MOCIDADE

O CONCELLO INVESTIU MÁIS DE 25.500€ NUN NOVO XOGO INFANTIL PARA O PATIO DE AREA DO CEIP NICOLÁS DO RÍO

O Concello de Cedeira investiu recentemente 25.514,67€ na compra dun xogo infantil para o patio de area do CEIP Nicolás do Río. A empresa Kaizen Management resultou adxudicataria da contratación, na que se requería un xogo composto por catro torres con rede, pasarelas e pasos, acaído para o seu uso por parte dos nenos e nenas do centro educativo.

Segundo informou o goberno local, o equipamento está xa instalado e en uso no colexio. Foi esta unha das intervencións que o Concello financiou con cargo aos remanentes incorporados ao presuposto deste ano. Xunto con este proxecto, está previsto acometer outro para a mellora das instalacións do CEIP Nicolás do Río: a obra de pavimentación con formigón do patio do Areal, que conta cun orzamento de 29.942,17€.

Ao fío destas intervencións, que se suman a outras xa asumidas polo Concello, o alcalde recordou a demanda unánime da comunidade educativa e o pleno da corporación para que a Xunta afronte a cubrición do patio de quinto e sexto de Primaria. Foi unha reclamación que xa foi levada ao Parlamento de Galicia e Moreda Gil apuntou tamén que está á espera de que o xefe territorial de Educación, Indalecio Cabana, lle reciba para tratar este asunto.

O alcalde salientou que esta é unha demanda que hai que situar no contexto de estreita colaboración que mantén o Concello coa comunidade educativa do colexio, na que a administración municipal ten asumido sucesivas intervencións de mellora das instalacións. Así, o pasdo verán o Concello asumiu o 50% da renovación do pavimento de caucho da zona de xogos de Infantil (uns 10.000 dos 20.000€ que supuxo), e con anterioridade contratou a obra de instalación dun teito de abrigo no corredor de acceso ao centro, instalara outros xogos no parque de Infantil, transformara un vello patio nun horto urbano e mellorou a iluminación do polideportivo do colexio, entre outras actuacións.

“Somos un Concello que non se limita a pedir á Consellería de Educación que asuma as demandas da comunidade educativa, senón que tamén colaboramos e investimos para mellorar a calidade das instalacións e facelas máis confortables para o alumnado”, explicou Moreda. O alcalde urxíu a Educación para que afronte a obra de cubrición do patio de quinto e sexto de Primaria, para garantir que xa o curso próximo estes rapaces e rapazas poidan gozar do recreo e a saída ao exterior das aulas independentemente da climatoloxía.

OS ORZAMENTOS PARTICIPATIVOS DESTINARANSE ESTE ANO Á REALIZACIÓN DE MELLORAS NA PISTA DO FLOREAL

A proposta de mellorar a iluminación e a pintura da cancha de xogo do Floreal foi a máis votada entre as cinco que este mércores se presentaron na asamblea dos orzamentos participativos, no salón de actos do IES Punta Candieira. Un total de 61 rapaces e rapazas dos catro grupos de terceiro de ESO protagonizan este ano a segunda experiencia deste tipo no municipio, que de novo vai traducirse no investimento de 20.000€ do presuposto municipal. Na mesma sesión o alumnado decidiu a representación de doce compañeiros e compañeiras que se encargarán de presentar o proxecto ao pleno da corporación municipal o vindeiro día 22.

A praza do Floreal é un espazo público moi frecuentado pola mocidade de Cedeira. Ten unha cancha de xogos cuxa pintura actual é moi esvaradiza e tampouco dispón de boa iluminación, o que fai que o tempo de xogo, especialmente nos meses de inverno, se acurte moito. A proposta está valorada en preto de 20.000€, polo que desta volta será só esta iniciativa a que se financie a través do programa, e consistirá na instalación dun novo alumado e a renovación da pintura do chan.

A seguinte proposta máis votada, entre as cinco que chegaron á asemblea, foi a titulada “Por unha praia divertida”, que propoñía o desenvolvemento de actividades como obradoiros de area, ioga, volei, petanca… na praia da Madalena durante o verán.

Porén, o proceso de orzamentos participativos serve para moito máis que para decidir estritamente o destino deses 20.000€. As sesións de traballo que se desenvolveron desde o pasado mes de febreiro serviron para que o alumnado aprendese como funciona a administración municipal e os seus órganos de decisión, para que vivisen un proceso de debate e para implicarse de maneira directa na elaboración dos proxectos e na súa presentación e defensa diante dos compañeiros e compañeiras.

Tal e como explicou Carmela Prieto, a concelleira de Participación e Mocidade, este ano quedou claro que o interese do alumnado estaba dirixido á procura de máis equipamentos e programas relacionados co lecer e o deporte ao aire libre. De feito, algunhas das ideas xurdidas dese diálogo entre o Concello e o alumnado van poder incorporarse á programación do Centro de Ocio Xuvenil, cuxa animadora sociocultural organiza o programa de actividades en función das suxestións que presenta a rapazada en mesas participativas.

Na mesma asemblea deste mércores, ademáis da proposta elixida, votouse a representación de doce mozos e mozas que irá o vindeiro día 22 a presentar o resultado do seu proceso participativo diante do pleno da corporación.

O AUDITORIO ACOLLE ESTE SÁBADO A REPRESENTACIÓN DA OBRA DE MANUEL MARÍA A LÚA VAI ENCUBERTA

O Auditorio de Cedeira acolle este sábado a representación da obra A lúa vai encuberta, un texto de Manuel María que por primeira vez é posto en escea polas compañías Incendiaria e A Quinta do Cuadrante. A peza xira arredor da historia de Galicia e a súa loita por conformar unha identidade propia, partindo do Estatuto de Autonomía do 36, truncado polo golpe de estado, e chegando ata a transición democrática. A función, que estivo programada en marzo pero foi adiada por enfermidade, comezará ás 20.00 horas.

“A lúa vai encuberta” é un texto que o autor chairego escribiu nos anos setenta e que non chegou a representarse. Incendiaria, unha compañía que se define como plataforma artística para a investigación arredor da creación escénica contemporánea, e A Quinta do Cuadrante, un grupo que sitúa como prioridade a procura de espectáculos nos que dialoguen diferentes disciplinas, uniron sus forzas para representala. A obra estreouse en Ourense en setembro de 2021, despois de gañar o II Certame Manuel María de Proxectos Teatrais.

A montaxe ten a Tito Asorey na dirección e a Vanesa Sotelo encargada da dramaturxia. Ambos os dous actúan xunto con Davide González e Melania Cruz.

Festa da Pescada

Por outra banda, desde o Concello recordan que este domingo, día 19, se celebrará na zona portuaria, nas inmediacións da Confraría de Pescadores, a IV Festa da Pescada. A celebración, organizada no marco do proxecto Cedeixura, exaltará este peixe preparado de dúas maneiras. O público poderá tamen degustar berberechos e empanada de polbo ou de atún. A festa comezará ás 12.00h e as 150 primeiras persoas que acudan recibirán un prato conmemorativo de madeira como agasallo.