Skip to content Skip to left sidebar Skip to footer

NOVAS

O GOBERNO LOCAL DE CEDEIRA REXEITA A DECLARACIÓN DE IMPACTO AMBIENTAL DO PARQUE EÓLICO BADULAQUE

O goberno local de Cedeira quere manifestar o seu total desacordo coa resolución que onte publicou o Ministerio de Transición Ecolóxica no BOE formulando a declaración de impacto ambiental do proxecto do parque eólico Badulaque. En palabras do alcalde, Pablo Diego Moreda Gil, “estamos totalmente decepcionados coa tramitación que se fixo e decididos a tomar medidas e chegar ata o final para defender os intereses dos veciños e veciñas de Cedeira”.

Moreda Gil considera unha “tomadura de pelo” a tramitación da declaración de impacto ambiental, na que nin se contestaron nin se tiveron en conta as alegacións presentadas polo Concello de Cedeira. “Son uns aeroxeradores brutais e a súa instalación está fóra do plan sectorial galego, que é o marco no que deberían executar este tipo de proxectos”, dixo o alcalde, que anunciou a súa intención de convocar aos voceiros de todos os grupos políticos con representación municipal para abordar o tema e “tomar medidas conxuntas”. O alcalde adiantou que “iremos ata o contencioso, se é preciso, para defender os intereses da veciñanza”.

O parque eólico Badulaque, de 90MW de potencia e promovido por Enel Green Power, prevé a instalación de 20 aeroxeradores de 170 metros de diámetro e 115 de altura ata o centro do rotor. Durante o verán de 2021 o Concello de Cedeira promoveu unha charla informativa sobre este proxecto, precisamente no momento no que estaba aberto o prazo de alegacións, na que se informou á veciñanza da iniciativa e se expuxeron as afeccións da mesma sobre a paisaxe, a flora e a fauna e o desenvolvemento socioeconómico da zona. O goberno local facilitou tamén daquela a presentación de alegacións por parte da cidadanía, como tamén fixo, nas mesmas datas, cos parques de enerxía eólica mariña proxectados nas proximidades do litoral cedeirés.

O Concello tramitou daquela un amplo documento no que se detallaban vinte alegacións ao proxecto Badulaque. Entre outras, alegábase que a iniciativa está fóra das Áreas de Desarrollo Eólico de Galicia (ADE), que non se adecúa á zonificación ambiental para enerxías renovables do propio Ministerio de Transición Ecolóxica, que a poligonal do parque está sobredimensionada, que non se identifican as parcelas afectadas, que non se evalúa a afección á candidatura do proxecto de Xeoparque Cabo Ortegal, nin o impacto socioeconómico pola proximidade aos núcleos de poboación, a proximidade a espazos naturais protexidos ou a grave afección á paisaxe.

O goberno local de Cedeira apoia o uso das enerxías renovables e é moi sensible e activo na loita contra o cambio climático, pero sempre no marco cunha implantación de estruturas de maneira coherente, regulada e ordenada, evitando os impactos negativos sobre o entorno e as actividades, para garantir unha transición enerxética xusta.

Podese consultar a resolución na seguinte ligazón:
https://www.boe.es/diario_boe/txt.php?id=BOE-A-2023-2598

A CELEBRADA OBRA DE TEATRO “CONTINENTE MARÍA” CHEGA ESTE SÁBADO AO AUDITORIO DE CEDEIRA

Unha conferencia sobre Martín Sarmiento, o Pai Sarmiento, e a obra de teatro “Continente María” sucederanse mañá venres e o sábado na axenda cultural de Cedeira. O Museo Mares acolle a primeira das actividades, promovida pola biblioteca do CEIP Nicolás do Río ao fío do proxecto interxeracional “Naturalmente, apendendo!”. Trátase de impulsar o coñecemento da flora e a fauna máis próxima, un traballo no que se encadra esta charla que mañá pronunciará o mestre xubilado do propio centro Rafael López Loureiro.

López Loureiro, autor do blog Ao noroeste do Noroeste, falará na súa conferencia sobre Martín Sarmiento (1695-1772), monxe benedictino e home ilustrado, moi interesado pola botánica e a menciña entre outros saberes. A charla, que leva por título “Martín Sarmiento… o primeiro naturalista?”, comezará ás 19.30 horas no museo.

Xa o sábado, o Auditorio Municipal acollerá unha das pezas teatrais máis celebradas do último ano na escena galega. “Continente María” é o título dunha obra na que se establece un diálogo coa extraordinaria figura de María Casares. A actriz Melania Cruz interpreta á dramaturga nesta montaxe que recolle a retranca, o humor e a musicalidade que ela desprendía nas súas entrevistas e escritos. Baixo a dirección de Tito Asorey, a peza evoca á actriz extraordinaria que foi María Casares e tamén a súa dimensión humana, como unha muller entregada á vida e á escena para vencer o medo e sobrepoñerse ao exilio.

A representación comezará ás 20.30h e as entradas teñen un prezo de 3,5€. Pódense reservar anticipadamente ata mañá venres ás 14.00h a través de whatsapp, no número 649 876 614, ou ben mercalas en taquilla desde unha hora antes do inicio da función.

CHEGA A CEDEIRA O PLAN “A ADMINISTRACIÓN PRETO DE TI”

O plan “A Administración preto de ti” que puxo en marcha o Goberno central en colaboración coa Federación Española de Municipios e Provincias chega a Cedeira. A cafetería do Auditorio acollerá o vindeiro martes unha sesión na que se ofrecerá asesoramento sobre os trámites e xestións máis habituais que hai que realizar diante da adminstracións e axuda para obter xa, na mesma reunión, o certificado dixital ou a Cl@ve que requiren moitos deles.

A cita será ás 11.30 horas e ten un máximo de vinte prazas, que se cubrirán por orde de inscrición. Os veciños e veciñas de Cedeira interesadas poden inscribirse previamente chamando ao número 673 223 414 ou ben escribindo ao mail manuel.martinez@cedeira.gal. Na sesión, as persoas asistentes poderán tramitar e obter o seu certificado dixital, aforrándose o desprazamento a unha oficina da Seguridade Social ou otra institución para acreditar a identidade.

O plan “A Administración preto de ti” é unha iniciativa impulsada polo Ministerio de Política Territorial que ten como obxectivo contribuír a rachar coa brecha dixital, especialmente nos colectivos que teñen máis dificultades para acceder á administración electrónica. O programa, artellado a través dun convenio de colaboración coa FEMP, ten previsto chegar a máis de sete millóns de persoas e na súa primeira fase vai dirixido aos municipios con menos de 8.000 habitantes.

 

  • 20 Xaneiro, 2023 en NOVAS