SERVIZOS

O CONCELLO PUBLICA DE NOVO A LICITACIÓN PARA A SUBMINISTRACIÓN DE 921 LEDS PARA A ZONA RURAL

O Concello de Cedeira publicou onte de novo na Plataforma de Contratación do Sector Público o prego de licitación para a compra de 921 lámpadas de tecnoloxía led cuxo destino é mellorar o alumamento público en diferentes zonas rurais do municipio. Trátase, segundo explicou o alcalde, Pablo Diego Moreda Gil, do proxecto de subministro de leds para Fragoso e outros lugares das sete parroquias que o goberno local xa sacara a licitación e que quedou deserto no pasado outubro, polo que se inicia de novo o procedemento, co convencemento de que desta volta presentaranse ofertas que cumplan as condicións esixidas.

É unha das actuacións máis importantes deste ano en Cedeira no que atinxe á mellora do alumamento público, capítulo ao que o goberno municipal está a adicar un esforzo continuado. O proxecto de “Subministro de lámpadas led nos lugares de Fragoso, Veciñeira, San Miguel e outros” conta con financiación do programa POS+2020 da Deputación da Coruña e contempla a compra de 921 bombillas que se van repartir polas parroquias de San Román (117 unidades), Esteiro (230), Piñeiro (140), Régoa (129), Cervo (151), Cedeira (66) e Montoxo, de San Xiao, (88).

O presuposto de saída é de 65.872,78€ (IVE incluído) e a empresa adxudicataria terá unicamente que subministrar os equipos, xa que será o persoal municipal quen se ocupe da súa instalación, substituíndo as vellas lámpadas de vapor de sodio. O procedemento de contratación segue o modelo aberto simplificado e as empresas interesadas teñen ata o día 24 deste mes de decembro para presentar as súas ofertas.

A incorporación da tecnoloxía led á iluminación pública permite axustar a potencia para obter mellor rendemento. O Concello pode garantir con ela unha iluminación máis acaída, con lámpadas sen mercurio, menos contaminantes e máis baratas porque a factura do seu consumo redúcese practicamente á metade, duran moito máis e teñen un baixo mantemento.

O CONCELLO ADXUDICA AS OBRAS DE CONSERVACIÓN DOS CAMIÑOS DO BECO, A PAINCEIRA, SANTALLAMAR E CANCELO

A Xunta de Goberno do Concello de Cedeira acordou adxudicar á empresa Hordescon o contrato de execución do proxecto “Conservación dos camiños O Beco, A Painceira, Santallamar e outros” por un importe de 77.438,52€ (IVE incluído) -a licitación saíu, por procedemento aberto simplificado, cun prezo de 89.534,65€-. O alcalde, Pablo Diego Moreda Gil, comentou que esta é unha intervención que vai servir para mellorar o firme en catro viais de titularidade municipal e para extender a rede de recollida de augas pluviais, coa conseguinte mellora na seguridade tanto para a circulación rodada como para os peóns.

As obras, que teñen un prazo de execución de oito semanas, contemplan a actuación en catro camiños que suman 1,25 quilómetros de lonxitude. A maior parte do orzamento vai destinado aos do Beco e a Painceira. O primeiro parte da estrada autonómica AC-566, á altura da estación de servizo e chega ata o desvío ao lugar do Coto. Son 400 metros de percorrido cun ancho de catro metros e gabias a ambos os dous lados, que mellorarán o seu firme e incorporarán a rede de recollida de augas pluviais, cos correspondentes sumidoiros, e una senda peonil dun metro de ancho.

No camiño da Painceira, que conecta este lugar con San Andrés de Teixido, as obras van consistir na limpeza de gavias, a instalación da rede de recollida de pluviais e a posta dunha nova capa de asfalto. Este é un vial de 400 metros de longo e 3,50m de ancho medio.

O contrato inclúe tamén o camiño de Santallamar, que vai desde o final do Paseo Real da Magdalena ata a estrada AC-566 e ten 350 metros de percorrido, e o vial do Cancelo, que ten 100 metros e conecta dúas vivendas coa estrada da Corredoira. Nestes casos limpiaranse as gabias e estenderase unha nova capa de asfalto. A licitación recibiu sete ofertas, seis delas válidas.

O CONCELLO ACOMETE MELLORAS NA PAVIMENTACIÓN E NA ILUMINACIÓN DO CEMITERIO MUNICIPAL

O goberno local de Cedeira adxudicou e ten xa en marcha dúas obras menores para o arranxo do pavimento nas rúas 1 e 2 da parte vella do cemiterio municipal e para a iluminación da zona que comunica cos nichos novos, na que agora non hai puntos de luz. O Concello investirá preto de 23.000€ nestas actuacións, que se van executar de inmediato e van contribuír a facer máis seguro o tránsito polo recinto.

A empresa de construción Prieto Mouriz vai ocuparse do arranxo do chan nos corredores número 1 e 2 do cemiterio. Actualmente o seu estado é moi deficiente e as escorrentías provocan fochancas, o crecemento de vexetación e o deterioro do firme, o que supón un perigo para os visitantes, en especial para as persoas maiores. A actuación vai consistir no levantamento do actual pavimento, a colocación dunha capa de grava e formigón e a posterior aplicación dun novo firme de plaqueta, no que se instalarán sumidoiros para garantir a drenaxe da auga. O contrato é de 17.545 euros, IVE incluído.

Por outra banda, o Concello mercou á empresa Diesfe e por valor de 5.451,12€, IVE incluído, o material eléctrico preciso para que persoal municipal se ocupe de instalar unha axeitada iluminación na zona que conecta o corredor central do cemiterio cos nichos novos, concretamente coa colocación de 26 leds no solo.