranse dúas prazas por persoa.

A BIBLIOTECA MUNICIPAL DE CEDEIRA TEN 5.307 SOCIOS, UN NÚMERO QUE EQUIVALE A MÁIS DO 80% DA POBOACIÓN

A biblioteca municipal de Cedeira pechou o pasado año 2022 cun total de 5.307 socios, un número moi destacable en relación ao padrón de habitantes, 6.626 segundo a última e recente actualización. O servizo, que leva o nome do ilustre cedeirés López Cortón, rexistrou o pasado ano 111 novas altas e, como é habitual, unha intensa actividade . Desde o goberno local, o alcalde Pablo Diego Moreda Gil celebrou a vida que ten a biblioteca e a súa raizame na sociedade local, e destacou que nos últimos anos se ampliaron as instalacións para mellorar entre outras cousas a súa a accesibilidade, e que se foron facendo outros investimentos, como o máis recente destinado a novo mobiliario para a sala de lectura de prensa e o espazo infantil.

Durante o pasado ano a Biblioteca López Cortón contou 10.256 lectores (persoas que acudiron para estudar ou ler nas súas salas, facer consultas ou solicitar préstamos, ben sexan veciños e veciñas da vila ou veraneantes). O servizo ten un horario amplio, de luns a venres de mañá e tarde –de 08.00 a 14.00 e de 17.00 a 20.00 horas- e sábados pola mañá -de 10.00 a 13.00 horas- e conta cunha ampla colección de fondos, composta por 31.807 libros, xunto coa sección de revistas e películas tanto de adultos como infantiles. A biblioteca realizou, durante o último exercicio, 5.252 préstamos de libros (2.876 de adultos e 2.376 infantís).

A bibliotecaria, Ángeles Fernández, subliñou que o servizo está moi arraigado en Cedeira e que mantén unha liña de colaboración permanente cos centros educativos da vila. Ao longo do ano desenvolven o programa “Ler conta moito”, de dinamización da lectura e participan noutras actividades e propostas como foi a recente visita da “Maleta Viaxeira” do Ministerio de Igualdade. Pero ademáis a López Cortón conta desde o pasado 8M co seu propio “Punto Lila” adicado a lecturas de temática feminista acaídas para público de diferentes grupos de idade.

O goberno local destinou o pasado ano máis de 7.000 euros á compra de novo mobiliario para a sala de lectura infantil, así como á de adultos. Cómpre recordar que anteriormente investíranse uns 8.000€ no cambio do chan de madeira e mobiliario da sala máis antiga da biblioteca. A actuación máis importante levouse a cabo no anterior mandato, cando se destinaron máis de 200.000€ á ampliación das instalacións. Daquela anexionouse un inmoble contiguo ao antigo, de maneira que a biblioteca puido mellorar a súa accesibilidade e incorporar un ascensor, así como incrementar e poñer ao día outros equipamentos. Aquela ambiciosa intervención culminou coa pintura dun mural adicado a Rosalía de Castro nun lateral do edificio, unha obra que se ten convertido nunha icona do casco antigo cedeirés.