MOCIDADE

Alumnos do IES Punta Candieira asistirán hoxe á obra “Quijote. R2D2 y el caballero de la triste figura”

A compañía de Ricardo Frazer “Tempestades” representará hoxe venres a obra “Quijote. R2D2 y el caballero de la triste figura” para alumnos do IES Punta Candieira.

A sesión dará comezo ás 10.30 horas e responde a unha iniciativa do Concello de Cedeira de acercar o mundo da escena á mocidade poñendo ao seu alcance obras que capten a súa atención. E nada mellor para iso que a figura de R2D2, androide que tomou parte na película de George Lucas, para que se vexan atrapados nunha divertida versión do clásico de Cervantes.

O desenvolvemento da obra orixinará un pulso entre a intelixencia humana e artificial nun duelo interpretativo sobre as táboas do auditorio municipal cheo de humor, maxia e loucura. O mago e actor Ricardo Frazer é o protagonista dunha peza cuxo texto, dirección e produción débense a María Bilbao, que tamén presta as súas cordas vocais e acciona ao autómata entre caixas.

Cedeira inviste case 60.000 euros na conservación da carpintería dos escolares de Piñeiro e Esteiro

O Concello de Cedeira está a levar a cabo un labor de conservación dos centros sociais coa realización de obras que axuden a súa conservación e uso. O goberno municipal entende que “se trata de espazos que favorecen a convivencia, fomentan a cultura e axudan a manter viva a memoria colectiva”.

Na actualidade, esta política estase a materializar nos antigos escolares de Piñeiro e Esteiro, cuxo importe de adxudicación ascende a 59.470 euros. Trátase dun paquete de actuacións que, executadas pola empresa Carpintería López e Villadóniga, contribuirán á conservación da carpintería interior e exterior das dúas escolas. Basicamente a intervención consistirá na restauración de portas, ventás e contraventás de edificios que foron construídos a principios do século XX co diñeiro da emigración.

Os traballos comprenderán a retirada da pintura, a substitución da madeira e dos elementos deteriorados, a recuperación das ferraxes e a aplicación de aceites vexetais e de ceras naturais para garantir a súa conservación.

O goberno de Cedeira anuncia a súa intención de trasladar este tipo de accións a outras sedes, por considerar que forman parte dos seus compromisos coa veciñanza en materia social.

A sociedade “Hijos del Ayuntamiento de Cedeira en La Habana” financiou a construción do escolar de Piñeiro, un edificio do ano 1927 e que hai pouco recuperou a placa conmemorativa. A construción do escolar de Esteiro remóntase ao ano 1924 e estivo financiada pola “Sociedad de la Ilustración e Beneficiencia Progreso”, con sede en La Habana.

Cedeira celebrará o samaín os días 2 e 3 con actividades, concursos e coa primeira cita co “Escape Room”

CEDEIRA CELEBRARÁ O SAMAÍN OS DÍAS 2 E 3 CON ACTIVIDADES,CONCURSOS E COA PRIMEIRA CITA CO “ESCAPE ROOM”

O Concello de Cedeira organiza para os días 2 e 3 de novembro a festa do Samaín, unha celebración que chega este ano a súa XXIX edición e para a que o goberno local conta coa colaboración da Asociación Amigos de Samaín, da ANPA Picapeixe, da Deputación e, a título individual, con moitos veciños e veciñas da vila.

Desde o día de onte ata o próximo mércores (día 31) a convocatoria dará lugar a obradoiros abertos á participación de pais e alumnos do colexio Nicolás del Río. A elaboración de chapas, o tallado de cabazas e a confección de cadeas pantasmas son só algunha das actividades previstas.

Ao programa incorpórase este ano un “Escape room”, unha iniciativa que consiste en introducir a un grupo de persoas nunha habitación pechada da que só poderán saír resolvendo enigmas. Cada sesión ten unha duración de 45 minutos, polo que haberá que facer a reserva a través do correo amigosdesamain@gmail.com e no que debe figurar o número persoal dos solicitantes. Os equipos terán un mínimo de 3 e un máximo de 5 persoas. As prazas son limitadas e a actividade desenvolverase entre mañá martes (30 de outubro) e o sábado 3 de novembro en horario de mañá e tarde.

O venres día 2 haberá obradoiros de zonchos e pintura na carpa instalada no paseo da Mariña, a partir as 18,00 horas, e a actuación de Paco Nogueira, co espectáculo Bule, Bule, despois das 20.00 horas. A xornada do venres 3 arrincará con traballos de decoración na zona do paseo marítimo e coa apertura do prazo de inscrición para tomar parte na xincana, que estará aberto entre as 12.30 e as 13.30 horas.

A partir das cinco da tarde sucederanse as actividades. Así, celebrarase o certame de melóns tallados, a tradicional merenda de outono -requeixo con mel e bola de azucre-, a xincana infantil e o obradoiro de maquillaxe. O pasarrúas pola Vila Vella dará comezo ás 20.00 horas e o finalizar no mesmo terá lugar a entrega de premios ás mellores cabazas e aos gañadores da xincana infantil.

O programa prolongarase ata a xornada do próximo domingo (día 4), data na que auditorio municipal acollerá a representación da obra “Patapatum” pola compañía Elefante Elegante. Será ás 18.00 horas.