NOVAS

O pleno de Cedeira aprobou onte nunha mesma sesión, cos votos a favor do PSOE e o BNG, o orzamento municipal para o presente ano 2024 e unha modificación de créditos. O presuposto anual ascende a 6.433.888,27€, que representan un incremento do 0,49% respecto ao anterior de 2023, mentres que o expediente de modificación de créditos incorpora aos recursos económicos do Concello neste exercicio remanentes de Tesourería del año pasado por valor de 681.279,43€.

Os orzamentos de 2024 consignan 575.307,79€ a investimentos. Destacan neste apartado os proxectos que se van acometer coa financiación da Deputación Provincial, concretamente a rehabilitación do Palacete, a creación dunha zona verde de lecer na rúa Silva e a mellora de 15 camiños de titularidade municipal que suman máis de 6,7 quilómetros.

En canto aos investimentos, cómpre apuntar que a modificación de créditos aprobada na mesma sesión lles destina tamén un total de 225.913,89€, que servirán para levar adiante proxectos como a creación dunha zona axardinada e con aparcadoiro en Crónicas, a reparación de barandas da Ponte Vella e a praza da Reitoral, o arranxo do muíño da Corredoira e outras actuacións.

Un ano máis increméntase a contía destinada a subvencións, que ascende este ano a un total de 321.450€. Están incluídos os fondos municipais que, a través de convenios nominativos, o Concello de Cedeira destina a Protección Civil, a Cruz Vermella, a asociación Sobre Rodas, Apader, Abac, as asociacións de nais e pais Pica Peixe e O Beco, a asociación San Andrés de Teixido, A Crina, Arce e a Banda de Música Vila de Cedeira, así como a subvención para a escola de música Vila de Cedeira, que é de concorrencia competitiva. Tamén están nesta partida os 120.000€ que a administración local reserva para a convocatoria de axudas para financiar infraestruturas e actividades das entidades socioculturais e deportivas da localidade, e as aportacións para os grupos políticos municipais, a FEMP e a FEGAMP, a asociación Seitura, a entidade de xestión do Xeoparque Cabo Ortegal e a Mancomunidade.

De novo mantén o Concello de Cedeira o seu esforzo no eido dos servizos sociais. A partida destinada a estes programas increméntase preto dun 1% e chega ata 1.310.583,75€ que representan máis do 20% do orzamento municipal. Increméntase neste exercicio dunha maneira importante a contía dos fondos destinados ao fomento do emprego, que chega a 90.526,34€ (case un 90% máis que o ano pasado).

Os gastos de persoal do Concello de Cedeira ascenden este ano a 3.389.514,14%. A cifra actualizouse á alza nun 4,80% para dar cumprimento á suba das retribucións do persoal municipal segundo o acordo marco establecido entre Goberno e sindicatos e tamén para facer fronte a posibles acumulacións de tarefas e substitucións por baixas temporais, sobre todo do persoal de Servizos Sociais.

Responsables do goberno municipal de Cedeira recibiron esta semana a visita dos técnicos do Distrito Forestal da Xunta de Galicia, que acudiron para informarlles do tratamento experimental que se vai aplicar nos piñeiros da Serra da Capelada para ver de frear o fungo que está afectando gravemente a esta especie en todo o país. A enfermidade seca totalmente as árbores e de momento non ten cura, polo que xunto co tratamento piloto que se vai empregar nesta zona, a Consellería de Medio Rural traballa na liña de promover a plantación de especies máis resistentes.

Segundo explicaron os técnicos, o tratamento experimental a base de sulfato de cobre que se vai comezar a aplicar de inmediato aos exemplares de pino radiata da Serra da Capelada consiste en fumigalos e tamén en levar adiante un plan de desbroces e clareo, para eliminar a maleza que rodea ás árbores, así como na poda de parte dos exemplares. A actuación pretende illar as árbores tratadas e evitar a extensión do fungo por un exceso de vexetación próxima.
A reunión cos técnicos de Medio Rural contou coa presencia do alcalde, Pablo Diego Moreda Gil; da concelleira de Medio Rural, María Xosé Pernas, e do edil de Medio Ambiente, Ismael Durán. A enfermidade que está a afectar aos piñeiros ten causado xa moitos problemas en diferentes zonas da Cornisa Cantábrica e está estendida xa por todo o Ortegal.

A reunión serviu tamén para que os responsables municipais coñeceran de primeira man a programación da Xunta no arranxo das pistas da Capelada, que son da súa competencia, e tamén o calendario de cortas, repoboacións, etc.