Skip to content Skip to left sidebar Skip to footer

CULTURA

LILA TEATRO REPRESENTA ESTE SÁBADO NO AUDITORIO A OBRA PARA O PÚBLICO INFANTIL “DUNCAN DE PALLEIRO”

O Auditorio Municipal de Cedeira acollerá este sábado a representación de “Duncan de Palleiro”, unha obra propia da compañía Lila Teatro dirixida ao público infantil. A peza conta o transcurso dun día na vida de Duncan, un can moi especial que pertence á enxebre raza de Palleiro. Este personaxe leva unha vida tranquila ao carón do seu amo Aurelio e os seus amigos nunha pequena vila de montaña, mais alí onde vai leva consigo unha sorpresa que non deixa a ninguén indiferente. A obra terá lugar ás 19:00 horas e a entrada ten un prezo de 2,5 euros.

Por outra banda, na tarde-noite do venres, os alumnos de 4º da ESO e 1º de Bacharelato do IES Punta Candieira organizan un festival musical para recadar diñeiro para as súas excursións. O evento constará de dous pases, un ás 19:00 e outro ás 21:00 horas, ambos no Auditorio Municipal de Cedeira. A entrada ten un custo de 3 euros e pode adquirirse na billeteira a partir das 16:00 horas. Ademais, os alumnos venderán rifas para participar no sorteo de dúas experiencias, do que se coñecerán os gañadores ao finalizar os espectáculos.

Para pechar a axenda da fin de semana, na tarde do domingo está prevista unha xornada de “Somos Moitos Tour”, unha campaña de comunicación sobre oportunidades e políticas xuvenís que vai dirixida á mocidade e está promovida en conxunto pola rede Eurodesk e a Deputación de Coruña. O programa consta de charlas informativas sobre oportunidades de emprego nos países do Espazo Económico Europeo e prácticas no ámbito nacional, actividades participativas para o desenvolvemento de “soft skills” e xogos para achegar aos mozos e mozas á cultura doutros países europeos. A xornada organízase no Centro de Ocio Xuvenil de Cedeira entre as 17:00 e as 21:00 horas.

CAMPAÑA DE VERÁN 2022 (XUNTA DE GALICIA)

A Xunta de Galicia ofrece a posibilidade de que a xuventude galega empregue o seu tempo libre estival participando en actividades de educación non formal de carácter lúdico, cultural, deportivo, formativo, etc. Para iso, cada ano preséntase a Campaña de Verán, unha iniciativa ambiciosa que non só é unha actividade de ocio para os mozos e mozas galegos, senón que tamén é un recurso para a conciliación da vida familiar e laboral.

baixa o lema O verán que queres contar, a Campaña de Verán de 2022 da Xunta de Galicia recupera a normalidade tras a Covid-19 e oferta, durante os meses de xullo, agosto e setembro, as seguintes accións:

  • Campamentos en Galicia.
  • Campos de voluntariado en Galicia, noutras comunidades autónomas e no estranxeiro.
  • Programas de intercambios bilaterais con outras comunidades autónomas.
  • Minicampamentos “Coñece Galicia”, de 5 días de duración.
  • Uso de instalacións xuvenís por parte de entidades.

Máis información na seguinte ligazón:

IR Á CAMPAÑA DE VERÁN 2022

O CDG ABRE A SÚA ESTADÍA EN CEDEIRA CUNHA FUNCIÓN PARA ALUMNADO DO IES PUNTA CANDIEIRA

Cunha función para alumnado do IES Punta Candieira, o Centro Dramático Galego inaugurou onte a súa estadía de catro días na vila de Cedeira. hoxe venres, o sábado e o domingo ofrecerá tres funcións máis, dirixidas ao público xeral, da súa nova produción “Ás oito da tarde, cando morren as nais”, coa que a compañía pública pon en marcha a experiencia piloto de xirar cunha obra de gran formato por localidades pequenas, catro en Galicia e dúas en Portugal, e permanecer nelas durante varios días. A iniciativa, tal e como explicou estes días o director do CDG, Fran Núñez, quere entre outras cousas impulsar o turismo cultural a estas localidades.

Rapaces e rapazas de cuarto curso da ESO e primeiro de Bacharelato foron onte o público desta primeira función do CDG no Auditorio Municipal de Cedeira. Hoxe venres e o sábado, a representación será no mesmo lugar ás 21.00h, e o domingo, ás 19.00h.

“Ás oito da tarde, cando morren as nais” dá vida a un texto de AveLina Pérez que recibiu o premio Álvaro Cunqueiro en 2018 e conta, ademais, co aval de María Pazos na dirección. Camila Bossa, Sabela Domínguez, Xosé Manuel Esperante, Davide González, María Llanderas, Alba Loureiro e Toni Salgado forman o elenco da obra, que dura 75 minutos e está recomendada para maiores de 12 anos. A peza é un xogo sobre a relación entre o teatro e o público cheo de humor, ironía e crítica sociolóxica.

O Centro Dramático Galego fai un esforzo pola accesibilidade en todos os sentidos. As funcións contan con subtítulos, intérprete de lingua de signos e audiodescricións para que poidan seguila as persoas con discapacidades auditivas ou visuais. Ademais, as estradas están á venda na web de ataquilla.com –https://entradas.ataquilla.com/ventaentradas/- a prezos populares, 4€, con descontos do 50% para maiores de 65 anos, estudantes, desempregados, familias numerosas e outros colectivos.

Para facilitar a afluencia do público desde diferentes puntos da comarca, o Concello de Cedeira vai fletar buses gratuítos, aos que as persoas con entrada poderán apuntarse cada día de representación –antes das doce do mediodía, enviando un Whatsapp e indicando o nome das persoas, data e parada que van empregar-. Os puntos de saída serán os seguintes:

VENRES, día 20

Ferrol:(Plaza de Galicia – Correos) 19:40 horas.

San Sadurniño: (Concello) 20:00 horas.

Moeche: (AC862 – Restaurante Delfino) 20:10 horas.

Cerdido: (Concello) 20:20 horas. Volta desde Cedeira ás 00.00h.

SÁBADO, día 21

Ferrol: (Plaza de Galicia – Correos) 19:50 horas.

Narón: (Concello P.Bus Ctra.Castilla) 20:00 horas.

Valdoviño: (Puerta del Sol – Ferreteria Josvy) 20:20 horas.

Volta desde Cedeira ás 00.00h.

DOMINGO, día 22

Ferrol: (Plaza de Galicia – Correos) 17:50 horas.

Narón: (Concello P.Bus Ctra.Castilla) 18:00 horas.

Valdoviño: (Puerta del Sol – Ferreteria Josvy) 18:20 horas.

Volta desde Cedeira ás 22.00h.

Xunto con estes autobuses que pon o Concello de Cedeira, o propio programa de mobilidade do Centro Dramático Galego facilita a posta a disposición do público doutros autobuses desde Ares, As Pontes e As Somozas.