MOCIDADE

O Concello de Cedeira propón dúas citas musicais para esta fin de semana, nas que se ofrecerá unha revisión de dous estilos diferentes baixo o prisma da tradición galega. “Blues do País” é o nome do espectáculo que terá lugar na tarde do sábado, enmarcado no programa “Cantos e contos ao solpor”, e “Mozart á galega” é o da cita prevista para a mañá do domingo.

Bieitta James e Pepe King protagonizarán o sábado, ás 20.00 horas na Praza da Rectoral, a segunda cita do programa “Cantos e contos ao solpor”. O dúo ofrece un espectáculo “Blues do país”, no que este estilo musical que ten a súa orixe nos esclavos africanos das plantacións americanas adáptase ao galego “con extra de retranca”. Os clásicos do blues, reinterpretados e adaptados á nosa realidade.

“Mozart á galega” é unha función coa que o flautista Luís Soto quere amosar a universalidade dos catro cuartetos para flauta e trío de cordas que creou o xenio de Salzburgo, poñéndoos en relación coa música tradicional galega en función do carácter, tonalidade, tempo, compás e ritmo. O cuarteto que interpreta esta proposta está formado, ademais de por Luís Soto coa flauta traveseira, por David García ao violín; Ioana Ciobotaru á viola e Millán Abeledo no violoncello. O espectáculo desenvolverase na Praza Floreal ás 13.00 horas, este domingo.

O Concello de Cedeira abre o vindeiro domingo unha nova edición do ciclo “Cantos e contos ao solpor”, un programa de tres espectáculos que vai viaxar por outras tantas parroquias do municipio para pasar páxina do verán e recibir ao outono da man do teatro, a música e as historias populares.

O actor Avelino González será o primeiro contador este sábado, ás 20.00 horas, no local social de Tarroiba, en Cervo (Santalla). Alí presentará o espectáculo “A todo Risco”, no que fala de Vicente Risco e tamén da Xeración Nós. Segundo reza a presentación deste monólogo, Vicente Risco “era un coñón, noctámbulo, bohemio, que gustaba do baile e de gozar da vida ata altas horas da madrugada. Gustaba da sauna e da meditación e do viño tostado e fundou a primeira congregación budista de Galicia. Sabía e practicaba o humor como xabre que daba solidez, perenne e sólida, ó estarmos no mundo”.

A seguinte cita con “Cantos e contos ao solpor” será o 18 de setembro, tamén ás 20.00 horas, no local social da asociación de veciños de Montoxo. Bieitta James e Pepe King ofrecerán “Blues do país”, un concerto no que este estilo musical adáptase ao galego “con extra de retranca”. A parella de músicos reinterpreta os clásicos e os axustan á nosa realidade.

Cándido Pazó protagonizará a última cita deste programa o día 2 de outubro, ás 20.00 horas, no local veciñal de San Román. O coñecido actor levará ata alí o seu espectáculo “Botando a lingua a pastar”, no que recolle contos da tradición oral, historias extraídas e adaptadas de diferentes obras literarias e outras de creación propia. O humor e a empatía oral estarán no fío condutor desta proposta.

O Concello de Cedeira investiu algo máis de 10.000€ nas obras de renovación do pavimento de caucho da zona de xogos dos nenos e nenas de Infantil no CEIP Nicolás do Río. Segundo explicou o alcalde, Pablo Diego Moreda Gil, a actuación é froito dun acordo polo que o centro e a administración local asumiron o custo ao 50%, no que “se pon de manifesto unha vez máis o positivo clima de colaboración que temos co colexio e a nosa vontade de contribuír á mellora dos recursos da educación pública”.

Moreda explicou que o goberno local respostou a unha proposta de colaboración do propio centro, que suxeriu unha actuación para garantir a durabilidade do pavimento, que tiña xa moitas losetas levantadas e deterioradas. “Convimos a realización destas obras, un exemplo máis de como a suma de esforzos, por parte da dirección do colexio e do Concello, fai que consigamos máis cousas”.

Os traballos consistiron na retirada das pezas deterioradas do vello solo de caucho e a súa substitución por novas losetas, axuste, limpeza e recheo das xuntas para darlle unha capa final coloreada que aporta continuidade aos 340 metros cadrados de superficie deste espacio de xogos. O Concello de Cedeira asumiu a mitade da obra –en total tivo un orzamento de pouco máis de 22.000€-, que xa está rematada e lista para o comezo do novo curso.

É unha intervención máis das que nos últimos anos asumiu o Concello de Cedeira para o mantemento e mellora das instalacións do CEIP Nicolás do Río. Así, o persoal municipal traballou o pasado ano na adecuación doutra zona de xogos que facilitou a separación de grupos, contratouse a construción dun teito de abrigo no corredor de acceso ao centro, a realización dun mural no peche e o pulido do solo do polideportivo, entre outras actuacións. O goberno local facilitou tamén o pasado ano máscaras e xel hidroalcohólico á comunidade educativa, coa que a colaboración discorre igualmente, dun xeito moi construtivo, na organización de diferentes actividades ao longo do ano.