Skip to content Skip to left sidebar Skip to footer

NOVAS

O número 14 do boletín As7parroquias xa está nos fogares do Municipio de Cedeira

Este ano a veciñanza de Cedeira puido acompañar a gastronomía do Entroido coa lectura do último número do boletín As7parroquias, unha publicación municipal ateigada de boas noticias pero tamén de reivindicacións. O Concello xa repartiu estes novos os exemplares polos fogares, entidades e servizos públicos.

No apartado de demandas, no boletín de febreiro signifícanse de modo especial a petición que levou a máis dun milleiro de persoas a saír á rúa para esixir a restitución da atención pediátrica no centro de saúde da localidade, así como as xestións que o goberno de Cedeira está a levar a cabo ante a Xunta e a Deputación para poñer en funcionamento un centro de día no municipio e para a construción dunha nova fábrica de xeo que garante o futuro do pósito local. Esta última petición tratouse directamente coa conselleira Rosa Quintana.

A inauguración da escola infantil, por parte da titular de Política Social, a presentación dun vídeo promocional do proxecto do Xeoparque en Fitur e a adhesión de Cedeira ao Pacto dos Alcaldes polo Clima son outras das información recollidas na publicación.

Co que agora xa están a ler os vecinos/as son un total de 14 os boletíns cos que o executivo local quere manter ao día á poboación local sobre as actividades municipais que poden ser do seu interese.

 

O Concello de Cedeira acaba de repartir as 30 novas unidades de composteiros domésticos

Como parte do Programa de Compostaxe Doméstico iniciado en Cedeira no ano 2016, o Concello acaba de repartir un novo lote de 30 unidades de composteiros entre as persoas que o solicitaron. Con estas últimas unidades, neste caso facilitadas por SOGAMA, xa suman máis de 200 os entregados pola administración local para uso familiar.

O Alcalde, Pablo Diego Moreda Gil, tamén deixou onte unha unidade no CEIP Nicolás del Río atendendo así a unha petición realizada polo alumnado do centro. “Un bo exemplo do compromiso adquirido polos máis pequenos en levar a cabo accións que permitan mellorar o coidado do medio ambiente”, apuntou o rexedor.

Esta aposta municipal pola compostaxe caseira permite reducir o volume de refugallos que acabarían no colector verde para a súa reutilización obtendo compost, un abono natural rico en nutrientes para aplicar na horta ou xardín. As vantaxes medioambientais da compostaxe son evidentes.

Ademais, tendo en conta que preto do 40% da bolsa de lixo son restos orgánicos, a aplicación deste sistema representa un aforro económico ao minorar o volume de residuos que entra no circuíto de recollida, transporte e posterior tratamento, segundo apuntase desde o goberno municipal.

Os composteiros permiten así mesmo un maior control das condicións para conseguir compost e axudan a evitar algunhas das molestias do proceso como cheiros, roedores, etc. Xunto aos contedores o Concello de Cedeira entregou un sinxelo manual e realizará un seguimento durante o primeiro ano.

O Concello conmemorará o 8m con xogos infantís, un manifesto, recomendacións literarias e música

O Concello de Cedeira promove a celebración dun total de seis actividades para conmemorar o Día da Muller. O goberno municipal convida ao conxunto da veciñanza a participar nas iniciativas para evidenciar o seu máis severo rexeitamento ás condutas machistas e para demandar unha sociedade máis xusta e igualitaria. Nesta ocasión, o Palacete municipal convertirase no epicentro de todos os actos.

A programación, convocada para o mesmo día 8 de marzo, dará comezo ás 11.30 horas coa celebración de Xogos infantís en igualdade. A iniciativa consiste en distintas actividades creativas co tema do día como única referencia. Desde o Concello ponse o acento no contido educativo da convocatoria.

O acto institucional, que será ás 12.30 horas, consistirá na lectura dun manifesto, que correrá a cargo de persoas que veñen colaborando na organización das actividades en torno ao 8M.

As bibliotecas recomendan….. é a proposta prevista para as 13.00 horas, que dará lugar á participación dos responsables das bibliotecas dos centros educativos da localidade e mesmo da biblioteca municipal para dar a coñecer algúns dos títulos literarios que mellor reflicten tanto o mundo da muller como as súas reivindicacións e dereitos.

Os actos do Día da Muller terán continuidade pola tarde. Así, a partir das 17.00 horas comezará a lectura de Muller bruxa, o conto de ser muller. Trátase dun fanzine escrito por Noa López Vidal co que se abrirá desde un tempo de coloquio coa propia autora ata a incorporación da música á programación coa participación de grupos e solistas locais e de alumnos da escola de música de Cedeira nunha cita cos Micros abertos.