NOVAS

A REMEIRA RAQUEL RODRÍGUEZ PERNAS, DEPORTISTA DO ANO DE CEDEIRA

O Concello e os clubes deportivos de Cedeira celebraron o 28 de abril a XIX Festa do Deporte, unha cita moi especial porque chega despois de tres anos suspendida e que serviu para subliñar os azos cos que os e as deportistas cedeiresas teñen saído do parón que impuxo a pandemia. A gala, que se celebrou nun Polideportivo Municipal ateigado de xente, contou coa presencia e a intervención do arqueiro olímpico Miguel Alvariño.

A Festa do Deporte serviu para homenaxear aos seguintes deportistas e entidades:

Karate: Equipo de competición da escola de karate de Cedeira.
Remo: Iván González Fraguela e Bruno López Torres; e Candela Martínez Pernas e Raquel Rodríguez Pernas. Pádel: Equipo Feminino A, Alfredo Quintiana García e Raquel Iglesias Lorenzo.
Deporte na Natureza: Club Candieira Cedeira.
Fútbol: Cedeira Sociedade Deportiva e Irene Díaz Alindado. Deporte adaptado: María Encarnación Alonso Lustres e Jesús Pérez García.
Baloncesto: Cedeira Basket Clube. Badminton: Santiago Freire López e Dolores López Lorenzo.
Natación: Irene Freire Pernas (Natación Cedeira)
Atletismo: Sara Romero Vilela (Natación Cedeira)
Triatlón: Damián Suárez Couto e Equipo Cadete do Natación Cedeira (Juan Piñón, Samuel Sánchez, Lucas Riola, Damián Suárez, Manuel Muíño e Francisco Bellas).

Ademais, na mesma gala fixéronse as seguintes mencións polas actuacións destacadas dos anos anteriores, nos que non se celebrou a Festa do Deporte:

Triatlón: Equipo alevín do Natación Cedeira (Irene García, Noa Villadóniga, Ainhoa Dopico, Ainhoa Torres, Roque Caneiro, Martín Otero e Manuel Sande).
Natación: Pablo Pérez González e Lucía Sánchez Grandal (Natación Cedeira).
Atletismo: Andrea Díaz Iglesias do Natación Cedeira (Natación Cedeira).
Baloncesto: Escolas Deportivas do Basket Cedeira.
Mención especial a Gonzalo Latorre Morado, fundador e presidente da asociación Apader.

Finalmente, o premio de mellor deportista no ano 2022 foi para Raquel Rodríguez Pernas, do Remo Cedeira, destacada competidora en probas internacionais e que con 18 anos de idade está actualmente estudando en California cunha beca.

Na gala, en cuxa organización estiveron implicados os clubes Polideportivo Apader, Badminton Cedeira, Cedeira Basket Club, Club Natación Cedeira, Cedeira SD, Club Candieira, Discalzas SD, Escola de Karate Cedeira, Club Pádel, Remo Cedeira e Club de Baile Street Dance, tivo como colofón a homenaxe sorpresa que todas as entidades e o Concello renderon a Antonio Sedes Bellón, traballador laboral no Polideportivo desde o ano 1990, cando se inaugurou, e persoa dinámica e comprometida co pobo. A falta de dous meses para a súa xubilación, o alcalde, Pablo Diego Moreda Gil, fíxolle entrega dunha placa e expresoulle o cariño e o recoñecemento de todos pola súa adicación. Antonio Sedes é, ademáis dunha persoa sempre disposta para axudar no seu posto no Polideportivo, un home deportista que habitualmente participa nas probas populares. Ademais do agasallo para el, no acto amosouse a placa que recordará a súa figura no propio Polideportivo.

O LIBRO “MULLERES ESPONTANEADAS” PRESÉNTASE O SÁBADO NA PRAZA DA REITORAL

A praza da Reitoral de Cedeira –ou a biblioteca López Cortón en caso de choiva- acollerá o vindeiro sábado, día 6, a presentación do libro “Mulleres espontaneadas. Fraxilidade humana e cópula carnal nas comarcas do Eume e Ferrol XVIII-XIX”, resultado da investigación realizada polo arquiveiro Ángel Arcay, no que se recollen 555 casos de mulleres que se declararon “espontáneas ou espontaneadas” ante a xustiza para lexitimar os fillos nados fóra do matrimonio. O acto será ás 12.00 do mediodía e no mesmo intervirán o autor e Belén López, de Baía Edicións.

Entre os casos que puido documentar o autor do libro hai 222 de Cedeira, un número moi importante dentro do territorio analizado, as comarcas de Ferrol e do Eume. O proceso do “espontaneamento” garantía na época que a nai contaba coa protección da xustiza, de maneira que ninguén podía insultala ou atacala pola situación e en tal caso ela podía denunciar. O gran número de casos documentados pon de manifesto que o nacemento de fillos fóra do matrimonio era unha situación bastante frecuente na época e, segundo se apunta no libro, ata bastante aceptada socialmente. A condena social chegou máis na segunda metade do século XIX e en zonas urbanas.

Ángel Arcay (Betanzos, 1988) é licenciado en Historia pola Universidade de Santiago e especialista en Arquivos pola Universidade de Oporto. Dirixe a Biblioteca e o Arquivo Municipal de Betanzos e o Museo das Mariñas desde o pasado ano e é, tamén, director do Anuario Brigantino. Ten realizado outras investigacións polas que mereceu diferentes recoñecementos e este traballo sobre as mulleres espontaneadas obtivo o premio Hume.

DÚAS CITAS DEPORTIVAS E TEATRO PARA O PÚBLICO FAMILIAR, NA AXENDA DA FIN DE SEMANA DE CEDEIRA

O Concello de Cedeira contará hoxe sábado, ás oito da tarde no Auditorio Municipal, coa compañía Teatro del Andamio e a súa obra “A nova historia da cigarra e a formiga” dirixida ao público familiar. Outras dúas citas deportivas están tamén na axenda para a mesma xornada: a cuarta edición do Duatlón Escolar Xogade e o Día do Baloncesto, propostas que levarán á vila centos de deportistas e seguidores de toda a provincia.

Teatro del Andamio propón unha nova versión da clásica fábula. Desta volta, a formiga traballadora vive na saída de emerxencia do formigueiro e adícase a coidar das flores e inventar cantigas. A cigarra preguiceira chega a escena despois dunha viaxe de moito tempo na procura dun lugar para vivir en paz. As entradas, ao prezo de 2,5€, poderán mercarse media hora antes en taquilla.

Uns 200 nenos e nenas da provincia da Coruña, de entre 6 e 16 anos das categorías benxamín, alevín, infantil e cadete, participarán no Duatlón Escolar Xogade. A proba desenvolverase na contorna do paseo marítimo e San Isidro, cun percorrido de carreira e outro de diclismo. Por ese motivo, e tal como xa estivo informando a Policía Local, haberá restricións de aparcamento e de tráfico polos lugares polos que vai o percorrido.

Por outra banda, a Concentración Baby Basket reunirá no pavillón municipal a xogadores e xogadoras do CB As Pontes, Baxi Ferrol, Costa Ártabra, BBCA, Cedeira Baby Basket, Basket Narón e Basket School. Tras a xuntanza pola mañá, que se prolongará desde as 10.30 ás 11.30h, pola tarde están previstos dous partidos entre diferentes equipos do Cedeira Basket e o Baxi Ferrol. Ás 16.30 xogarán as categorías Premini e Mini, e ás 18.30h as de Infantil e Cadete. Entre os dous encontros actuará a Street Dance School.