O Concello de Cedeira convoca o certame de disfraces de entroido
O Concello de Cedeira fomenta a participación nas celebracións do Entroido convocando un ano máis o tradicional concurso de disfraces. O certame será o día 22 de febreiro e está aberto á participación nas modalidades comparsas (nove ou máis compoñentes), grupos (de tres a oito compoñentes), parellas e individuais. A organización reserva 2.205 euros para premiar os tres mellores disfraces en cada unha das categorías.
O prazo de inscrición finaliza o luns 20, sendo imprescindible tanto o feito de cubrir a solicitude como o de presentala no rexistro xeral do Concello, aberto ao público en horario de 9.00 a 14.00 horas. O responsable ou representante das comparsas ou grupos será o que asine a solicitude, que terá que ir acompañada dunha fotocopia do seu DNI/NIE/Pasaporte. A mesma persoa non poderá participar en máis dunha categoría.
O desfile do sábado 22 dará comezo na praza Roxa ás 17.00 horas. O seu punto de partida será a praza Roxa e, despois de percorrer as principais rúas da vila, chegará ao pavillón polideportivo, que acollerá as actuacións. En caso de choiva os participantes irán directamente ás instalacións deportivas, onde se fará un desfile polo interior das mesmas. O xurado será designado polo Concello de Cedeira e quedará constituído por representantes municipais, de entidades culturais e sociais ou persoas de recoñecida capacidade.
O xurado valorará o vestiario e maquillaxe. así como a orixinalidade dos traxes, a coreografía, o traballo feito a man e mesmo a simpatía dos concursantes. A entrega dos diplomas terá lugar unha vez remate o desfile e o fallo do xurado sairá públicado na páxina web do Concello de Cedeira (www.cedeira.gal). Os premiados deberán solicitar o pago da contía mediante transferencia bancaria, a partir do día 2 de marzo, no rexistro municipal.
A programación de Entroido inclúe ademais dúas verbenas na praza Roxa, que serán os días 22 e 24 e que correrán a cargo das orquestras Metrópolis e Los Trovadores, así como a tradicional festa infantil, que será o 24 no pavillón e na que haberá inchables e animación. O Concello está pechando agora a celebración dun acto de homenaxe, recordo e agradecemento a Rosalía de Castro coincidindo co aniversario do seu nacemento (24 febreiro de 1837). Será o mesmo 24 e terá lugar no exterior da biblioteca municipal, adornada desde hai meses coa faciana da ilustre poeta galega.
