Skip to content Skip to left sidebar Skip to footer

SERVIZOS

Cedeira diminúe a presión fiscal sobre as familias rebaixando os tipos de gravame

CEDEIRA DIMINÚE A PRESIÓN FISCAL SOBRE AS FAMILIAS REBAIXANDO OS TIPOS DE GRAVAME

Tres foron os asuntos aprobados por unanimidade polo pleno de Cedeira celebrado o pasado martes, o que leva ao equipo de goberno a pensar que “debemos estar facendo algo ben o noso traballo para que ata a oposición vote a prol das nosas propostas, tal e como está a suceder nas últimas sesións plenarias”. A desta semana tiña carácter extraordinario.

No primeiro punto, a corporación tomou o acordo de aprobar a resolución pola que o goberno local garante unha achega provincial, por importe de 158.806,51 euros, con cargo ao POS 2017 para acometer obras de saneamento nas rúas Paz, Silva e Floreal. Trátase de intervencións incluídas no plan municipal de mellora da rede de saneamento e cuantificado en 1,1 millóns de euros ata o ano 2018.

O segundo asunto foi o relativo á política fiscal coa que o goberno municipal trata de reducir a presión sobre as familias a raíz do “catastrazo do ano 2013”. “Un erro que agora está a recoñecer o PP ao votar a prol de reducir os tipos de gravame dos inmobles urbanos e rústicos para tratar de compensar a suba dos valores catastrais”, segundo se apuntou desde o executivo cedeirense. Así, no caso das vivendas urbanas, o tipo pasará do 0,50% ao 0,48% e, no das propiedades rústicas, queda no 0,42% cando antes estaba no 0,46%.

Por último, a corporación tamén aprobou o cambio de uso da propiedade que dará lugar á ampliación da escola infantil, unha decisión coa que “se dá carpetazo definitivo a todo que que tiña que facer o Concello de Cedeira”, segundo o equipo de goberno. O acordo recoñece como uso principal o de equipamento sanitario asistencial e como complementario o de equipamento sociocultural. Os responsables municipais entenden que agora lle toca ao Consorcio Galego de Servizos de Igualdade e Benestar seguir avanzando na realización do proxecto para que Cedeira poida ter as prazas de gardería que realmente necesita. “Nós xa fixemos o que tiñamos que facer para que a ampliación da escola infantil se poida levar a cabo”, apuntan.

O Concello segue a substituir puntos autónomos nas vivendas por rede xeral de alumeado

O CONCELLO SEGUE A SUBSTITUÍR PUNTOS AUTÓNOMOS NAS VIVENDAS POR
REDE XERAL DE ALUMEADO

O goberno de Cedeira trata de reducir custos económicos e contaminación medio ambiental coa substitución dos puntos autónomos por unha rede xeral de alumeado. O alcalde, Pablo Moreda Gil, explicou que “o Concello segue a mellorar o alumeado público naqueles núcleos de poboación onde ata agora existían puntos autónomos nas vivendas”.

A última intervención que vai nesta dirección levouse a cabo estes días nos núcleos de Malde -parroquia de Régoa- e O Rego -Montoxo- e consistiu na instalación de 12 novas luminarias ELIUM 24 LED de Benito Light de tecnoloxía LED de 53 W de potencia, unhas características que axudarán a rebaixar o consumo un 40 % entre as doce da noite e a seis da madrugada, ademais das vantaxes de contido medio ambiental.

O investimento en materiais foi de 9.970 euros (IVE incluído), xa que a man de obra correu a cargo do persoal laboral do Concello, que realizou os traballos de colocación dos monolitos e as escavacións para os apoios.
“Desde o Concello seguimos a ter como prioridade incrementar a rede xeral de alumeado nos núcleos das parroquias substituíndo todos os puntos autónomos que quedan”, segundo o compromiso manifestado polo alcalde da localidade.

Aviso por obras na Avenida Castelao e Avenida da Area

AVISO POR OBRAS NA AVENIDA CASTELAO E AVENIDA DA AREA

Durante os días 25 e 26 de outubro, levarase a traballar na sinalización viaria de todo o tramo das Avenida Castelao e da Area, na que se procederá ao pintado de ditas vías, incluidas as liñas de aparcamento.

Debido a esta actuación, estanse a instalar valos nas prazas de aparcamento, para que estas sexan despcupadas polos usuarios, co fin de facilitar os traballos e proceder ao pintado.

Desculpen as molestias.