NOVAS

O PROGRAMA DE NADAL DE CEDEIRA TIVO UNHA EXCELENTE ACOLLIDA ENTRE A XENTE DA VILA E DA SÚA CONTORNA

O goberno municipal de Cedeira está agradecido e satisfeito polo desenvolvemento e a boa acollida que tivo o programa de festas de Nadal, cunha chea de actividades que rexistraron moita afluencia tanto da veciñanza como de persoas da contorna. Un ano máis, a aposta por facer do Polideportivo Municipal un espazo de xogos foi un rotundo éxito.

Segundo explicou Noel López, concelleiro de Xuventude, o Polideportivo Municipal recibiu unha alta afluencia todos os días que funcionou e converteuse en lugar de reunión das familias. A programación preveu actividades para diferentes idades, desde as crianzas ata a rapazada, e foi adaptándose ás preferencias da xente. De feito, repetíronse propostas que tiveron unha acollida excepcional, como foi o caso do túnel de realidade virtual. Tiveron tamén unha boa afluencia as dúas festas acuáticas que se programaron na piscina municipal con xogos inchables, en dúas tardes reservadas para nenos e nenas de menos de dez anos e maiores.

Contou cun excelente nivel de afluencia a verbena de Aninovo, na carpa instalada na praza Roxa, pese a que o evento competía con outras festas privadas organizadas na localidade, e cómpre destacar o cheo absoluto da festa de Reis organizada no mesmo lugar, que concitou a presenza tanto de persoas de Cedeira como doutras chegadas de municipios da contorna.

Destacou tamén Noel López o éxito da cabalgata de Reis, cuxo percorrido esperou e aplaudiu o público pese a choiva intermitente. Moita afluencia tivo a continuación o Auditorio, onde nenos e nenas puideron sentar no colo de Melchor, Gaspar ou Baltasar para contarlles os seus desexos e entregarlles as súas cartas, e tamén a festa posterior que se desenvolveu nas instalacións do CEIP Nicolás do Río. A xente ateigou o colexio e compartiu nun excelente ambiente a merendola a base de chocolate, roscón e bola que, como xa é tradición en Cedeira, precede á noite máis máxica do ano.

Por último, celebrou o edil a moita participación e o bo ambiente co que se desenvolveu a carreira popular do día 31 e que por fin puido celebrarse, despois de varios anos nos que a pandemia ou a adversa meteoroloxía obrigara a suspendela.

O Centro de Ocio Xuvenil organizou dúas actividades de Nadal que esperaron grande interese entre os usuarios e usuarias. Así, o 22 de decembro celebrouse un obradoiro de comidas de Nadal no que mozos e mozas se puxeron mans á obra e compartiron a súa creatividade empregando chuches, froita e chocolate. Tivo tamén a rapazada de Cedeira a súa particular despedida de ano na tarde do 29, cando o horario do centro alongouse para chegar ata as once da noite.

MELCHOR, GASPAR E BALTASAR VISITARÁN CEDEIRA NA TARDE DO VENRES E RECOLLERÁN AS CARTAS DAS CRIANZAS

Os Reis Magos visitarán este venres a vila de Cedeira, horas antes da noite na que reparten agasallos ás crianzas. A súa cabalgada percorrerá as rúas da localidade a partir das 18.00 horas e deterase no Auditorio Municipal, sobre as 19.00h, para recoller de xeito personalizado as cartas dos nenos e nenas que queiran achegarse a eles. A continuación, sobre as 19.30h, participarán tamén nunha festa infantil que se vai desenvolver nas instalacións do CEIP Nicolás do Río, na que haberá xogos inchables e unha merendola con chocolate quente e roscón ou bola.

A cabalgata sairá desde o colexio Nicolás do Río e tomará o Camiño Real da Madalena. Percorrerá despois a avenida Castelao, a rúa Ezequiel López na zona vella, praza de Galicia e avenida da Area. O Concello contou coa colaboración das asociación Mulleres da Vila, Aturuxeiras, a ANPA Picapeixe, Protección Civil e Buxainas, cuxa banda de gaitas irá animando o percorrido.

O programa de actividades de Nadal promovido polo Concello culminará na noite do 6 ao 7 coa Festa de Reis, que se vai desenvolver baixo a carpa instalada na praza Roxa a partir das 23.30h. A verbena estará amenizada pola orquestra Olympus.

Ata hoxe, día 4, mantense o parque de xogos no Polideportivo Municipal. Alí, de 16.30 a 20.30h, funcionan unha zona de obradoiros e tres inchables. Hoxe venres, última tarde de programación, montarase un circuíto para cars a pedais e rollers e outro circuíto de coches de radiocontrol. A entrada é de balde.

O CONCELLO DE CEDEIRA INICIA CO ALUMNADO DE 3º DE ESO O CUARTO PROCESO DE ORZAMENTOS PARTICIPATIVOS

O alcalde de Cedeira, Diego Pablo Moreda Gil, e o concelleiro de Mocidade, Noel López, participaron recentemente na sesión de arranque do cuarto proceso de Orzamentos Participativos no IES Punta Candieira. Un ano máis, o Concello implica neste programa ao alumnado de terceiro curso de ESO, confiándolle a decisión sobre o investimento de 20.000€. Un parque de calistenia e un ciclo de auto-cine, a mellora da pista do Floreal e a compra de novo equipamento para o ximnasio municipal foron as actuacións acometidas nas tres edicións anteriores.

Os orzamentos participativos, tal e como destaca o alcalde, representan un exercicio de democracia no que os rapaces e rapazas se implican con moito entusiasmo e interese. Son unha fórmula para aprender como funciona a administración local, cales son os seus órganos de decisión e áreas de xestión, os trámites que hai que cumplimentar, etc. O proceso abrangue o debate do alumnado sobre as necesidades que detectan na súa vila e a elaboración de propostas, que despois serán votadas e deberán pasar polos servizos administrativos do Concello para seren orzamentadas e validadas, no sentido de comprobar que son viables técnica e economicamente.

Segundo o calendario previsto, o alumnado participará de xaneiro a marzo en diferentes obradoiros nos que coñecerán como funciona o Concello, reflexionarán sobre as necesidades do pobo e elaborarán os seus proxectos. En abril analizaranse as propostas polos servizos municipais e xa no mes de maio está previsto que se celebre no instituto a asemblea na que rapaces e rapazas votarán entre os diferentes proxectos para elixir aquel ou aqueles que irán ao pleno. Nese mesmo mes de maio presentarase a resolución ante a corporación para a súa aprobación definitiva.
Cómpre recordar que a experiencia de Orzamentos Participativos de Cedeira foi exposta no mes de decembro en Santiago, no marco das V Xornadas Formativas de Cidades Amigas da Infancia, como exemplo de participación a mocidade no proceso de decisión dunha administración pública. Acudiron ao acto tres representantes do Consello Local da Infancia e a Adolescencia de Cedeira, que xa antes, en novembro, tivo a súa estrea no XI Foro da Infancia que Unicef celebrou no Parlamento de Galicia. En ambos os dous actos, os voceiros e voceiras da mocidade de Cedeira destacou a importancia de participar no deseño de políticas públicas que tamén lles afectan.